Elşad Həsənov: "Bunun əsas hədəfi Qərbin maliyyələşdirdiyi QHT-lərdi, buna görə də, buna ilk etiraz Avropadan gəldi"
Parlamentdə hakim "Gürcü Arzusu – Demokratik Gürcüstan" partiyasının təşəbbüsü ilə qəbul edilən "Xarici agentlər haqqında" qanun layihəsi qəbul olunarsa, Gürcüstanı daha yüksək dərəcədə təhlükəsizliklə təmin edəcək. Bu barədə jurnalistlərə Gürcüstanın baş nazirinin müavini, mədəniyyət və idman naziri Teya Tsulukiani bildirib.
Onun sözlərinə görə, son bir neçə ildə Gürcüstan uçan və pis hava səbəbindən titrəyən təyyarəyə bənzəyir: "Bu, Ukraynadakı müharibədən xeyli əvvəl başlayıb. Ölkəmiz bir neçə ildir ki, bu vəziyyətdədir və bu zaman əlavə təhlükəsizlik kəmərlərinə ehtiyac var. Şəffaflıq qanununun funksiyası tam olaraq yerinə yetiriləcək, mən bu qanun layihəsi təşəbbüsünü alqışlamaq istəyirəm".
Siyasətçi əlavə edib ki, cəmiyyətin "anti-gürcü işinə" xidmət edən və şəffaflıqdan imtina edən Gürcüstan qeyri-hökumət təşkilatları haqqında rəsmi məlumat almaq hüququ var: "Gizlədəcək heç nəyi olmayanlar sakitdirlər. Maliyyə şəffaflığı hamı üçün əsas olmalıdır. Maliyyə şəffaflığının olmadığı yeganə sektor qeyri-hökumət sektorudur".
Qeyd edək ki, çərşənbə günü Gürcüstanın hakim partiyasının icraçı katibi Mamuka Mdinaradze xarici agentlər haqqında qanun layihəsinin yenidən parlamentə təqdim edildiyini açıqlayıb. Bu, oxşar təşəbbüsün kütləvi etirazlara səbəb olmasından bir il sonra baş verir. Mdinaradzenin aydınlaşdırdığı kimi, layihənin mətni, "xarici təsir agenti" ifadəsi istisna olmaqla, keçən il olduğu kimi olacaq. Əvəzində "xarici gücün maraqlarını güdən təşkilat" anlayışından istifadə olunacaq. Partiyada bu qərarın qəbul edilməsinin əsas səbəbləri xaricdən maliyyələşən qeyri-hökumət təşkilatlarının hələ də gəlirlərini açıqlamaması olub. Eyni zamanda, onlar çox vaxt etirazların əsas hərəkətverici qüvvəsinə çevrilirlər.
Gürcüstanda qəbul ediləcək "xarici agentlər qanunu"nun əsas hədəfi kim olacaq: Qərb, yoxsa Rusiya?
Təhlükəsizilik orqanlarının veteranı, siyasi şərhçi Elşad Həsənov "Bakı-Xəbər"ə açıqlamasında bildirdi ki, Gürcüstan keçən il Moldova ilə birlikdə Avropa İttifaqının üzvlüyünə namizəd oldu: "Belə olduğu halda, Avropa İttifaqı onların qarşısında müəyyən tələblər qoyur. Həmin kriteriyalar mütləq yerinə yetirilməlidir. Bu gün Gürcüstanda hakimiyyətdə "Gürcü Arzusu-Demokratik Gütcüstan" Partiyasıdır. Bu partiyanın yaradıcısı Rusiya ilə sıx bağlılığı olan oliqarx Bdzina İvanaşvilidir. Onun özü şəxsən hakimiyyətdə təmsil olunmasa da, faktiki olaraq ölkəni o idarə edir. Hətta prezidentin xarici səfərlərinə belə müdaxilə etməyi bacarır. Bugünlərdə ona dolayısı ilə tabe olan baş nazir prezidentin xarici səfərinə icazə vermədi. Orada belə bir vəziyyət var. Bununla yanaşı, onlar balanslı siyasət yürütməklə, özlərini Qərbə də demokratik kimi göstərə bilirlər. Rusiya ilə də olan bağlarını tam kəsmirlər. Onlar Rusiyaya qarşı olan sanksiyaları dəstəklədi, ancaq tam olaraq Moskva ilə konfrontasiyaya girmədilər. "Xarici agent" məsələsini keçən il gündəmə gətirdilər. Ölkədə böyük qalmaqal yarandı. Rəsmilər deyir ki, bu, maliyyə şəffaflığını təmin etmək baxımından lazımdır. Əsas məsələ maliyyənin haradan və hansı məqsədlər üçün gəlməsini öyrənə bilməkdir. Bu məsələ ortaya çıxan kimi Avropa İttifaqı Gürcüstan hökumətini belə bir qanunu qəbul etməməyə çağırdı. Buradan sizin sualın cavabı da aydınlaşır. Bunun əsas hədəfi Qərbin maliyyələşdirdiyi QHT-lərdi, buna görə də, buna ilk etiraz Avropadan gəldi. Hesab edirəm ki, Gürcüstan müxalifəti buna qarşı çıxacaq və kütləvi aksiyalar keçirəcək. Ola bilər ki, qanunun qəbulu bu dəfə də təxirə salınsın".
Məhəmmədəli QƏRİBLİ
