Xəyal Bəşirov: "Fransanın Cənubi Qafqazla bağlı yürütdüyü siyasət də, haqlı olaraq, müxtəlif dövlətlər və onların rəsmiləri tərəfindən tənqid edilir"
Afrika və Asiyanın müsəlman ölkələrində öz mövqeyini itirən Fransa Cənubi Qafqazda mövqe qazanmaq istəyir. Öz məkrli niyyətlərini və müstəmləkəçilik siyasətini isə Ermənistan vasitəsilə həyata keçirmək niyyətini gizlətmir, bunu açıq şəkildə ortaya qoyur.
Fransanın müstəmləkəçilik siyasəti bütün dünya üçün böyük təhlükə sayılmalıdır. Artıq Avropada müəyyən dövlətlər bunu açıq şəkildə sezir və Makron hökumətinin siyasətini tənqid edir.
Fransanın Qafqaz siyasəti artıq dünya miqyasında da etiraz doğurmağa başlayıb.
Qərbin, xüsusilə Fransanın Cənubi Qafqaza dair tutduğu birtərəfli mövqe Avropanın özündə də tənqid edilir. İtaliyanın xarici işlər və beynəlxalq əməkdaşlıq nazirinin müavini Edmondo Çiriellinin Fransanın xarici işlər naziri Stefan Sejurnenin Azərbaycan-Ermənistan münasibətlərinin normallaşması ilə bağlı bəyanatlarını tənqid etməsi ("Fransa Cənubi Qafqazda sülhün bərqərar olması səylərini pozmamalıdır") buna nümunədir.
Göründüyü kimi, İtaliya XİN Fransanın Qafqaz siyasətini tənqid edib.
"Çiriellinin Fransanın yenicə vəzifəyə təyin edilmiş xarici işlər naziri Stefan Sejurnenin mövqeyini pisləməsi, təbii ki, onların haqlı tərəfdə olmasından xəbər verir"
Siyasi Hüquq və Araşdırmalar Mərkəzinin rəhbəri Xəyal Bəşirov "Bakı-Xəbər"ə "Fransanın beynəlxalq aləmdə yürütdüyü siyasət tənqid atəşinə tutulur. Makronun həm daxili, həm də xarici siyasəti ciddi uğursuzluğa düçar olub. Təbii ki, Fransanın Cənubi Qafqazla bağlı yürütdüyü siyasət də, haqlı olaraq müxtəlif dövlətlər və onların rəsmiləri tərəfindən tənqid edilir. O cümlədən də İtaliyanın xarici işlər və beynəlxalq əməkdaşlıq nazirinin müavini Edmondo Çirielli Fransanın Cənubi Qafqaz siyasətini tənqid edib. Bu nədən qaynaqlanır? Azərbaycan Cənubi Qafqazda bir reallıq formalaşdırıb və reallığı qəbul etməyənlərlə yanaşı çoxlu sayda qəbul edənlər də var. Yəni söhbət burda Azərbaycanın formalaşdırdığı bu reallıqları, sülh təşəbbüslərini yalnız qəbul etməyənlərdən getmir, Azərbaycanın bu mövqeyinə dəstək nümayiş etdirən çoxlu sayda dövlətlər, təşkilatlar var. Azərbaycanın bu haqlı mövqeyinə dəstək nümayiş etdirən, onu qəbul edən tərəflər mövcuddur. Amma çox təəssüf ki, Fransa kimi bu proseslə heç cür barışmaq istəməyən, bunu qəbul etməyən tərəflər də var. Onların da mövqeyi qərəzlilik, ədalətsizlik baxımından açıq şəkildə görünməkdədir. İtaliya təkcə indi deyil, bundan əvvəl də Azərbaycanla bağlı haqlı mövqe ortaya qoyub. Məsələn, mina xəritələri ilə bağlı İtaliya parlament səviyyəsində qərar qəbul etdi ki, dünya dövlətləri bu məsələdə beynəlxalq hüquq çərçivəsində Ermənistana təziyiq göstərməlidirlər ki, Ermənistan insanlıq, bəşəriyyət üçün təhlükəli olduğu, hər gün insan həyatına ziyan vurduğu üçün o real mina xəritələrini Azərbaycana versin. Bunu parlament səviyyəsində qəbul edən İtaliya dövləti özünün rəsmi haqlı mövqeyini ortaya qoymuş oldu. Eyni zamanda nəzərə almaq lazımdır ki, İtaliya NATO-nun, Avropa İttifaqının üzvüdür, Avropa siyasətinin formalaşmasında həlledici rola sahib olan dövlətdir. İtaliyanın bu gün dünyada, o cümlədən də Avropada, ətraf regionlarda baş verən proseslərə heç də Fransadan az təsiri yoxdur. İtaliya rəsmisi Çiriellinin Fransanın yenicə vəzifəyə təyin edilmiş xarici işlər naziri Stefan Sejurnenin mövqeyini pisləməsi, təbii ki, onların haqlı tərəfdə olmasından xəbər verir"-deyə bildirdi.
X.Bəşirov qeyd etdi ki, burda söhbət bizim istəyimizə, Azərbaycanın maraqlarına uyğun davranışdan deyil, Cənubi Qafqazda sülhün, sabitliyin və təhlükəsizliyin tərəfində dayanmaqdan, ondan yana olmaqdan gedir. "Biz qeyd edirik ki, Azərbaycan Cənubi Qafqazın heç vaxt bu qədər yaxın olmadığı sülhü yaxınlaşdırıb, Cənubi Qafqazda Azərbaycanla Ermənistan arasında münasibətlər heç vaxt bu qədər normal və sülhə yaxın olmayıb. Amma çox təəssüflər olsun ki, bizim hördüyümüz bu sülh divarını, bu sülh abidəsini Fransa kimi dövlətlər sökməyə cəhd göstərirlər. Buna qarşı öz mövqeyini ortaya qoyan dövlətlər də var. Təbii ki, bu da bir reallıqdır. Düşünürəm ki, əslində, bu gün Azərbaycanın haqlı mövqeyi tərəfindən çıxış edən və Cənubi Qafqazdakı reallığı olduğu kimi qəbul edib bunu dəstəkləyən dövlətlərdən biri də məhz İtaliyadır. Fikrimcə, bu, gələcəkdə həm Avropa İttifaqı, həm Avropa Şurası Parlament Assambleyası, həm ümumilikdə Avropa regionunda olan dövlətlərlə bağlı bizim mövqeyimzin dəstəklənməsinə ciddi müsbət təsir göstərəcək. Təbii ki, biz digər dövlətlərdən də bu mövqeyi gözləyirik. Söhbət Azərbaycan dövlətinin və Azərbaycan xalqının maraqlarından deyil, regionun bütün dövlətlərinin və xalqlarının, o cümlədən də Ermənistanın özünün də maraqlarına cavab verən reallıqlardan gedir ki, Azərbaycan bundan yanadır, digər dövlətləri də bu prizmadan çıxış etməyə, prosesə bu baxış bucağından yanaşmağa dəvət edir"- deyə X.Bəşirov vurğuladı.
İradə SARIYEVA
