İbrahim Rüstəmli: "Bu mənada "öldürməyən silahlar", əlbəttə, Avropanın və bir sıra Qərb dövlətlərinin Cənubi Qafqazda oynadığı şoudur"
Aİ Ermənistana "atəş açmayan" silahlar verəcək. Avropa İttifaqı (Aİ) öldürücü olmayan silahlarla Ermənistan Silahlı Qüvvələrinə dəstək vermək niyyətindədir.
Azadlıq radiosunun yaydığı məlumata görə, bu barədə Aİ-nin səfiri Vasilis Maraqos aprelin 4-də Milli Assambleyada "Ermənistanın Avropaya inteqrasiyası üçün yeni perspektivlər və çağırışlar" adlı dinləmələrdə bildirib.
Bu nə yeni uydurmadır, "öldürməyən silah" olur?
"Aİ-nin də, Qərb dövlətlərinin də Ermənistanı silahlandırması, bununla da onu Azərbaycana qarşı tətikləməsi prosesi fiaskoya uğrayacaq"
Hərbi ekspert İbrahim Rüstəmli "Bakı-Xəbər"ə şərhində bildirdi ki, bu gün Cənubi Qafqazda maraqları toqquşan dövlətlərin çox ciddi rəqabəti prosesi gedir. "Bu rəqabətdə əsas fon Rusiya-Ukrayna müharibəsidir. Yəni Rusiyanın Ukrayna ilə bağlı yaşadığı ciddi problemlər, prakik olaraq dünyaya qarşı müharibə aparması Cənubi Qafqazda "zəif yerlərin" axtarılması məsələsini gündəmə gətirib. Bu mənada Ermənistan, təbii ki, daim gah Rusiyanın, gah İranın, gah Fransanın, gah ABŞ-ın qucağında oturan marionet bir dövlət kimi zəif nöqtə xarakteri daşıyır. Bu zəif nöqtədən də onların Cənubi Qafqaza sızması üçün, fikrimcə, hazırkı vəziyyətdə çox münbit şərait yaranıb. Bilirsiz ki, Aİ-dən əvvəl Aİ-də ciddi söz sahibi olan Fransa kimi bir dövlət bizim antiterror əməliyyatlarımızdan bir müddət öncə Azərbaycan ərazilərinə, yəni Xankəndi şəhərinə 500 nəfərdən ibarət xüsusi kəşfiyyat qrupu göndərməyə çalışırdı. Bu 500 nəfərlik qrupun missiyası guya sülhü dəstəkləmək əməliyyatlarında iştirak etmək idi. Ancaq əslində, demək olar ki, onların mütləq əksəriyyəti Fransanın xüsusi xidmət orqanlarında, eyni zamanda xüsusi təyinatlılarında xidmət etmiş zabitlər, bir sözlə, peşəkar kəşfiyyatçılar idi. İndi də bilirsiz ki, Aİ-nin Ermənistanda xüsusi bir missiyası fəaliyyət göstərir. Bu missiyanın da əsas məqsədi kəşfiyyat işləri aparmaq, bölgədəki geosiyasi vəziyyəti dərindən öyrənmək, Avropanın, eyni zamanda həm də Qərbin Cənubi Qafqaza sızması üçün münbit şərait yaratmaqdan ibarətdir"-deyə İ.Rüstəmli qeyd etdi.
İ.Rüstəmlinin sözlərinə görə, bir müddət əvvəl ABŞ-ın Ermənistanla birgə hərbi təlimlər keçməsi, bundan sonra Fransanın bir zamanlar Ukraynanın imtina etdiyi köhnə modifkasiyalı silahları Ermənistana verməsi və sair bütün bunlar hamısı Ermənistanı silahlandırmaq məqsədi daşıyır. "Ermənistanın silahlandırılması, təbii ki, Azərbaycanda sakit qarşılana bilməz. Əgər kimsə sənin düşmənini silahlandırırsa, deməli onu sənə qarşı döyüşə hazırlayır. Bu mənada Azərbaycanın tam zamanında antiterror əməliyyatını həyata keçirməsi və Aİ adı altında Fransanın xüsusi təyinatlılarının, 500 nəfərlik heyətin Xankəndiyə gəlməsinin qarşısını alması, eyni zamanda bu xüsusda Ermənistanın silahlandırılması ilə bağlı son addımlara siyasi qiymət verilməsi və sair Azərbaycanın necə müstəqil dövlət olmasından, müstəqil siyasət yürütməsindən xəbər verir.
Əlbəttə, indi Cənubi Qafqazda çox ciddi mövqe savaşları gedir. Mövqe savaşlarında da əsas məqsəd Cənubi Qafqaza sızmaq və bununla da ilk növbədə Ermənistanı ən yaxın müttəfiqi sayılan Rusiyanın əlindən almaq, ikincisi, Rusiyanın sərhədlərinə yaxınlaşmaq, üçüncü, Rusiyanın sərhədlərinə yaxınlaşmaqla dolayısı ilə Rusiyanın özünə yaxınlaşmaq və ona qarşı informasiya savaşından tutmuş hərbi əməliyyatlara qədər müyyən proseslərin həyata keçirilməsini təmin etməkdir. Yəni bu mənada "öldürməyən silahlar", əlbəttə, Avropanın və bir sıra Qərb dövlətlərinin Cənubi Qafqazda oynadığı şoudur. Bizim üçün hər şey gün kimi aydındır. Sözsüz ki, Azərbaycan da 30-dan çox dövlətlə bu və digər şəkildə bir, iki, üçtərəfli formatda hərbi əlaqələr qurub və bu ölkələrin böyük əksəriyyəti çox inkişaf etmiş, müasir orduya sahib dövlətlərdir. Azərbaycan, təbii ki, bu fürsətdən də lazımınca yararlanacaq. Xüsusilə də özünün birinci müttəfiqi olan Türkiyə ilə əlaqələrində biz bunu çox ciddi şəkildə görürük. Yəni Azərbaycan da öz yerində dayanmır, bütün bunlara alternativ, qabaqlayıcı tədbirlərin həyata keçirilməsi üçün əlindən gələni edir. Mənə elə gəlir ki, Aİ-nin də, Qərb dövlətlərinin də Ermənistanı silahlandırması, bununla da onu Azərbaycana qarşı tətikləməsi prosesi fiaskoya uğrayacaq. Azərbaycan lazım gəldiyi anda öz hərbi qüdrətini göstərə biləcək. Çünki Azərbaycanın da bu günlərdə gördüyü çox işlər, atdığı çox mühüm addımlar var. Xüsusilə də ordu quruculuğu sahəsində, ordu cəbbəxanasının döyüş imkanının artırılması, müdafiə qüdrətinin gücləndirilməsi istiqmətində və sair.
Əlbəttə, bu daim siyasi müstəvidə şou yaradan, xüsusilə Fransa kimi bir dövlətin Afrika ölkələrindən və başqa yerlərdən əli çıxıb indi öz mövqeyini Cənubi Qafqazda möhkəmləndirmək və itirdiklərini Cənubi Qafqazın ərazilərindəki fəaliyyəti ilə kompensasiya etmək cəhdidir. Azərbaycan buna çox sərt qarşılıq verəcək.
Bilirsiz ki, bir neçə gün əvvəl Naxçıvan istiqamətində atəşkəs pozulub, sönmüş ocağı yavaş-yavaş yenidən yandırmağa, Cənubi Qafqazda növbəti dəfə bir münaqişə ocağı yaratmağa cəhd göstərirlər"-deyə qeyd edən İ.Rüstəmli bir daha vurğuladı ki, burada da əsas məqsəd Cənubi Qafqazda öz mövqelərini möhkəmləndirmək məqsədi daşıyır. İ.Rüstəmli əlavə etdi ki, Azərbaycan müstəqil dövlətdir və öz ərazi bütövlüyün bərpa etmiş dövlətdir, öz ərazi çərçivəsində Qarabağ adlı probelm görmür, amma bu istiqamətdə yaranan problemin həllində də başqa dövlətlərin dəstəyinə ehtiyac duymur, üçüncü dövlətlərə ehtiyac görmür. İ.Rüstəmlinin fikrincə, bu mənada Azərbaycanın öz ordusunun döyüş qabiliyyətini, müdafiə qüdrətini artırması gələcəkdə baş verə biləcək hər hansı bir lokal və total hərbi toqquşmaya əsaslı cavab vermək üçün kifayət qədər ciddi zəmin yaradır.
İradə SARIYEVA
