Prezident İlham Əliyev oktyabrın 8-də Tiflisdə Gürcüstanın Baş naziri İrakli Qaribaşvili ilə birgə mətbuata bəyanatında deyib ki, üç il bundan əvvəl İkinci Qarabağ müharibəsinin nəticəsində Azərbaycan öz ərazi bütövlüyünü bərpa edib, keçən ay bütün ölkə üzrə suverenliyini bərpa etdi:
“İndi isə Ermənistan ilə Azərbaycan arasında imzalanacaq sülh müqaviləsi üzrə fəal çalışmalıyıq. Əgər biz buna nail olsaq - mən buna ümidliyəm, - bu zaman Cənubi Qafqazda tamamilə yeni bir siyasi vəziyyət yaranacaq”.
Cənubi Qafqaz ölkələrinin əməkdaşlığa üçtərəfli formatda başlaya biləcəklərini qeyd edən Prezident bir çox sahələr, o cümlədən nəqliyyat, enerji təhlükəsizliyi, ticarət, qarşılıqlı sərmayə qoyuluşu üzrə əməkdaşlığın çox uğurlu ola biləcəyini vurğulayıb. “İndi məqam gəlib çatıb və hesab edirəm ki, bu şansı əldən vermək böyük səhv olar”.
Göründüyü kimi, Prezident deyib ki, Gürcüstanla birgə icra etdiyimiz layihələrin təkcə regional yox, bütün Avrasiya üçün əhəmiyyəti var.
Azərbaycanla Gürcüstanın hansı layihələri Avrasiyanı dəyişə bilir və biləcək?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Azərbaycanla Gürcüstanın yaxından əməkdaşlığı Cənubi Qafqazın Avrasiya məkanındakı, həmçinin dünya çapındakı faydalılıq əmsalını daha da artırıb: “Təbii ki, ilk növbədə söhbət iki ölkənin birlikdə reallaşdırdığı enerji və nəqliyyat kommunikasiya layihələrinin uğurla reallaşmasından gedir. Bakı-Tiflis-Qars, Bakı-Tiflis-Ceyhan, Bakı-Tiflis-Ərzurum və Cənub Qaz Dəhlizi kimi meqa layihələrin reallaşmasından gedir. Azərbaycanın bu təşəbbüsü regiona yeni nəfəs gətirib, əhalinin rifahını yüksəldib. Bir sözlə, bu tandemin əməkdaşlığı yeni uğur formulu kimi xarakterizə olunur. Biz heç kimin maraqlarına, aqressiv planlarına uyğun gəlmək istəmirik. Bizim özümüzün inkişaf maraqlarımız var. Bu da ondan ibarətdir ki, bizim inteqrasiya imkanlarını genişləndirməkdə marağımız mövcuddur. Belə layihələrin ərsəyə gəlməsində bizim mərhum Prezident Heydər Əliyevlə Gürcüstanın mərhum Prezidenti Eduard Şevardnadzenin böyük xidmətləri var. Nəticədə biz olduqca aktual olan layihələri ideyadan reallığa çevirə bildik. Mərhum Heydər Əliyevin bir fikri vardı: “Üç dəniz əfsanəsi”ni reallığa çevirmək. Söhbət Xəzər, Qara və Aralıq dənizlərini əhatə edən layhələrin reallaşmasından gedirdi. Bu layihələrin reallaşması çətinliklə başa gəldi. Az qala bunları ekoloji fəlakət kimi qələmə verməyə çalışırdılar. Sonra gördülər ki, bu layihə hətta Avropanın özünün enerji təhlükəsizliyinə zəmanət verir. Azərbaycanla Gürcüstanın həmahəng çalışması belə faydaları üzə çıxarmış oldu. Bizim inteqrasiya proseslərimiz hələ tam reallaşmayıb. Buna da əsas maneə yaradan Ermənistandır. Əgər İrəvan ağıllı mövqe ortaya qoysa, bu üç Cənubi Qafqaz ölkəsi ciddi uğura imza ata bilər. Ermənistan sübut edir ki, bəzi diqtələrlə yerli dövlətlərin inkişafının qarşısını alır. Fransanın fəaliyyəti buna sübutdur. Bu ölkə Ermənistana şərait yaratmaq istəyirsə, onu doğru yola yönəltsin. Artıq Ermənistandakı vəziyyət elə həddə çatıb ki, əhali oranı tərk edir. Nikol Paşinyan Ermənistanı normal istiqamətə yönəldə biləcək bir siyasətçidir. Təsadüfi deyil ki, İlham Əliyev Tiflisdən məhz bu ölkənin rəhbərliyinə səsləndi ki, gəlin birlikdə çalışaq. Ermənistan bunu dəyərləndirməlidir. Etməsə, vəziyyəti daha da pis olacaq. Prezident eyni zamanda yeni Cənub-Qərb dəhlizinin reallaşacağını gündəmə gətirdi. Hind okeanından başlayaraq, Fars körfəzindən keçib Qara dənizə qədər uzanacaq. Ermənistan olmasa, biz İran-Azərbaycan-Gürcüstan xətti ilə yeni yükdaşınmaların təşəbbüskarı olacağıq. Bu da bizə və Gürcüstana böyük imtiyazlar vəd edən layihədir. Bakı ilə Tiflisin baxışlarının üst-üstə düşdüyü bu məsələ ilə bağlı vaxt itirmək olmaz, tələsmək lazımdır”.
Məhəmmədəli QƏRİBLİ
