ABŞ-ın baş prokuroru Merrik Qarland Tehranın aparıcı tənqidçilərindən biri olan amerikalı jurnalistə qarşı İranın arxasında olduğu qətl planı ilə bağlı ən azı üç nəfərin ittiham olunduğunu açıqlayıb.
Hadisədə təqsirləndirilən 3 nəfərin məhkəmə qarşısına çıxarılacağını bildirən Qarland, bu ittihamların İran hökumətinin, İran əsilli ABŞ vətəndaşı olan jurnalist, yazar və insan haqları müdafiəçisinə qarşı ABŞ torpaqlarında sui-qəsd cəhdləri ilə bağlı davam edən istintaqdan qaynaqlandığını deyib.
Qarland ittiham aktında sui-qəsd planının təfərrüatlarını açıqlayaraq deyib ki, İran rejimi Şərqi Avropada cinayət təşkilatının üzvü olan və İranla əlaqəsi olduğu iddia edilən Rafət Əmirovu qətllə bağlı görəvləndirib, Əmirov isə Polad Omarov və Xalid Mehdiyevə cinayəti həyata keçirməyi tapşırıb. Mehdiyevin 2022-ci ilin iyulunda sözügedən jurnalistin Nyu-Yorkdakı evinin yaxınlığında hücum silahı və sursatla tutulduğu barədə məlumatı paylaşan Qarland Omarovun da ABŞ-a ekstradisiya edilmək üçün “xarici tərəfdaşların” nəzarətində olduğunu qeyd edib.
FTB direktoru Kristofer Rey isə, yalnız son bir neçə ildə İranla əlaqəli insanların ABŞ-da bir uşaq xəstəxanasına fidyə proqramlı hücum həyata keçirdiyini, ABŞ-ın keçmiş milli təhlükəsizlik müşaviri Mayk Pompeoya ABŞ ərazisində sui-qəsdə cəhd etdiyini və indi də ABŞ vətəndaşı olan jurnalistə qarşı cinayət planı hazırladığını bildirib.
Qarland və Sallivan açıqlamalarında hədəfə alınan şəxsin adını çəkməsələr də, sözügedən jurnalistin 2021-ci ildə İran kəşfiyyatçıları tərəfindən qaçırılmaq istəndiyi iddia edilən Məsih Əlinejad olduğu güman edilir.
Nyu York Federal Məhkəməsi tərəfindən açıqlanan iddianamədə 4 iranlının Əlinejadı qaçırmaq planlarında ittiham olunduğu, şübhəlilərin Əlinejadı İrana keçirmək üçün Bruklin sahilindəki bir məhəllədən onu hərbi tipli sürətli qayıqla Venesuelaya aparmaq istədikləri bildirilib.
ABŞ rəsmi dairələri Tehran rejimini tənqid edən jurnalisti qaçırmaq istəyən 4 nıfərin hamısını iranlı kimi təqdim edir. Ancaq həmin adamlardan 3-nün adı və soyadından onların bizim azərbaycanlılardan olduğuna dair ilkin qənaət yaranır. Biz axtarış sistemlərində bu adamlarla bağlı axtarış versək də, heç bir məlumata rast gəlmədik. Belə qənatə gəlmək olarmı ki, İran bu çirkin əməllərinə bizim vətəndaşlarımızı da cəlb edib?
Media məsələləri üzrə ekspert Müşfiq Ələsgərli “Bakı-Xəbər”ə açıqlamasında bildirdi ki, burada faktların araşdırılmasına ehtiyac var: “Verilmiş informasiyada detallı bilgilər açıqlanmır. Bu baxımdan məsələyə bir az ehtiyatlı yanaşmaqda zərurət var. Məsələnin ikinci tərəfi ondan ibarətdir ki, yaşadığımız region, ümumilikdə Canubi Qafqaz fonunda da Azərbaycan hazırda diqqət mərkəzindədir. Həm Qarabağ sülh danışıqları üzərində məsələlər, Ermənistanla olan problemlər, eyni zamanda İranla olan problemlər baxımından kənardan təxribatçı informasiyalar verilib, münasibətlərin fərqli məcraya yönəldilməsinə cəhd də ola bilər. O baxımdan biz bu və digər informasiyalara hazırda ehtiyatlı yanaşmağa məcburuq ki, yaranmış durumlardan kimsə təxribat üçün istifadə etməsin. Amma məsələnin başqa bir tərəfi də odur ki, İranın terrorçu dövlət olduğu, özünün bütün siyasətini terror aktları üzərində qurduğu, Azərbaycana yanaşması da bu məqsədlə olduğu üçün, təbii ki, hansısa anlaqsız, ictima - siyasi düşüncəsi yerində olmayan şəxslərdən müəyyən çirkin məqsədlər üçün istifadə cəhdləri də ola bilər. Yeri gəlmişkən deyək ki, biz bunun nümunələrini də öncədən görmüşük. Biz neçə illərdir deyirik, Avropada, digər məkanlarda məskunlaşan, Azərbaycana qarşı əks təbliğat aparan qrupların özlərində də dərin araşdırmalar aparanda burada İran xətləri görünür. Yəni İranın ictimai - siyasi düşüncəsi yerində olmayan, yetkin təfəkkürü olmayan, hansısa ehtiyac meyarına görə təsirə düşə bilən şəxslərdən faydalanması, həm digər ölkərdə aksiyalar törətməsi, həm Azərbaycanın özünə qarşı təxribat törətməsi mümkün versiyadır. O baxımdan da bu məsələlərə kifayət qədər həssas yanaşmaq lazımdır. Əgər araşdırmalar göstərərsə həqiqətən İran bu məsələlərdə Azərbaycan vətəndaşlarını ələ alıb digər ölkələrə qarşı təxribatçı əməllərdə istifadə edir, bunun da qarşısı alınmalıdır və cəmiyyətə çatdırılmalıdır ki, ayıq olsunlar. Görsək ki, ölkələr bu cür məsələlərdə Azərbaycan vətəndaşlarının adını hallandırıb münasibətləri başqa istiqamətə yönəltmək istəyirlər, buna qarşı da adekvat reaksiya verilməlidir. Hələlik kifayət qədər sensasiyalı məsələlərə, hesab edirəm ki, dərinə qədər araşdırıb, sonra münasibət bildirmək daha yaxşı olardı”.
Məhəmmədəli QƏRİBLİ
