Tural İsmayılov: "Bu təsisatlar ciddi formada öz əhəmiyyətini itirib"
Prezident İlham Əliyev ATƏT çərçivəsində keçmişin qalıqları olan bir sıra mexanizmlərin - bu xüsusda ATƏT-in Minsk Qrupu, Yüksək Səviyyəli Planlaşdırma Komitəsi və ATƏT-in fəaliyyətdə olan sədrinin şəxsi nümayəndəsi kimi tamamilə fəaliyyətsiz olan strukturların artıq rəsmi qaydada ləğv edilməsinin vacib olduğunu bildirib.
Bu barədə dövlət başçısı fevralın 16-da Münhendə ATƏT-in fəaliyyətdə olan sədri, Malta Respublikasının xarici, Avropa işləri və ticarət naziri İan Borq ilə görüşü zamanı deyib.
Azərbaycan lideri ATƏT çərçivəsində büdcənin də daha məqsədyönlü və vacib layihələrə istiqamətləndirilməsinin önəmini qeyd edib.
Yeri gəlmişkən, Prezident Əliyev ATƏT-in Minsk Qrupunun yararsız bir qurum olduğunu bundan əvvəl də bir neçə dəfə qeyd edib. Həm müharibədən əvvəl, həm də ondan sonra tənqid edib. 44 günlük Vətən müharibəsindən sonra Prezident Əliyev 2020-ci ilin 12 dekabrında həmsədrləri qəbul edərkən Minsk Qrupunun fəaliyyətini kəskin tənqid etdi. O cümlədən qeyd etdi ki, onları dəvət etməyib: "Mən Minsk qrupunu səfərə dəvət etməmişəm. Lakin mənə məlumat verəndə ki, Minsk qrupu gəlmək istəyir, dedim gəlsinlər, etiraz etmirəm. Bəlkə onların mənə sözləri var. Əgər siz bunu kamera qarşısında söyləmək istəyirsinizsə, buyurun. Əgər istəmirsinizsə, mən onlara deyim getsinlər. Necə istəsəniz".
Bundan başqa, Prezident Əliyev 2021-ci ilin dekabrın 15-də İtaliyanın "İl Sole 24 Ore" qəzetinə müsahibəsində qeyd etdi ki, qurumun fəaliyyəti uğursuz idi: "Minsk Qrupu ATƏT-in mandatına əsasən, 1992-ci ildən münaqişəni həll etməyə məcbur idi. Onlar ötən il noyabrın sonunadək, biz 44 gün ərzində əraziləri azad edənə kimi 28 il ərzində fəaliyyət göstərdilər. Mənim Minsk Qrupunun fəaliyyəti ilə bağlı fikrim Azərbaycan xalqının fikrindən fərqlənmir. Bu, uğursuzluq idi".
"Minsk Qrupu ömrünü başa vurubsa, nəyə görə yersiz yerə ATƏT-dən ora vəsait ayrılmalıdır?"
Sözügedən məsələni baki-xeber.com-a şərh edən politoloq Tural İsmayılov bununla bağlı bir sıra məqamlara toxundu: "Əlbəttə ki, ATƏT-in bu gün bir təşkilat olaraq fəaliyyəti kifayət qədər ciddi suallar doğurur. Təbii ATƏT-in bir sıra qurumları var ki, onlar artıq öz ömürlərini başa vurmalıdılar. Xüsusən də yararsız olan ATƏT-in Minsk Qrupu və həmçinin qurumun Yüksək Səviyyəli Planlaşdırma Komitəsinin mövcudluğuna ehtiyac qalmayıb. Bu təsisatlar ciddi formada öz əhəmiyyətini itirib. Yəni bu təsisatların varlığı ATƏT-in maliyyə yükünü artırır. Ona görə də əslində Prezident İlham Əliyev bu xüsusda ATƏT rəhbəri ilə görüşdə bir çoxlarının da bəlkə söyləmək istədiyi fikirləri dedi. Hesab edirəm ki, ATƏT-in bu strukturlarının fəaliyyətsizliyi uzun müddət özünü göstərib. Xüsusən də ATƏT-in Minsk Qrupu 30 il ərzində Azərbaycanla Ermənistan arasındakı münasibətlərə təsir etməyib. Azərbaycan ərazilərinin işğalda olması faktoruna real siyasi təsir göstərə bilməyib. Eyni zamanda ATƏT-in Yüksək Səviyyəli Planlaşdırma Komitəsi də yaranarkən üzərinə bir sıra öhdəliklər götürmüşdü. Ancaq məsələ ondadır ki, bu təsisat üzərinə götürdüyü öhdəliklərin əksəriyyətini yerinə yetirməyib. Nəticədə bu təsisatlar lazımsız bir struktur halına gəlib. Əlbəttə ki, bütün bunlar ATƏT-in büdcəsinin boşuna xərclənməsinə səbəb olur. Minsk Qrupu ömrünü başa vurubsa, nəyə görə yersiz yerə ATƏT-dən ora vəsait ayrılmalıdır? Bu, həm də Yüksək Səviyyəli Planlaşdırma Komitəsinə aiddir. Ona görə də ölkə başçısının arqumentləri tamamilə əsaslıdır".
Vidadi ORDAHALLI
