Tural İsmayılov: "Bu gün Qərbin Ermənistan ərazisində oynadığı təhlükəli planlar var"
Aprelin 5-də Avropa İttifaqı (Aİ), ABŞ və Ermənistan arasında Brüsseldə görüş olacaq. Azərbaycanın bu görüşün təxirə salınmalı olduğu barədə çağırışlarına baxmayaraq, onlar bu görüşü keçirməkdə israrlı olduqlarını göstərirlər.
Bildirək ki, hələ martın 27-də Azərbaycan XİN Aİ və ABŞ-ın Ermənistana dəstəyinin mümkün təhlükələri barədə xəbərdarlıq edib. XİN-in bəyanatında bildirilirdi ki, Azərbaycan tərəfi dəfələrlə Avropa İttifaqının, xüsusilə də onun bəzi üzv dövlətlərinin regionumuza münasibətdə müəyyən yanaşmaları və fəaliyyətləri ilə bağlı öz mövqeyini açıq şəkildə ifadə edib.
27 mart bəyantında qeyd edilirdi ki, Avropa İttifaqı və ABŞ tərəfindən bu kimi fəaliyyətlər açıq şəkildə birtərəfli və qərəzli xarakter daşıyır və ikili standart yanaşmasına əsaslanır:"Sözügedən konfrans tam şəffaf şəkildə keçirilmir, regional inklüzivlikdən məhrumdur və regionda təşviq edilən və çox ehtiyac duyulan etimad quruculuğuna və inteqrasiyaya ziddir. Bu konfrans, erməni tərəfini xoş niyyətlə danışıqlara sövq etmək əvəzinə, regionda yeni bölücü xətlər və "təsir dairələri" yaradır.
Ermənistandakı revanşist əhval-ruhiyyə fonunda Vaşinqton və Brüssel tərəfindən bu kimi açıq ermənipərəst ictimai təzahür Ermənistanın Azərbaycana qarşı yenidən mümkün təxribatlarında Aİ və ABŞ-nin Ermənistanı dəstəkləyəcəyinə dair bu ölkədə təhlükəli illüziya yarada bilər. Bu halda, Aİ və ABŞ Ermənistanın sabitliyi pozan hər hansı mümkün hərəkətinə görə məsuliyyəti bölüşəcəklər.
Beynəlxalq hüququn əsas norma və prinsipləri əsasında davamlı sülhə, sabitliyə və təhlükəsizliyə nail olmaq üçün unikal imkan yarandığı bir zamanda, biz bir daha bütün tərəfləri sülh səylərinə əks təsir göstərən və regionda yeni eskalasiya və gərginlik dalğalarına səbəb ola biləcək addımlardan çəkinməyə çağırırıq".
Aprelin 3-də isə ABŞ-ın dövlət katibi Blinken İlham Əliyevə zəng vurub. Prezident İlham Əliyevin qənaətinə görə, aprelin 5-də keçirilməsi planlaşdırılan ABŞ, Avropa İttifaqı və Ermənistan üçtərəfli görüşünün qeyri-şəffaf hazırlanması, qeyri-inklüziv xarakter daşıması və Azərbaycanın haqlı iradlarına baxmayaraq təxirə salınmaması Cənubi Qafqazda sülhə, əməkdaşlığa deyil, ayrıcı xətlərin və nəticə etibarilə, gərginliyin yaranmasına gətirib çıxaracaq.
Azərbaycan tərəf israr edir ki, 5 aprel görüşü təxirə salınsın, çünki bu görüş qeyri-şəffafdır, inklüziv xarakter daşıyır və bu baxımdan onun təxirə salınması vacibdir. Azərbaycan Prezidenti o görüşün təxirə salınmaması nəticəsində Cənubi Qafqazda baş verə biləcək gərginliyi də istisna etməyib, vurğulayıb ki, bu, gərginliyə gətirib çıxaracaq.
Azərbaycan tərəfi 5 aprel görüşünün təxirə salınmasında israr etsə də, Qərb onu təxirə salmaq istəmir.
Qərbin bu görüşü təxirə salmaması nə ilə bağlıdır? Qərb niyə o görüşü təxirə salmaq istəmir, səbəb nədir?
"Qərb Ukrayna ssenarisinin təkrarını Ermənistan ərazində gerçəkləşdirmək niyyətindədir ki..."
Politoloq Tural İsmayılov "Bakı-Xəbər"ə şərhində "Faktiki olaraq, bu gün Qərbin Ermənistan ərazisində oynadığı təhlükəli planlar var. Bu təhlükəli planlar bir neçə məqsədə xidmət edir. Əvvəla, Qərb imperializmi Ermənistan ərazilərindən istifadə edərək Cənubi Qafqaza soxulmaq və Cənubi Qafqaz vasitəsilə Rusiya əlehinə yeni bir platsdarm yaratmaq istəyir. İkincisi, bu gün Qərb Ukrayna ssenarisinin təkrarını Ermənistan ərazində gerçəkləşdirmək niyyətindədir ki, bu da Ermənistan üçün təhlükəli tendensiyalar yaradır, vəziyyətin bundan sonra daha da pisləşməsinə səbəb ola bilir"-deyə bildirdi.
T.İsmayılovun sözlərinə görə, bütövlükdə isə bu, Qərbin neoimperialist şəbəkələrinin Azərbaycanın iştirakı olmadan Ermənistanla hansısa görüşlər keçirməyi Qərbin bölgə ilə bağlı məqsədli məkrli planlarının növbəti göstəricilərindən biridir. "Daha əvvəl Qranadada Azərbaycanın iştirakı olmadan görüş keçirməyə cəhd etdilər. İndi isə yenə Brüsseldə Azərbaycanın iştirakı olmadan belə bir görüş həyata keçirirlər. Şübhəsiz ki, Ermənistan ərazilərində Aİ-nin mülki missiyası adı altında təxribat maşınının mövcudluğu, bu gün Qərbin Ermənistana müxtəlif vədlər verərək onu aldatmağı və bölgədən sıxışdırmağa çalışması, bu kimi amillər ortada olan bir vəziyyətdir. Amma ABŞ-ın və Fransanın Azərbaycana qarşı yönələn siyasətlərinə rəğmən bütövlükdə Aİ-nin digər ölkələri ilə kollektiv Qərblə Azərbaycanın kifayət qədər yaxşı və uğurlu əlaqələri mövcuddur"-deyə T.İsmayılov vurğuladı. 5 aprel görüşünü Qərbin hansı səbəbdən təxirə salmaq istəmədiyi məsələsinə gəlincə, T.İsmayılov "Qərbin Ermənistanla bağlı məqsədləri var, bu səbəbdən də görüşü təxirə salmaqdan imtina etdilər. Məqsədləri, planları olduğu üçün bundan imtina etmədilər"-deyə bildirdi.
İradə SARIYEVA
