Özünü dünya ictimaiyyətinə Avropa lideri kimi sırımağa çalışan Fransa prezidenti Emmanuel Makron yarıtmaz xarici siyasəti ilə dünya müharibəsini sürətlə yaxınlaşdırır. Onun son addımları eyni zamanda dünyanı nüvə savaşına sürükləyir. Artıq bəlli olub ki, Fransa qoşunları tezliklə Ukraynada olacaq.
Fransanın ordu bölmələri Rumıniyaya, oradan da Rusiya ordusuna qarşı döyüşmək üçün Ukraynaya, daha dəqiqi, Odessaya göndərilir. Döyüşə göndərilən bölmələr arasında 2-ci Xarici Piyada Alayının adı xüsusi vurğulanır. Fakt "France 2"yə müsahibəsində Emmanuel Makron tərəfindən də təsdiqlənib. Makronun sözlərinə görə, Fransa Rusiya ilə müharibə aparmır, lakin Qərb onun qalib gəlməsinə imkan verməməlidir. O bildirib ki, son bir neçə ayda Ukraynanın əks-hücum əməliyyatı gözlənildiyi kimi olmayıb və cəbhədə vəziyyət çox kövrəkdir. Dövlət başçısı deyib ki, bu münaqişədə Rusiya qalib gəlsə, o zaman Avropaya inam sıfıra enəcək: "Fransa qoşunları Ukraynada olacaq. Qırmızı xətlər olmayacaq. Mən Fransa prezidentiyəm və mən qərar verirəm. Ukraynanın əks-hücumu Qərbin gözlədiyi kimi keçmədi. Hazırda Ukraynada döyüş zonasında vəziyyət olduqca ağırdır. Rusiya daha böyük ölkədir. Ukrayna çox itirir. İtki 10-a 1 nisbətindədir". Makron bununla Ukraynanın döyüş zonasında uğurları barədə indiyə kimi deyilənlərin doğru olmadığını bildirib və əslində, Qərb təbliğatına, Ukrayna tərəfinə də ciddi zərər vurub. Rusiya Xarici İşlər Nazirliyinin sözçüsü Mariya Zaxarova bunlar fonunda bildirib ki, Emmanuel Makronun Fransa əsgərlərinin Ukraynaya göndərilməsi ideyası çoxdan var idi: "Makron və digər NATO siyasətçilərinin Ukrayna ərazisinə kontingent və ya bir növ paramilitar birləşmələrin yeridilməsi ehtimalı ilə bağlı dediyi bütün bu bəyanatlar Ukraynanın qalıqları kimi gördükləri ərazilərin bölünməsi ilə bağlıdır. Ərazi istəkləri Kiyevin niyə hələ də bloka qoşulmağa dəvət edilmədiyini izah etməyə kömək edir. Bütün bunlar NATO üzvləri ilə, həmişə olduğu kimi, saxta bayraq altında baş verir. Onlar Rusiyaya qarşı mübarizə haqqında danışırlar, amma əslində Ukraynanın qalıqlarını öz aralarında bölməyə başlayırlar". Parisə gəlincə, Zaxarova deyib ki, fransız qoşunları 19-cu əsrin əvvəllərində və 20-ci əsrin əvvəllərində yenidən Rusiyaya hücum edib. "Fransa bunun necə bitdiyini xatırlasa yaxşı olar". Qeyd edək ki, Napoleon Bonapart 1812-ci ilin iyununda 700000-ə yaxın fransız və müttəfiq qoşunu ilə Rusiyanı işğal edib. Altı ay sonra isə 100000-dən az adamla Niemen çayı boyunca geri dönməyə məcbur oldu. İkinci Fransız ekspedisiyası daha az məlumdur, çünki o, daha qısa olub. 1918-ci ilin dekabrında Antantanın bolşevik inqilabçılarına qarşı müdaxiləsi çərçivəsində 15000-ə yaxın fransız əsgəri Rusiyanın cənubuna daxil olub. Qırmızı Orduya çoxsaylı itkilərdən sonra Fransız ekspedisiyası 1919-cu ilin aprelində geri qayıtmağa məcbur oldu.
İndi də görünən odur ki, Rusiya və Fransa ordusu yenidən üz-üzə gəlir. Hər iki ölkə nüvə silahına malikdir və ondan istifadənin mümkünlüyü barədə də xəbərdarlıq olunub. Rusiya prezidenti Vladimir Putin ölkəsinin Qərbdəki hədəfləri vurmaq üçün silaha malik olduğunu bildirərək, Qərb dövlətlərinin Ukraynaya qoşun yeritməsinin faciəli nəticələri barədə artıq xəbərdarlıq edib: "Qərb dövlətləri başa düşməlidirlər ki, bizim də onların ərazisindəki hədəfləri vura biləcək silahlarımız var. Bütün bunlar həqiqətən də nüvə silahından istifadə edilməsi ilə münaqişə və sivilizasiyanın məhvi təhlükəsini yaradır. Onlar bunu başa düşmürlərmi?". Bütün bunlar məhz Makronun sərsəm ideyalarından sonra gündəmə gəlib. Elə o səbəbdən Avropanın əksər liderləri, ABŞ başda olmaqla, Makronun ideyasına qarşı çıxıb. Hətta iş o yerə çatdı ki, Makron bu açıqlaması ilə Almaniya Kansleri Olaf Şoltsun qəzəbinə tuş gəldi. Bu narazılıq Fransa-Almaniya münasibətlərində ciddi fəsad yaradıb. Makronun bəlli bəyanatından sonra iki ölkə arasında münasibətlər ən aşağı səviyyəyə enib. Almaniya-Fransa münasibətlərində yaranan gərginlikdən isə uduzan tərəf ilk olaraq Ukraynadır. Proseslər, hətta NATO və Avropa İttifaqı ölkələrinin birliyinə ziyan vuracaq qədər inkişaf etməkdədir. Digər tərəfdən, NATO ölkələri daxilində yaranan narazılıq Rusiyanın lehinə işləyir. Elə bu da Ukraynanı narazı salır. Amerikanın "Politico" qəzeti də yazır ki, Makronun səhvləri Qərbə baha başa gəlir. Qəzet yazır ki, Şolts və Makron arasında Ukraynaya hərbi yardımla bağlı fikir ayrılığı açıq düşmənçiliyə çevrilməyə başlayıb: "Tərəflər əsas olaraq Ukraynaya silah göndərilməsi məsələsində ortaq məxrəcə gələ bilmirlər. Belə ki, Almaniya Ukraynaya "Taurus" raketlərini vermək istəmədiyi bir zamanda, Fransa ölkəyə özünün "SCALP" qanadlı raketlərini göndərmək istədiyini açıqlayıb. Şolts və Makron arasında fikir ayrılığına səbəb olan məsələlərdən biri də Rusiya ilə sərhədə ölkə qoşunlarının göndərilməsidir. Almaniya kansleri dəfələrlə bildirib ki, NATO Ukraynada münaqişə tərəfi olmayacaq, alman hərbçilər isə ölkəyə göndərilməyəcək. Fransa lideri isə Qərb ölkələrinin əsgərlərinin Ukraynaya göndərilmə ehtimalını istisna etməyib". Hələlik görünən odur ki, Fransa Qərbdə NATO-ya və ABŞ-a qarşı yeni güc mərkəzi formalaşdırmaq istəyir və planlarını həyata keçirmək üçün ən optimal variant kimi Ukraynanı görür. Bu isə Makronun Qərbdə də ciddi tənqid hədəfinə çevrilməsini şərtləndirir.
Tahir TAĞIYEV
