Tofiq Abbasov: "Ermənistan ciddi qırılma hərəkətlərinə keçsə, başından zərbəni alacaq"
Bütün qınaq və etirazlara baxmayaraq, Ermənistan Brüsseldə keçiriləcək görüşdə iştirakdan imtina etmədi. Bununla da açıq şəkildə anti-Rusiya koalisiyasında yer aldığını isbatlamış oldu. Rusiyanın bunlara reaksiyası da maraqlı görünür. Bütün bu şıltaqlıqlara çox dözümlə yanaşır.
Maraqlıdır ki, bir çox ekspertlər də təəccüblə sual verir: Rusiya Ermənistanın kaprizıəri qarşısında niyə bu qədər ləng tərpənir?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, Ermənistanın kaprizləri həm dövlətin, həm də ermənilərin şakəridir, onlar hər zaman alət kimi istifadə olunublar: "Onlar üzərlərində olan istənilən qüvvənin əsiri olublar. Uzun müddət idi ki, onlar Azərbayvanı zəif bənd qismində görürdülər və biz onların dərsini verdik. İndi də onların Rusiyadan narazılıqları ondan ibarətdir ki, Rusiya onları müdaifə etmədi, dəstək göstərmədi və onlar da belə biabırcasına məğlub oldular. Rusiya ona görə dözüm göstərir ki, Ermənistan faktiki olaraq dövlət deyil, Rusiyanın quberniyasıdır. Bilirsiz ki, onun iqtisadi kompleksi, şirkətlərin səhmlərinin 95 faizi Rusiyanın himayəsindədir. Təsadüfi deyil ki, onların sərhədlərini də Rusiya sərhədçiləri qoruyur. Faktiki Rusiyanın təsiri altında o bir yarımsubyekt, həm də obyektdir. Bu baxımdan da Rusiya onları tənbeh etməyə tələsmir. Ermənistanın atom elektrik stansiyası, dəmir yolu, mədənlərinin hamısının idarəçiliyi Rusiyanın əlindədir. Onların Qərbə meyllənməsi də, hələ ki, söz olaraq qalır. Real suverenliyi gerçəkləşdirmək üçün ölkənin sənaye, təsərrüfat potensialını iş adamlarının özləri götürməlidirlər. Ruben Vardanyan Rusiyada bank fırıldaqçılığı nəticəsində külli miqdarda pul qazandı, o pulları Rusiyadan çıxardı. Bir qismini Qərb banklarına yerləşdirdi, bir qismini də Qarabağa yerləşdirmək istəyirdi. Guya onlar Qarabağı Azərbaycandan alacaqlar və Qarabağ müstəqil dövlət olacaq. Hətta BBC-yə müsahibəsində Ruben Vardanyan bildirdi ki, guya Azərbaycana dərs verir, Azərbaycan rəhbərliyini yaxına buraxmayacaq. Gördük ki, Rusiyada öz kapitallarını yalanla əldə edən erməni əsilli iş adamları Rusiyadan öz aktivlərini çıxartdılar. Ermənistana gəldikdə isə, Ermənistan tamamilə Rusiyanın ağzının içindədir. Onlar söz oyunları aparırlar, təhdidlər yağdırırlar, Rusiyadan uzaqlaşmaqlarına dair xəbərdarlıqlar edirlər. Ancaq bütün bunları etmək üçün onların heç bir mexanizmləri yoxdur. Təsadüfi deyil ki, Qərbdən belə səslər gəlir ki, Ermənistanı yavaş-yavaş öz əlimizə alacağıq. Hələ ki, Rusiya dözür. Bu prosesin özündə də qırmızı xətlər, kritik nöqtələr var. Əgər onlara çatsalar, əlbəttə ki, Rusiya artıq söz cavablarından daha artığını etməyə başlayacaq. Əgər Ermənistan həqiqətən də həddini aşsa, artıq tədbirlər qaçılmaz olacaq. Bu tədbirlərdən Ermənistan müsbət nəticə əldə edə bilməyəcək. Mən düşünürəm ki, Rusiyanın təmkini Ukraynada apardığı müharibə ilə əlaqəli deyil. Qərbdə, Ermənistanın özündə Rusiyanın başının Ukraynaya qarışması ilə bağlı fikirlər səslənir. Ancaq bu belə deyil. Ermənistanı yerində oturtmaqdan ötrü Rusiyanın kifayət qədər gücü var. Sadəcə, mexanizmləri hələ ki, istifadəyə vermir. Lazım gələrsə, Ermənistan ciddi qırılma hərəkətlərinə keçsə, başından zərbəni alacaq. Rusiya çalışır görsün ki, Ermənistanla Qərbin oyununun son həddi hara qədər gedəcək. Ancaq vəziyyət indi böyük geosiyasi və qlobal sistemdəki dəyişiklərlə əlaqəlidir. Dünyanın parçalanıb yenidən bölünməsi məsələsi gündəmdədir. Qərb çalışır ki, Cənubi Qafqazı açar bir region kimi parçalasın, hərcmərclik yaratsın. Rusiyanın da marağı ondan ibarətdir ki, Qərbin bölünmə xətlərini hansı tərzdə cızmasını, onun hansı areallardan keçməsini görsün".
Məhəmmədəli QƏRİBLİ
