Bütöv Azərbaycan Ocaqlarının İranda Azərbaycan səfirliyinə olan terror hücumu ilə bağlı bəyanat yayıb. Bəyanatda vurğulanır: “27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub.
Hücum edən terrorçu şəxs kalaşnikov markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar.
Artıq uzun müddətdir ki, şovinist fars rejimi Azərbaycana qarşı aqressiv münasibət sərgiləməkdə davam edir. Bu terror hadisəsi şovinist fars rejiminin Azərbaycan dövlətinə və xalqına qarşı olan neqativ, aqressiv münasibətinin tərkib hissəsidir.
Biz, Bütöv Azərbaycan Ocaqları (BAO) olaraq bu terror hadisəsini şiddətlə pisləyir, terror hadisəsinin səbəbkarlarının dərhal tapılıb məsuliyyətə cəlb edilməsini tələb edirik. Terror hadisəsinin araşdırılması üçün Azərbaycan və Türkiyə hüquq-mühafizə əməkdaşlarına müvafiq tədqiqat aparma imkanı yaradılmalıdır.
Bu terror hadisəsinin bütün məsuliyyətinin istənilən halda İran İslam Respublikası rəhbərliyinin üzərinə düşdüyünü bəyan edirik. Baş verən terror hadisəsində Azərbaycanın diplomatik korpusunun mühafizəsinə cavabdeh olan İran İslam Respublikası rəhbərliyi birbaşa məsuliyyət daşıyır”.
Baki-xeber.com
