Tehrandakı səfirliyimiz təxliyə edildi, səfirlikdə diplomatik nümayəndəliyin inzibati binasının və əmlakının mühafizəsi üçün beş əməkdaş qalıb. Münasibətlər konsulluq xidməti səviyyəsində olacaq.
Xarici işlər nazirinin müavini Xələf Xələfovun açıqlamasından bəlli olur ki, səfirliyin təhdid edilməsi ilə bağlı İran tərəfinə dəfələrlə məlumat verilib. Amma müraciətlərə və təhlükəsizliklə bağlı tələblərə etinasız yanaşılıb. Baş vermiş teraktdan sonra belə Tehranın davranışları ikitərəfli münasibətləri düzəltmək, diplomatik etiketlərə əməl etmək istəyindən çox uzaqdır. Yəni adətən, diplomatik gərginliyə səbəb olmuş bir hadisədən sonra bu gərginliyin yumşalmasına xidmət edəcək üslub gözlənilmir, addımlar atılmır.
Terror versiyası birmənalı istisna edilir, məişət zəmini versiyasında israr edilir. Rəsmi qurumlara yaxın KİV Azərbaycanı məhz məişət zəmini versiyasını qəbul etmədiyinə görə ağır dillə ittiham edir. Bəzi ittihamlarda itdiyi iddia olunan, məşiət zəmini versiyasının əsas personajı olan Gülnarə Əliyevanın oğurlanıb səfirliyin dördüncü mərtəbəsində saxlandığı və ya "Cəmal Xaşuqçi kimi əridildiyi" kimi yersiz fikirlər də yer alır.
Azərbaycanın İrandakı səfirliyinin fəaliyyəti bərpa oluna bilərmi və bunun üçün İran hansı addımları atmalıdır?
Politoloq Qabil Hüseynli “Bakı-Xəbər”ə açıqlamasında bildirdi ki, səfirliyin bütün şəxsi heyəti ailə üzvləri ilə birlikdə Bakı şəhərinə çağırılıb: “İrandakı Azərbaycan səfirliyi, demək olar ki, fəfliyyət göstərmir. Yalnız Təbriz şəhərində olan konsulluğumuz öz fəaliyyətini davam etdirəcək. Azərbaycan səfirliyinin işləmədiyi dönəmdə bizim maraqlarımızı həmin ölkədə qorumağı hansısa bir ölkənin diplomatik korpusuna tapşıra bilərik. Zənnimcə, bu, qardaş Türkiyənin İrandakı səfirliyi olacaq. Azərbaycan tez bir zamanda səfirliyin fəaliyyətini bərpa etməyi düşünmür. İki ölkə arasında diplomatik münasibətlər pozulmayıb, sadəcə olaraq Azərbaycan oradan öz səfirliyini geri çağırıb. Bunun da səbəbləri aydındır. Bu ölkə dünya miqyasında terrorçuluğu dəstəkləyir. Çox açıq-aydın şəkildə isbat olinur ki, səfirliyə hücum İranın siyasi dairələrinin himayəsi ilə hazırlanıb. Onun həyata keçirilməsi üçün hər cür şərait yaradılıb və demək olar ki, İranın hüquq-mühafizə orqanları susqunluq nümayiş etdirib. Biz bunu nümayiş edilən kadrlardan da görürük. İran baş verən hadisələrin əsl mahiyyətini təhrif edir. Bunun güya məişət zəminində olması barədə gülünc iddialar ortaya qoyur. Onlar mütləq mənada Azərbaycan dövləti və onun xalqından üzr istəməlidirlər. Görünən budur ki, buna riayət etmək istəmirlər. Azərbaycan da bunun müqabilndə çox doğru addım atıb. Nə qədər ki, İran tərəfi düzgün tədqiqat aparıb, Azərbaycan səfirliyinə hücumü təşkil edənləri müəyyən edib Azərbaycandan üzr istəməyəcək, Azərbaycan tərəfi səfirliyin fəaliyyətini bərpa etməyəcək. İran artıq bütün dünya ilə münaqişədədir, ona qarşı hərbi əməliyyatların ilkin mərhələsi həyata keçirilib. Hərbi əməliyyatlar bundan sonra da davam edəcək. Əməliyyatların birinci mərhələsi İsrail tərəfindən həyata keçirilib. Sonrakı mərhələdə ABŞ-ın da prosesə qoşulacağını təxmin etmək olar. Çünki ABŞ-ın özü də belə bir addım ata biləcəyini istisna etmir. Göründüyü kimi, hər şey İran tərəfindən asılıdır. Onların səmimi mövqeyi varsa, yalanı kənara qoyub, hadisə ilə bağlı doğru məlumat versinlər. Bunlar olmayacaqsa, səfirliyimizin fəaliyyətindın danışmağa dəyməz”.
Məhəmmədəli QƏRİBLİ
