Ermənistanda yaxın zamanda qadınların könüllü olaraq orduya hərbi xidmətə çağırılması planlaşdırılır. Bu barədə Ermənistanın baş naziri Nikol Paşinyan qeyd edib.
O bildirib ki, yaxın zamanlarda Ermənistan Respublikasında tamamilə yeni qadınların könüllü müvəqqəti hərbi xidmət institutunun tətbiqi planlaşdırılır.
Maraqlıdır, Ermənistan rəhbərliyinin belə bir addım atması hansı tələbatdan irəli gəlir? Ermənistanda orduya çağırmağa kişi çatmır, yoxsa bu ölkə qadınları orduya cəlb etməklə özü haqqında sivil ölkə obrazı yaratmaq istəyir? Ümumiyyətlə, məlum məsələ ilə bağlı Ermənistanın hədəfi nədən ibarətdir?
“Ermənistan rəhbərliyi kişilərdən ibarət normal ordu qura bilmədiyinin fərqinə vardığı üçün son çarəni qadınları orduya cəlb etməkdə görür”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Ermənistan rəhbərliyinin qadınları könüllü orduya çağırmaq istəyi orda kişilərin çatışmaması ilə bağlı deyil. Sadəcə olaraq, kişi cinsindən olanlar 44 günlük savaş günlərində Azərbaycan ordusunun qarşısında o qədər çarəsiz, yazıq vəziyyətdə oldular ki, Ermənistan cəmiyyətinin onlara güvəni yoxdur. Ermənistan cəmiyyətinin orduda olan kişilərə güvəninin, inamının olmamasını sübut edən çoxlu sayda faktlar var: “Belə ki, Ermənistan Baş Prokurorluğunun yaydığı məlumatda qeyd edilir ki, 13 mindən çox kişi cinsindən olan vətəndaş ordudan fərarilik etdiyi üçün onlar haqqında cinayət işi açılıb. Bu fakt ondan xəbər verir ki, erməni kişiləri kişi kimi meydana çıxıb vuruşacaq ürəyə sahib deyillər. Bu səbəbdən də Ermənistan rəhbərliyi belə bir qənaətə gəlib ki, kişilərdən nicat, ümid olmadığı üçün bəlkə qadınlar nəsə edər. Bu baxımdan hesab edirəm ki, Ermənistan rəhbərliyi qadınların orduya cəlb edilməsi qərarını verib”.
Həmsöhbətimiz onu da əlavə etdi ki, qadınları orduya cəlb etməklə dünyaya demokratik görünmək fikri Ermənistan üçün düzgün olmaz. Çünki dünya ölkələrinin böyük əksəriyyətində, ümumiyyətlə, qadınların orduya cəlb edilməsi deyə bir şey yoxdur. Və orduya qadınları almayanları da heç kim barmaqarası baxmır, qınamır: “Hesab edirəm ki, Ermənistan rəhbərliyi kişilərdən ibarət normal ordu qura bilmədiyinin fərqinə vardığı üçün son çarəni qadınları orduya cəlb etməkdə görür. Yəni kişilər vuruşa bilmədiyi üçün onların yerinə anaları, bacıları, həyat yoldaşları, qızları gedib ordu yaradıb, döyüşməlidir.
Günel CƏLİLOVA
