Rəsul Cahangirli: "Ermənistanda belə böyük qızıl ehtiyatı olmayıb"
Ermənistanda ABŞ dollarının dəyərinin düşməsi müşahidə edilir. İqtisadçı Suren Parsyan erməni mediasına verdiyi açıqlamada bunun daxili amillərlə bağlı olduğunu qeyd edib.
Maraqlıdır ki, iqtisadçı Ermənistan dramının dəyərinin artmasının bir səbəbi kimi qızılın ixracını göstərib. S.Parsyan deyib ki, yalnız fevral ayında qızıl ixracı 2,5 dəfə artıb. Bu isə olduqca yüksək göstəricidir. O deyib ki, ümumiyyətlə son 4 ayda Ermənistandan 3 milyard dollarlıq qızıl ixrac edilib. Özü də bu ixrac əsasən ərəb ölkələrinə yönəlib: "Təkcə fevral ayında ixracımız 2,5 dəfə artıb, bu, astronomik rəqəmdir. Son dörd ayın məlumatlarını da nəzərə alsaq, Ermənistandan təxminən üç milyard dollarlıq qızıl ixrac edildiyini deyə bilərik. Bu da dollarla müəyyən nağd pul axınını təmin edir".
Bütün bu rəqəmlər real görünmür. Ən azından ona görə ki, 4 ayda qızıldan 3 milyard dollar əldə edilməsi Ermənistanın ildə 12 milyard dollar qazanması deməkdir. Bu da Ermənistan kimi kiçik ölkə üçün çox böyük rəqəmdir. Əgər bu rəqəm həqiqətdirsə, o zaman Ermənistan bu qədər qızılı haradan alıb?
"Rusiya bu ölkə vasitəsilə qızıl məmulatlarını ərəb ölkələrinə ixrac edir"
Sözügedən məsələyə aydınlıq gətirən ekspert Rəsul Cahangirli "Bakı-Xəbər"ə açıqlamasında qeyd etdi ki, deyilənlər reallıqla uzlaşmır: "Məsələ ondadır ki, Ermənistanda qızıl hasil olunur. Əsasən Kəlbəcərlə sərhəddə yerləşən Zod mədənində qızıl hasil olunur. Ancaq orada ehtiyat elə də çox deyil. Mədənin Azərbaycan ərazisinə düşən hissəsində hasilat daha böyükdür. Ancaq məsələ ondadır ki, 30 ilə yaxın işğal altında olan Kəlbəcər və Zəngilan rayonlarının qızıl yataqları vəhşicəsinə talan edilib. Ermənistanda belə böyük qızıl ehtiyatı olmayıb. İxracın artması reeksport siyasəti ilə bağlıdır. Məsələ ondadır ki, sanksiyalar səbəbindən Rusiya qızıl və zərgərlik məmulatlarını birbaşa ixrac edə bilmir. Ermənistan sanksiyaların yayınmasında bilavasitə Rusiyaya kömək edir. Belə ki, Rusiya Ermənistan vasitəsilə qızıl məmulatlarını ərəb ölkələrinə ixrac edir. Əsasən də Birləşmiş Ərəb Əmirliyi Rusiya qızılının idxalatçısı rolunda çıxış edir. Ona görə də Ermənistanın ixrac rəqəmləri belə böyükdür. Bu isə o deməkdir ki, ixracdan əldə edilən vəsait tamamilə Ermənistana qalmır. Çünki ölkənin özündə bu qədər qızıl hasil olunmur".
Vidadi ORDAHALLI
