Vüqar Rəhimzadə: "Region ölkələri olan Gürcüstan və İranın prosesləri susqunluqla izləməsi təəssüf doğurur"
Xəbər verildiyi kimi, ABŞ dövlət katibi Entoni Blinken Prezident İlham Əliyevə zəng edib. Blinken aprelin 5-də ABŞ, Avropa İttifaqı və Ermənistan arasında keçiriləcək üçtərəfli görüşün Azərbaycan tərəfdə narahatlıq doğurduğuna dair xəbərlər aldığını və bu xüsusda Prezident Əliyevlə danışaraq məsələyə aydınlıq gətirilməsini vacib hesab etdiyini deyib.
Azərbaycan 44 günlük Vətən müharibəsindən sonra regionda yeni reallıq və status-kvo yaradıb. Qərb və Ermənistanın havadarları bununla barışmaq istəmir. Gürcüstan da bu məsələlərlə bağlı öz mövqeyini bəlli etməli, Azərbaycanla birlikdə olmalıdır. Təəssüf ki, bu ölkənin hakimiyyəti qərbpərəst siyasət yürüdür. Ancaq başa düşmür ki, bu onun üçün problem vəd edir. Maraqlıdır, Gürcüstan daxilində nə baş verir? Niyə onlar anlamırlar ki, regiondakı məsələlərə münasibətdə Azərbaycanın yanında durmalıdılar, Qərbin yox? Eləcə də bu, həm də İrana aid olan məsələdir. Tehran hələ də susur. Nə əcəb görmürlər ki, Ermənistanda Qərbin hərbi infrastrukturlarının yaradılması prosesi gedir? Bundan narahat olmaq və buna öz etirazlarını bildirmək əvəzinə, gözləmə mövqeyi tutur və yaxud da yumşaq reaksiya verir.
"Bütün bu geosiyasi oyunların nə ilə nəticələndiyini ən azından Tiflis görə bilməlidir"
Sözügedən məsələni "Bakı-Xəbər"ə şərh edən "İki sahil" qəzetinin baş redaktoru Vüqar Rəhimzadənin fikrincə, region ölkələri olan Gürcüstan və İranın prosesləri susqunluqla izləməsi təəssüf doğurur: "Çünki bu siyasi oyunlar təkcə Azərbaycanın mənafeyinə toxunmur, həm də region dövləti olan Gürcüstan və İranın maraqlarına toxunur. Çox təəssüf ki, bu ölkələr susqun vəziyyətdədilər. Halbuki, bütün bunlar bu və ya digər dərəcədə region ölkələrinin maraqlarına qarşı yönəlib. Məgər Gürcüstan görmür ki, Qərbin siyasəti üzündən Ukrayna kimi böyük ölkə necə viran edilir? Bütün bu geosiyasi oyunların nə ilə nəticələndiyini ən azından Tiflis görə bilməlidir. Çünki uzun illərdir Gürcüstan separatizmdən əziyyət çəkir. Unutmaq olmaz ki, 2008-ci ilin avqust müharibəsinin baiskarı Qərbdir. Ovaxtkı Saakaşvili hakimiyyətini bu və digər formada qoruyacaqlarına əmin etdilər. Müharibə başlayandan sonra isə verdikləri vədi yerinə yetirmədilər. Yüzlərlə insan həyatını itirdi, yaşayış məntəqələri ciddi dağıntıya məruz qaldı. Üstəlik, Rusiya birtərəfli qaydada separatçı bölgələrin "müstəqilliyini" tanıdı. Bütün hallarda 5 aprel görüşü xoşməramlı görüş deyil. Region dövlətlərinin maraq və mənafelərinə, bölgədəki sabitliyə zərər vuran bir platformadır. Belə bir məqamda Gürcüstanın bunun doğru anlamaması və konkret mövqe ortaya qoymaması, Azərbaycanın yanında yer almaması təəssüf doğurur. Ən azından ona görə ki, Gürcüstanın ən çətin vaxtlarında Azərbaycan bu ölkənin yanında olub. Digər tərəfdən, İran zaman-zaman bəyan edib ki, bölgədəki problemləri region dövlətləri həll etməlidir. O zaman sual yaranır, Fransa region dövlətidir? Niyə İran Qərbin Ermənistanda hərbi infrastrukturunun hər keçən gün genişlənməsinə susqun yanaşır?".
Vidadi ORDAHALLI
