Azər Həsrət: "Ərazi bütövlüyü pozulan dövlətlər Azərbaycan təcrübəsindən yararlana bilər"
Prezident İlham Əliyev "Parçalanmış dünyanın bərpası" mövzusunda XI Qlobal Bakı Forumunun açılış mərasimindəki çıxışında bəyan etdi ki, bir sıra faktorların vəhdəti Azərbaycanın qələbəsini təmin etdi:
"Biz güclü siyasi iradə və eyni zamanda, potensialı nümayiş etdirdik. Çünki güclü hərbi potensial və xalqın birliyi olmasa, güclü siyasi iradə uğura aparmayacaq. Beləliklə, bütün amillərin vəhdəti, bizim iqtisadi inkişafımız, bizim maliyyə imkanlarımız, müdafiə potensialımız, hərbi qulluqçularımızın təlimi, Birləşmiş Millətlər Təşkilatı, ATƏT, Qoşulmama Hərəkatı, İslam Əməkdaşlıq Təşkilatı və digərləri kimi bütün aparıcı beynəlxalq təşkilatlar Azərbaycanın ərazi bütövlüyü ilə bağlı mövqeyini tam dəstəklədikdə aktiv və proaktiv xarici siyasətin yürüdülməsi buna imkan verdi".
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrətin fikrincə, cənab Prezidentin qeyd etdiyi faktorlar həqiqətən də Azərbaycanın ərazi bütövlüyünün bərpa edilməsində əvəzsiz rol oynadı: "Yəni biz torpaqlarımız işğal altında olduğu dövrdə bir an belə şübhə etmədən öz mövqeyimizi dünyaya çatdırmağa davam etdik. BMT, ATƏT, Avropa Şurası və digər beynəlxalq kürsülərdə daim Azərbaycanın ərazi bütövlüyü məsələsi gündəmdə saxlanıldı. İstənilən ən yüksək səviyyəli görüşlərdə belə, Prezidentin özü şəxsən xüsusi olaraq Azərbaycan ərazilərinin işğal altında olmasını vurğuladı. Yəni Ermənistanın təcavüzkar, işğalçı bir dövlət olmasını biz dünyanın yaddaşında diri tuta bildik. Hər kəsə, hər zaman bunu xatırlatdıq. Üstəlik, adı çəkilən beynəlxalq qurumlar, eləcə də ayrı-ayrı dövlətlər Azərbaycanla ikitərəfli münasibətlərdə bizim ərazi bütövlüyümüzə heç vaxt şübhə etmədilər. Düzdür, problemin həlli ilə bağlı müəyyən güzəştlərdən danışılırdı, amma ümumilikdə Azərbaycanın ərazi bütövlüyü məsələsində dövlətin heç bir güzəştə getməyəcəyini hər kəs, hər zaman anlamışdı. Ona görə də Azərbaycan öz ərazilərini məcburiyyət qarşısında qalaraq güc yolu ilə azad edərkən dünya ölkələri buna yetərincə təmkinli yanaşmaq məcburiyyətində qaldılar. İndi bütün bu faktorları bir araya toplamağı bacaran lider və bütövlükdə onun rəhbərlik etdiyi dövlət əlbəttə ki, istədiyi hər bir məsələdə uğur qazana biləcək. O baxımdan hesab edirəm ki, bundan sonra da Azərbaycan dövləti məhz bu istiqamətdə davam edəcəyi təqdirdə mütləq və mütləq yeni-yeni uğurlar qazanacaq. Yəni bu vaxta kimi bizimlə hesablaşıblar, bundan sonra da hesablaşmalı olacaqlar. Kimlər ki bizimlə xoşməramlı münasibətlər qurmaq istəyir, əlbəttə ki, Azərbaycanın dövlət müstəqilliyi, suverenliyi, ərazilərinin bütövlüyü gerçəklərini qəbul etməlidirlər. Qəbul etməlidirlər ki, bu ölkədə bölücülüyə yer yoxdur. Belə olan halda biz istənilən dövlətlə ikitərəfli dost münasibətlərə hər zaman hazırıq. Həmçinin onu da qeyd etmək istəyirəm ki, Azərbaycan dövləti o beynəlxalq təşkilatlara da bir vaxtı və gerçəyi xatırladır. O da ondan ibarətdir ki, sizin qətnamələriniz, bəyanatlarınız hansısa kağız üzərindəki sənədləriniz heç də hər zaman həlledici olmur. Biz məcburiyyət qarşısında qalıb torpaqları azad etməli oluruq. Eyni zamanda ərazi bütövlüyü pozulan dövlətlər Azərbaycan təcrübəsindən yararlana bilər. Bu, o deməkdir ki, beynəlxalq hüquqa söykənərək gərəkən şərtlərin formalaşmasını gözləmək və doğru zamanda addımlar atmaq lazımdır".
Vidadi ORDAHALLI
