Separatçıların qondarma xunta rejiminə xidmət edən və əli azərbaycanlıların qanına batan separatçı tör-töküntülərinin bir neçəsinin Bakıya gətirildiyinin, barələrində cinayət işi açıldığının şahidi olduq. Onlardan biri də Xaçatryan Vaqif Çerkezoviçdir.
Yayılan rəsmi məlumata görə, qanunsuz erməni silahlı birləşmələrinin üzvləri tərəfindən Xocalı rayonunun Meşəli kəndində soyqırımı törətməkdə təqsirləndirilən Xaçatryan Vaqif Çerkezoviçin cinayət işi üzrə məhkəmənin hazırlıq iclasının vaxtı bilinib.
Məhkəmənin hazırlıq iclası oktyabrın 13-nə təyin edilib.
Cinayət işi Bakı Hərbi Məhkəməsində hakim Camal Ramazanovun icraatında araşdırılacaq.
İş üzrə 59 nəfər zərərçəkmiş qismində tanınıb.
Qeyd edək ki, Meşəli soyqırımı ilə bağlı beynəlxalq axtarışda olan Ermənistan vətəndaşı Xaçatryan Vaqif Çerkezoviç bu ilin iyulunda Laçın sərhəd-keçid məntəqəsində saxlanılıb.
Ona qarşı Cinayət Məcəlləsinin 103-cü (Soyqırımı-hər hansı milli, etnik, irqi və ya dini qrupu, bir qrup kimi bütövlükdə və ya qismən məhv etmək məqsədilə qrup üzvlərini öldürmə, qrup üzvlərinin sağlamlığına ağır zərər vurma və ya onların əqli qabiliyyətinə ciddi zərər vurma) və 107-ci (Əhalini deportasiya etmə və ya məcburi köçürmə-əhalini qanuni yerləşdiyi yerlərdən başqa ölkəyə qovma və ya digər məcburi hərəkətlərlə didərgin salma) maddələri ilə ittiham elan olunub, barəsində həbs qətimkan tədbiri seçilib.
Təbii ki, həmişə olduğu kimi, bu dəfə də erməni mediası V.Xaçatryanı “xəstə, yazıq şəxs” kimi qələmə verib və onun həbsini, haqqında qaldırılan cinayət işini “qanunsuz” adlandırıb. Əlbəttə, bu, növbəti erməni həyasızlığından başqa bir şey deyil.
Vaqif Xaçatryanın məhkəməsini açıq keçirmək olarmı? Nəzərə alsaq ki, onun əli Meşəli sakinlərinin qanına batıb, bu mənada onun məhkəməsi açıq keçirilə bilərmi ki, ictimaiyən nümayəndələri gedib orada iştirak edə bilsinlər?
“Polisə Dəstək” İctimai Birliyinin sədri, hüquqşünas Şəmsəddin Əliyev “Bakı-Xəbər”ə şərhində bildirdi ki, digər canilər kimi, V.Xaçatryana da ən ağır cəza verilməlidir. “Çox istərdim ki, bunların işinə beynəlxalq hərbi tribunalda baxılsın. Məlumdur ki, onlar Azərbaycan Respublikasının qanunvericiliyi ilə mühakimə ediləcək, onlara layiq olduqları cəza veriləcək. Bizim ölkənin konstitutsiyasının 27-ci maddəsində hansı halda yaşamaq hüququna xitam vermək, yəni ölüm hökmünü tətbiq etmək olar məsələsi var. Ölüm hökmünü bərpa etmək mümkündür. Bizdə ölüm hökmü qadağan olunmayıb, müvəqqəti olaraq moratorium qoyulub. İki dəfə ölkə konstitutsiyasına əlavə və dəyişikliklər olunsa da, 27-ci maddəyə heç bir əlavə və dəyişiklik edilməyib. Yəni dövlətin konstitusion quruluşu əleyhinə və vətəndaşların həyat və sağlamlıqları əleyhinə xüsusilə ağır cinayətlərə görə ölüm hökmünü tətbiq etmək olar. Konstitusiya belə də verir. Bizim müvafiq qanunlarla onlara ömürlük düşür. Amma bu barədə əvvəlcədən proqnoz vermək olmaz. Bu barədə məhkəmə qərar verəcək. Mən bir Azərbaycan vətəndaşı olaraq deyirəm, bütün ictimaiyyətin iştirak edə biləcəyi açıq bir məhkəmə prosesi olarsa daha yaxşı olar. Mən məhkəmənin açıq keçirilməsinin tərəfdarıyam. Dünya da görsün ki, onun əli nə qədər dinc azərbaycanlının qanına batıb. Bütün dünya Meşəli sakinlərinin qatilini tanımalıdır” - deyə qeyd edən Ş.Əliyevin sözlərinə görə, məhkəmə açıq keçirilərsə, çəkiliş vasitəsilə hər tərəfə yayılar və hər kəs görər ki, biz beynəlxalq hüququn humanist prinsiplərə söykənən tələblər daxilində addımlar atırıq, amma bunların bizə qarşı etdiyi qeyri-insani rəftarı, işgəncələri, xüsusi amansızlıqla davam etmiş hərəkətlərini unutmalı deyilik. “Təbii ki, mən bir Azərbaycan vətəndaşı kimi separatçılara ölüm hökmünün tətbiq edilməsini istərdim. Buna konstitutsiyamızın müvafiq bəndi də imkan verir. Dövlətimiz nəyə görə əli xalqımızın qanına batan və cinayətləri faktlarla sübut olunan separatçılara xərc çəkib onları ömürlük məhkum kimi saxlasın? Onların cinayətləri hər kəsə məlumdur, hər şey aşkardır. Heç istinitaqın da uzun sürməsinə ehtiyac yoxdur. Sosial ədalət o zaman bərpa olunacaq ki, onlara bütün dünyanın gözü qarşısında beynəlxalq hərbi tribunal qurulsun. Necə ki, Nürnberq Tribunalında faşist Almaniyasının liderləri, hərbi-siyasi rəhbərliyi mühakimə olunmuşdu, bunlar da o cür mühakimə olunmalıdır” - deyə qeyd edən Ş.Əliyev təəssüflə qeyd etdi ki, beynəlxalq məhkəmə azərbaycanlılara qarşı cinayət işləmiş canilərə qarşı bu məhkəməni qurmadı. “Amma bu özü Azərbaycana prosessual imkanlar verir ki, bunları biz özümüz mühakimə edək. Onları biz özümüz mühakimə edəcəyik. Vaqif Xaçatryana da, o biri canilərə də törətdikləri soyqırımlara, insanlıq əleyhinə müharibə cinayətlərinə görə ömürlük həbs vermək mümkündür” - deyə Ş.Əliyev əlavə etdi.
İradə SARIYEVA
