Bəhruz Quliyev: "Bu bizi qorxutmur, amma biz yeni bir münaqişə ocağının yaranmasını da istəmirik"
Ermənistanın hakim "Vətəndaş Müqaviləsi" Partiyasından deputat Qaqik Melkonyan bildirib ki, Azərbaycan və Rusiya eyni cəbhədə hərəkət edirlər: "Onlar sadəcə olaraq aprelin 5-nə planlaşdırılan Paşinyan-Blinken-Ursula fon der Lyayen üçtərəfli görüşündən narahatdırlar. Bilmirəm niyə onlar və rusiyalılar bundan belə narahatdırlar? Rusiya daim bəyanatlar verir ki, Avropa İttifaqı (Aİ) müdaxilə edəndə burada sabitlik pozulur. Azərbaycan isə Rusiya Federasiyasının sözlərini təkrarlayır. Onlar bir cəbhədə hərəkət edirlər və qorxuları var, bilmirəm niyə".
Azərbaycan necə Rusiya ilə eyni cəbhədə hərəkət edir ki, Bakı Qarabağdakı sülhməramlılara status verilməsinə imkan vermədi. Necə Rusiya ilə eyni hərəkət edir ki, MDB ölkələrindən Ukraynaya humanitar yardım edən yeganə ölkə Azərbaycandır. Belə olan halda Azərbaycanın Rusiya ilə eyni mövqedən çıxış etdiyini iddia etmək nə dərəcədə məntiqlidir?
"Rusiya ilə bəzi məqamlarda ölkəmizin fikirlərinin üst-üstə düşməsi birgə fəaliyyət demək deyil"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyevin fikrincə, deyilənlərin heç bir əsası yoxdur: "Ermənistanda bəzi siyasilər fərqli proqnozlar verirlər. Onların dediklərinə görə, guya Azərbaycan Ermənistanın Brüsseldə keçirəcəyi üçtərəfli görüşdən narahatdır, hərbi münaqişə olacağından qorxuruq və s. Ermənistan tərəfindən bu cür fikir səsləndirən ekspert rəyləri olduqca çoxdur. Lakin qəbul olunmalıdır ki, ABŞ, Avropa İttifaqı və Ermənistanın üçtərəfli razılaşma ilə Cənubi Qafqaz əleyhinə qəbul etdiyi qərar bu regionda sabitliyin pozulmasına zəmin yaradan addım olacaq. Bu bizi qorxutmur, amma biz yeni bir münaqişə ocağının yaranmasını da istəmirik. Çünki illər sonra Azərbaycan öz hüquqlarını müdafiə edib, BMT-nin dörd qətnaməsinin yerinə yetirilməsinə nail olub və biz sülh istəyirik. Birmənalı şəkildə sülhə təhdid yaradacaq addımlardan geri dönmək lazımdır. Bu Ermənistan üçün də yaxşı nəticələnməyəcək. Həqiqətən də, Azərbaycan əleyhinə Cənubi Qafqazda qızışdırıcı addımlar atılarsa, bundan zərərçəkən hər üç tərəf olacaq. Rusiya ilə bəzi məqamlarda ölkəmizin fikirlərinin üst-üstə düşməsi birgə fəaliyyət demək deyil. Bəzi məqamlarda regionda Rusiya faktorunu nəzərə alırıq, bu belə də olmalıdır. Əks təqdirdə bu, diplomatiyadan uzaq bir hərəkət olar. Çünki Cənubi Qafqazda qonşu kimi Rusiya da söz sahibidir, bütün dünya bunu belə də qəbul edir. Bu gün danışılanların hər biri də Rusiyanın Cənubi Qafqazda imkanlarının zəiflədilməsinə yönəldilib. Bu, Qərbin qurduğu oyun və yeni münaqişə ocağı yaratmaq cəhdidir. Amma biz imkan vermirik ki, Cənubi Qafqaz başqa regionlar kimi münaqişə ocağına çevrilsin. Ermənistan isə bunu öz gələcək perespektivi üçün dərk etməlidir. Ümumilikdə isə bizim Rusiya ilə heç bir birgə fəaliyyətimiz yoxdur. Təbii ki, maraqlar üst-üstə düşdükdə, hər hansısa məsələnin həllində əməkdaşlıq edə bilərik. Lakin ziddiyyətli məqamlar ortaya çıxdıqda da Azərbaycan öz milli maraqlarına uyğun hərəkət edir".
Vidadi ORDAHALLI
