Abutalıb Səmədov: "Münhendə keçirilərən növbəti təhlükəsizlik konfransı bəzi həqiqətləri anlamaqda Avropa Birliyi ölkələrinə və ABŞ-a lazımi köməyi göstərəcək"
Prezident İlham Əliyev yenidən prezident seçilməsindən sonra ilk işgüzar səfərini Almaniyanın Münhen şəhərinə edib. İlham Əliyevlə Münhen Təhlükəsizlik Konfransında iştirak edir.
Münhen Təhlükəsizlik Konfransı 16-18 fevral tarixlərində keçirilir.
Ancaq qeyd edək ki, bu, hansısa ölkəyə edilən rəsmi səfər deyil, Təhlükəsizlik Konfransında iştirakdır.
İlham Əliyevin Münhen Təhlükəsizlik Konfransına dəvət olunması Azərbaycanın xarici siyasətinin həqiqətən qlobal təsir səviyyəsinə çatdığını və Azərbaycanın dünyada supergüclərdən sonra "orta gücə" çevrilən ölkələrdən biri olduğunu deməyə əsas verirmi?
Müstəqil siyasətçi Abutalıb Səmədov "Bakı - Xəbər"ə açıqlamasında bildirdi ki, Azərbaycan Prezidentinin Münhen Təhlükəsizlik Konfransına dəvət olunması bizim dünyadakı nüfuzumuzun bir daha təsdiq olunması deməkdir: "Digər tərəfdən, bu fakt onu göstərir ki, Azərbaycan bölgənin ən nüfuzlu dövlətidir, Cənubi Qafqazda sülhün, əminamanlığın, sabitliyin təmin olunmasında həlledici rol oynayacaq ölkədir. Bu baxımdan da dünya Azərbaycana böyük dəyər verir. Keçən il keçirilən Münhen Təhlükəsizlik Konfransında Azərbaycan Prezidenti mühüm bəyanatlar vermişdi. Hər şeydən əvvəl açıq şəkildə demişdi ki, Azərbaycan sülh sazişinin imzalanmasında Qərb - Brüssel və Vaşinqton platformasına üstünlük verir. Qərbdə yaxşı bilirlər ki, Rusiyanın ABŞ-ı və Avropa Birliyini bölgəyə buraxmamaq üçün göstərdiyi səylərin qarşısının alınmasında Azərbaycan mühüm rol oynayıb. 2022 - ci ilin sonlarında Soçidə keçirilən sammit Qərbi bölgəyə buraxmamaq istiqamətində həlledici əhəmiyyətə malik idi. Rusiya sülh sazişi layihəsini təqdim etdi, Ermənistan da bu layihəni tamamilə dəstəklədiyini və imzalamağa hazır olduğunu bildirdi. Ancaq Azərbaycan Prezidenti birmənalı şəkildə sazişin bu layihəsinin imzalanmasının mümkünsüz olduğunu, Qarabağ məsələsinin sülh sazişinə salınmasını Azərbaycanın qəbul etməyəcəyini bildirdi. Rusiyanın Qərbi bölgəyə buraxmamaq üçün göstərdiyi bu son cəhd uğursuzluqla nəticələndi. İndi çoxları bəyan edir ki, guya Azərbaycan Rusiyaya yaxınlaşmaq üçün əlindən gələni edir. Ancaq bu belə deyil. Əksinə, Rusiya Azərbaycana yaxınlaşmaq üçün maksimum çevik siyasət yeridir. Qərb də bundan nümunə götürməlidir. Son iki ildə aparılan danışıqlar həm Brüssel platformasında, həm də Vaşinqton platformasında təhlil edilməli, Qərb ölkələri tərəfindən diqqətlə araşdırılmalıdır, lazımı nəticələr çıxarılmalıdır. Qərbin tutduğu ermənipərəst mövqe Azərbaycanı ondan uzaqlaşdırır. Bu səbəbdən də ümid edirəm ki, Münhendə keçirilərən növbəti təhlükəsizlik konfransı bəzi həqiqətləri anlamaqda Avropa Birliyi ölkələrinə və ABŞ-a lazımi köməyi göstərəcək".
Məhəmmədəli QƏRİBLİ
