Ramil Məmmədli: “Cəzasız qalacağlarını düşündükləri üçün belə sərsəm, məsulyətsiz açıqlamalarla çıxış edirlər”
Ermənistanın baş naziri Nikol Paşinyan hökumətin iclasında Laçın dəhlizinin bağlanmasını şərh edərkən bildirib ki, guya Azərbaycan regionda yeni müharibəni qızışdırmağa çalışır: “Dağlıq Qarabağ ermənilərini öz yurdlarından qovmaq Azərbaycanın yeganə məqsədi deyil. Azərbaycan bu təxribatçı hərəkətləri ilə sülh gündəmini, sülh prosesini iflasa uğratmaq və regionda yeni müharibənin qızışdırılmasını istəyir”.
Halbuki, Paşinyandan iki gün əvvəl Ermənistan xarici işlər naziri Ararat Mirzoyan Avropa İttifaqı Parlamentinin Xarici Əlaqələr Komitəsində çıxışı zamanı Laçın yolu ətrafında yaranmış vəziyyətin müharibə yolu ilə həll edilməsinə dair təkliflə çıxış edib. Göründüyü kimi, Ermənistan özü müharibəni istədiyi halda, Paşinyan Azərbaycanı bunda ittiham edir. Mirzoyan Laçın yolu ilə bağlı müharibə təklifi ilə çıxış edir, bu tərəfdən də Paşinyan tamamilə əks və ziddiyətli fikir səsləndirir. Azərbaycanı müharibəyə hazırlaşmaqda ittiham edir. O baxımdan Mirzoyan və Paşinyanın bəyanatlarının bir-birinə zidd olması Ermənistanın sülh istəmədiyini və ziddiyətli siyasət yürütdüyünü sübut edən növbəti faktordur.
- “Bütün bunlar Ermənistanın dövlət olmadığı reallığını ortaya qoyur”
Məsələyə münasibət bildirən hərbi ekspert Ramil Məmmədlinin fikrincə, bütün bunlar Ermənistanın dövlət olmadığı reallığını ortaya qoyur: “Çünki Ermənistan dövlət deyil. Ermənistan sadəcə, beynəlxalq bir layihədir. Yəni maşa kimi region ölkələrinə qarşı istifadə olunsun. Bunlar dövlət olsaydılar, iki ölkə rəsmisi üç gün ərzində bu cür bir-birinə zidd fikirlər səsləndirməzdi. Məsələ ondadır ki, ermənilər tarixən böyük dövlətlərə sığınıblar. Hansı güclü olubsa, sonra onun tərəfinə keçiblər. Prinsipcə, dəyişən bir şey yoxdur. Məlum olduğu kimi, Laçın yolu ətrafında erməni tərəfi böyük şou yaradıb. Guya ki, Qarabağdakı etnik ermənilər blokadada boğulur. Bundan istifadə edərək Ermənistan rəsmiləri məsuliyyətsiz, isterik bəyanatlarla çıxış edirlər. “Ermənilər etnik təmizləməyə məruz qalırlar, ay aman, blokada var” tipli əsatirlər adi hal alıb. Bu kimi yalanlar Azərbaycanı o qədər də düşündürmür. Çünki Qarabağda nə blokada var, nə də hansısa erməniyə qarşı etnik mənsubiyyətinə görə ayrıseçkilik edilir. Azərbaycanın işi Qarabağ torpaqlarından qanunsuz məqsədlərlə istifadə olunmasının, sərvətlərimizin talanmasının qarşısını almaqdır. Ermənistan hakimiyyəti elə hesab edir ki, Laçın yolu ətrafında formalaşdırdıqları yalançı rəy Azərbaycana yönəlik beynəlxalq təzyiqləri gücləndirəcək. Son nəticədə onlar öz məqsədlərinə çatacaqlar. Bir il, bir il yarım əvvəl erməni rəsmiləri belə cəsarətlə danışa bilmirdilər. Müharibə sözünü heç dillərinə belə gətirmirdilər. Ötən il həyata keçirilən “Qisas” əməliyyatı və sentyabr döyüşlərində Ermənistana güclü zərbə endirilsə də, bu onlara dərs olmayıb. Çünki Fransa açıq şəkildə Ermənistanı qızışdırır. Üstəlik, beynəlxalq qurumların nə ərazilərimiz işğal altında olan dövrdə, nə də ondan sonra Ermənistanı cəzalandırmamaları Paşinyan hakimiyyətini cəsarətləndirir. Mirzoyan bir söz deyir, Paşinyan tamamilə başqa bir söz. Ancaq buna hansısa formada beynəlxalq qınaq yoxdur. Cəzasız qalacağlarını düşündükləri üçün belə sərsəm, məsulyətsiz açıqlamalarla çıxış edirlər. Hesab edirəm ki, belə çıxışlarla Ermənistan Qarabağla bağlı mənfur planlarını reallaşdıra bilməyəcək. Çünki güclü Azərbaycan buna imkan verməz”.
Vidadi ORDAHALLI
