Faiq Ələkbərli: "Voskyanın iddiasının kökündə dayanan məqsədlər bəllidir, amma o və onun kimilər bu cür əsassız ittihamlarla Azərbaycan dövlətinin nüfuzuna xələl gətirə bilməz"
Ermənistanda xəstə təfəkkürlü olanlar çoxdur, onların arasında özünə "alim" adı qoyanlar da az deyil. İllərdir ki, uydurmalar, saxtakarlıqlar hesabına baş girləyən belələri, demək olar ki, tez-tez Azərbaycan dövlətini hədəfə alır, ölkəmizlə bağlı dezinformasiya yayırlar.
Daşnakın yekəsi olan sözdə iranşünas Vardan Voskanyan yenə də iftira dəyirmanını işə salıb ağlına gələni üyüdüb-tökür.
Bu ünsür özünü İrəvan Dövlət Universitetinin Şərqşünaslıq fakültəsinin İranşünaslıq kafedrasının müdiri kimi təqdim edir, amma düşüncəsi, analitik qabiliyyəti, normal informasiyası olmayan birisi ancaq yalanşünas ola bilər. Voskanyan son illər Azərbaycana qarşı ağlasığmaz iftiralar uydurmaqla məşğuldur.
Mütəmadi olaraq Azərbaycanı "toponim müharibəsində" suçlayan bu ünsür indi də rəsmi Bakıya başqa bir iftira atır.
Xəstə təfəkkürlü Voskanyan iddia edir ki, İsrailin İran konsulluğunun Dəməşqdəki binasına hücumu guya rəsmi Bakının Netanyahu hökuməti ilə İrana qarşı "sövdələşməsi kimi görünür".
"Rəsmi Bakının İranın diplomatik missiyasına hücumu pisləməməsi onun anti-İran mahiyyətini bir daha nümayiş etdirməsi hesab edilir", - Voskanyan iddia edib.
Bu qədər iftira olar? Bunu ancaq Voskanyan kimi düzənbazlar, faşist düşüncəli xəstə ünsürlər uydura bilər. Əlbəttə, bütün bunların arxasında Azərbaycanı ləkələmək dayanır ki, bunu da nə Voskanyan, nə də onun kimi xəstələr bacara bilər. Azərbaycan müstəqil siyasət aparan dövlətdir və bütün ölkələrlə də əməkdaşlıqda maraqlıdır. Azərbaycan terror dövləti deyil, sülhsevər, humanist, sabitliyin və nizam-intizamın tərəfarıdır, Cənubi Qafqazda sülhün təmiantçısı kimi çıxış edir.
Voskanyanın da, onun dediyi kimi, İranın da Azərbaycanı bu məsələdə ittiham etməsi tamamilə əsassızdır. Bölgədə terror dövləti kimi Ermənistan tanınır və dünyada da ermənilərin törətdikləri terror aktları barədə qalaq-qalaq informasiyalar mövcuddur.
"Bu absurddur, ağ yalandır, açıq-aydın iftiradır, böhtandır"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli "Bakı-Xəbər"ə şərhində "Ümumiyyətlə, son günlər həm İran, həm də Ermənistan tərəfindən Azərbaycana qarşı əsassız ittihamların irəli sürüldüyünü, böhtanlar atıldığını müşahidə edirik. Ermənistan və İranın istər dövlət, istərsə də özlərini "alim" adlandıranları səviyyəsində Azərbaycana iftira atmasını, əsassız ittihamlar səsləndirməsini hər zaman görürük. Çünki Azərbaycan faktoru həm İran, həm də Ermənistan adlanan dövlətlər üçün çox ciddi bir təhddidir. Bu baxımından, sözdə İranşünas Voskanyanın bu məsələdə Azərbaycanın adını hallandırmaq və əsassız ittiham etmək cəhdləri uğursuzdur. Əslində, Voskanyandan və onun kimilərindən bu cür iftiralar hər zaman gözləniləndir. Azərbaycanın bölgədə güclənməsi, nüfuzunun ciddi şəkildə artması Ermənistandakı və İrandakı bir çox qüvvələri ciddi narahat edir. Eləcə də qardaş Türkiyə ilə Azərbaycanın bütün dünyada günü-gündən artan nüfuzuna ziyan vurmaq məqsədi güdürlər. Voskanyan ona görə İranın müdafiəçisi kimi çıxış edir ki, Ermənistanın taleyinin müəyyən mənada İranla bağlı olduğunu düşünür. İranın zəifləməsi Ermənistana daha ciddi bir zərbə olacaq. Əslində, İran da buna doğru gedir. Rəsmi Bakı həmişə qonşu dövlətlərə münasibətdə balanslı siyasət yürüdüb. Şübhəsiz ki, Türkiyə ilə münasibətlərimiz tamamilə fərqli bir səviyyədədir. Söhbət Ermənistandan və İrandan gedirsə, onlar tarixə baxanda Azərbaycanın haqlı olduğunu görürlər. Bu çərçivədə İranı və Ermənistanı qorumaq üçün belə böhtanlar atır. Voskanyan tamamilə əsassız olaraq iddia edir ki, İranın Dəməşqdəki konsulluğuna hücumda rəsmi Bakı İsraillə müəyyən "sövdələşmə nəticəsində" hansısa rol oynayıb. Bu absurddur, ağ yalandır, açıq-aydın iftiradır, böhtandır. Azərbaycanın buna ehtiyacı yoxdur. Azərbaycan dövlətinin gücü zatən onun özündədir. Bu başqa məsələdir ki, Güney Azərbaycanda milyonlarla Azərbaycan türkü yaşayır, onlar da Azərbaycan Respublikasına, Quzey Azərbaycana sevgi bəsləyirlər. İran adlanan ölkədə yaşayan türklərin böyük əksəriyyətinin sevgisi, məhəbbəti, ehtimadı rəsmi Tehrandan çox, rəsmi Bakıyadır, Quzey Azərbaycanadır"-deyə bildirdi.
F.Ələkbərli qeyd etdi ki, tarixə baxanda da biz Təbrizli və Bakılı, Xoylu və Şəkili, Urmulu və Naxçıvanlı, Gəncəli və Ərdəbilliyik. "Bunu İrəvan Dövlət Universitetində işləyən Voskanyan da, Tehran Dövlət Universitetində çalışan farslar, irançılar da yaxşı bilir. Voskyanın iddiasının kökündə dayanan məqsədlər bəllidir, amma o və onun kimiləri bu cür əsassız ittihamlarla Azərbaycan dövlətinin nüfuzuna xələl gətirə bilməz. Onlar heç İran adlı ölkədə yaşayan Azərbaycan türklərinin, Azərbaycan müsəlmanlarının Azərbaycana bəslədikləri sevgini də azalda bilməzlər. Heç nə dəyişməyəcək. Voskanyan kimiləri barbarlıq axtarırlarsa uzağa getməsin, rəsmi İrəvanı və rəsmi Tehranı görsün, bu kifayətdir. Həm Ermənistan, həm də İran Azərbaycan türklərinin tarixi mədəniyyətini necə məhv ediblər, nə qədər birgə terror aktları təşkil ediblər, bunu yaxşı bilirik. Onların bütün birgə terror əməllərindən xəbərimiz var, türklərə qarşı saysız terror hərəkətləri gerçəkləşdiriblər. Onlar öz əməllərini bizim boynumuza yıxmağa cəhd göstərməklə heç nəyə nail ola bilməzlər. Hər şey ortadadır. Azərbaycanın mövqeyi bəllidir. Bizi obyektiv və ədalətli yoldan heç kəs döndərə bilməz, bizə qarşı olan tarixi ədalətsizlikləri yenidən bərpa edəcəyik. Bu cür böhtanlar heç bir halda qarşımızı kəsə bilməz"-deyə F.Ələkbərli vurğuladı.
İradə SARIYEVA
