Məlum olduğu kimi, dünən Azərbaycan prezidentinin ATƏT-in fəaliyyətdə olan sədri İan Borqla Münhendə görüşü olub. Dövlətimizin başçısı görüşdə bildirib ki, Qarabağ münaqişəsi artıq həll olunub, Azərbaycan öz suverenliyini və ərazi bütövlüyünü təmin edib. "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu mövzu barədə fikirlərini paylaşıb. Politoloq yazır: "Azərbaycan prezidentinin ATƏT-in fəaliyyətdə olan sədri İan Borqla Münhen Təhkükəsizlik Konfransı çərçivəsindı onun müraciəti əsasında görüşməsi nə ilə yadda qalacaq?
Avropa məkanında sülh və təhlükəsizliyin dağılmaq səviyyəsində pozulduğu bir vaxtda ana vəzifəsi belə pozulmaların qarşısını almaqdan ibarət olan ATƏT- in özü çarəsizlik və gücsüzlük göstərir, vəziyyətə heç bir dəyişdirici təsir edə bilmir.BMT Yaxın Şərq qətliamının qarşısını almaqda hansı gücsüzlüyü göstərirsə, Avropa məkanında da eyni zəifliyi ATƏT göstərir.Halbuki onun buna haqqı yoxdur, çünki 1975- ci ildən indiyə qədər Avropada sülh və təhlükəsizliyin qorunmasını öz üzərinə bir missiya olaraq götürsə də, sonda sıfır nəticə var ,necə deyərlər ," bağ əldən gedir, bağban yatıb"....
Prezident İlham Əliyev ATƏT- in məhz belə ağır günündə onun " fəaliyyətdə olan sədrinin" görüş müraciətini geri çevirmədi və onunla görüşdü.
" Fəaliyyətdə olan sədr" sözlərini niyə dırnaq arasında yazdığımı az sonra izah edəcəyəm.
İlham Əliyev hazırkı təhlükəsizlik böhranı üzündən ölü vəziyyətə düşmüş ATƏT- i hazırkı durumdan çıxara biləcək təkliflər verdi.Prezident Əliyev cənab Borqa bunları təklif etdi:
1.ATƏT- in bizlərə çox yaxşı tanış olan Minsk Qrupu deyilən qurumunun rəsmən buraxılması.
2.ATƏT- in "fəaliyyətdə olan sədrinin" " şəxsi nümayəndəsi" deyilən ofisinin buraxılması.
3.ATƏT- in Yüksək Səviyyəli Planlama Komitəsinin buraxılması.
Qeyd edim ki, bu təkliflər Azərbaycan prezidentinin strateji baxışlarında yeni yaranmış ideyalar deyil.Çoxdan elan olunmuş islahat platformasının davamıdır.
Hələ 44 günlük Vətən müharibəsinin bitməsindən sayılı həftələr sonra İlham Əliyev Minsk Qrupunun buraxılmasını qurum rəsmilərinin özlərinə demədimi? Minsk Qrupunun iki həmsədrinə( Rusiyalı həmsədr həmin qəbulda yox idi) " Mən sizi ölkəyə dəvət etməmişəm, niyə gəlmisiniz" deyə sual etmədimi ? Elə o zaman onlara açıq deyildi ki, münaqişəni həll etmədiniz, etmək istəmədiniz , özümüz həll etdik.İlham Əliyev o zaman həmsədrlərə öz missiyalarını dəyişmək şərtilə bölgədə fəaliyyətin davam etdirilməsi perspektivini də göstərdi.Dedi ki, münaqişə bitdiyi üçün ATƏT bundan sonra Ermənistanda qisasçı qüvvələrin hakimiyyətə təsirlərinin qarşısını almağa, erməni cəmiyyətinin sülhə hazırlanmasına öz töhfəsini verməyə çalışmalıdır. Həqiqətən də əgər o zamanlardan başlayaraq ATƏT bizim bölgəmizdəki fəaliyyətində yeni reallıqlara uyğun dəyişiklik edə bilsəydi, bu gün heç olmasa bizim bölgəmizdə " ölü və tarixdə qalmış qurum " halına gəlməzdi. Şans buraxıldı.
Bu səbəbdən Azərbaycan prezidenti faktiki ölü Minsk Qrupunun buraxılmasını ATƏT sədrinin özünə üz- üzə təklif etdi.İndiyədək Heç nəyə yaramayan qurumu saxlamaq, onun saxlanmasına əlavə vəsait qoymağın mənası nədir ki....
ATƏT- in " fəaliyyətdə olan sədrinin ofisinin " buraxılması təklifinə də eyni məntiqlə yanaşmaq lazımdır.Bu vəzifəni 10 illər boyu uğursuz və nəticəsiz tutmuş Anjey Kaspşik adlı diplomatın münaqişənin davam etdiyi dövrdə Bakıya və Yerevana səfərlərinin sayı- hesabı unudulub.Onun yollara səpələdiyi pullar bizim xalqımızın vəsaitləri idi."Sıflr nəticə "əldə etməsi bir yana, bircə dəfə olsa da ədalətli mövqe tutmadı, özünün əldə etdiyi qazanclar və Yerevanda aldığı hədiyyələr barədə isə saysız media xəbərləri yayıldı. Belə bir qurumu saxlamağa ehtiyac varmı? İlham Əliyev yerində təklif verib.Həm də ATƏT- in özü üçün çox faydalı olan təklif verib.
Yüksək Səviyyəli Planlama Komitəsi deyilən qurum da ATƏT- in 1992- ci ildən başlanmış mənasız missiyasının " xədim doğulmuş" qurumlarından biridir. Məhz həmin uzundurma adı daşıyan qurum hələ 1993- cü ilin aprel- may aylarında Ermənistan qoşunlarının Azərbaycanın torpaqlarından çıxması üçün plan- qrafik tutmuşdu .Bəs nə oldu? Niyə qoşunları çıxarmadı? Deyəcəksiniz ki, yəqin Azərbaycanda hakimiyyət dəyişdiyi üçün alınmadı.Hakimiyyət dəyişməsinin plan- qrafikə nə dəxli var? Hakimiyyət dəyişdi, işğal altındakı ərazilər ki yerində idi...Əgər bu Komitənin plan- qrafiki yeni oyunbazlıqların " şirması " deyildirsə, onu təzə hakimiyyətin dövründə həyata keçirməyə çalışmalı idi.Ancaq etmədi....Şünki onun da məqsədi erməni qoşunlarını ərazilərimizdən çıxarmaq deyildi.Demək , Azərbaycan prezidenti bu Komitənin də buraxılması təklifini ciddi əsaslara söykənərək səsləndirdi .
İndi gələk " ATƏT- in fəaliyyətdə olan sədri" ifadəsinin dırnaq arasında yazılmasına...." Fəaliyyətdə olan sədr" nə deməkdir? Məgər ATƏT- in " fəaliyyətsiz sədri" də var?!
Nəhayət, ATƏT sədrinin İlham Əliyevin təkliflərini qəbul edəcəyini, həyata keçirib- keçirməyəcıyini deyə bilmərik.Vacib odur ki, Azərbaycan prezidenti dürüst və sülh əhəmiyyətli iradə nümayiş etdirir, həm də ATƏT- in özünün izafi xərclərdən qurtulmasını şərtləndirən yollar göstərir...
Qalanı ATƏT- likdir....."
Mətləb Salahov
