Azər Həsrət: "Bu forum dünyada insanlar, dövlətlər arasında münasibətlərin dialoq yolu ilə çözümünə əlavə töhfə və stimul verəcək"
Bu gün parçalanmış dünyanı birləşdirmək, bütövləşdirmək istəyən və bunun uğrunda addımlar atan Azərbaycan dünyanı parlayanlara qarşı barışmaz mövqedə dayanır. Bakıda Nizami Gəncəvi Beynəlxalq Mərkəzinin təşkilatçılığı ilə "Parçalanmış dünyanın bərpası" mövzusunda XI Qlobal Bakı Forumunun keçirilməsi təsadüfi deyil.
Bakı platformasında bütün bəşəriyyəti narahat edən aktual məsələlərin birindən, parçalanmış dünyanın problemlərindən, onu məqsədli şəkildə parçalayanlardan danışıldı. Dünyanı parçalıyan bəzi Qərbi Avropa ölkələrinin, xüsusən də Fransanın əməlləri, eləcə də antiazərbaycan mövqeyi, siyasəti bu platformada da ifşa edildi. Vurğulandı ki, səyləri birləşdirib, parçalanmış dünyanın çatlarını bərpa edib onun vəziyyətini yaxşılaşdırmaq, düzənini qurmaq olar.
Forumda Azərbaycan Prezidenti də iştirak etdi, nitq söylədi. Prezident Əliyev "Dünya sürətlə dəyişir. Əfsuslar olsun ki, yeni qeyri-sabitlik və qarşıdurma ocaqları meydana çıxır. Ötən ilin martında müzakirə etdiklərimizlə bu gün müzakirə etdiklərimizi müqayisə etsək nəzərəçarpan dəyişikliklər görərik. Burada geosiyasi dəyişikliklər baş verir. Ona görə də qlobal əhəmiyyət kəsb edən məsələlərin həlli üçün bu gün dünyanın həqiqətən də Nizami Gəncəvi Beynəlxalq Mərkəzinin üzvlərinin və iştirakçılarının təcrübəsinə, biliyinə, onların dövlət, hökumət başçıları və xarici işlər nazirləri kimi təcrübəsinə ehtiyacı var" - deyə qeyd etdi.
Forumda dünya parçalanmasının səbəblərinə Azərbaycan Prezidenti necə baxır və necə qiymətləndirir?
"Parçalanmış dünyanın bütövləşdirilməsi, birləşdirilməsi..."
Siyasi şərhçi Azər Həsrət "Bakı-Xəbər"ə şərhində "Əlbəttə ki, cənab Prezidentin bu forumdakı çıxışı kifayət qədər əsaslandırılmış, geniş və əhatəli idi. Yəni şəxsən o çıxışı tam olaraq dinlədim. Baxdım o çıxışa. Hər zamankı kimi cənab Prezident əsasən birmənalı şəkildə Azərbaycanın dünyadakı problemlərin həllində sülhə üstünlük verməsini vurğuladı. Yəni istənilən məsələnin masa arxasında müzakirə edilməsinin vacibliyini bu dəfə də diqqətə çatdırdı. Eyni zamanda ölkələr, xalqlar arasındakı münaqişələrin həllinə mane olan dövlətlərlə bağlı fikirlərini bildirdi. Əsasən də Fransanın destruktiv fəaliyyəti ilə bağlı dediklərini ayrıca vurğulamaq lazımdır. Həqiqətən də Fransa Ermənistanla Azərbaycan arasında münasibətlərin normallaşmasına açıq şəkildə mane olmaqdadır və cənab Prezident də bunu xüsusi vurğuladı. Eyni zamanda Fransada Azərbaycanın tarixi şəxsiyyəti, şairə, mesenat Xurşudbanu Natəvanın heykəlinə qarşı törədilən vandalizm aktını da cənab Prezident iştirakçıların diqqətinə çatdırdı. Fransa kimi ənənəsi, tarixi olan bir ölkədə vandalizmi görməkdən üzüntüsünü dilə gətirdi. Cənab Prezident bu platformanın ümumilikdə dünyanın ayrı-ayrı bölgələrində insanların dialoqa, yaxınlaşmaya üstünlük verməsinə bir töhfə olduğunu da xüsusi olaraq diqqətə çatdırmış oldu. Yəni ümumilikdə götürəndə, parçalanmış dünyanın bütövləşdirilməsi, birləşdirilməsi, insanlar arasında dialoqun, danışıqların dərinləşdirilməsi, bütün problemlərin masa arxasında çözümünə çalışılması kimi faktorlar bu çıxışın leytmotivini təşkil edirdi "-deyə bildirdi.
A.Həsrətin sözlərinə görə, eyni zamanda Qarabağ məsələsinin həlli ilə bağlı da Prezident Əliyev acı təcrübəni burada diqqətə çatdırdı, ATƏT-in Minsk qrupunun fəaliyyətsizliyi, beynəlxalq qurumların Azərbaycanı öz ərazi bütövlüyünü bərpa etmək üçün gücdən imtinaya çağırmasını vurğuladı və bildirdi ki, biz əlbəttə, məsələnin güc yolu ilə həllinin tərəfdarı deyilik, amma bəzən elə vəziyyət yaranır, məcburən güc tətbiq etməli olursan. "Baxın, bu cür zəngin, tutarlı faktlarla dolu geniş bir çıxış oldu, çıxış da təbii şəkildə iştirakçılar tərəfindən alqışlarla, rəğbətlə qarşılandı. Ümumlikdə düşünürəm ki, bu forum dünyada insanlar, dövlətlər arasında münasibətlərin dialoq yolu ilə çözümünə əlavə töhfə və stimul verəcək" - deyə A.Həsrət qeyd etdi.
İradə SARIYEVA
