Vüqar Rəhimzadə: “Kanada parlamentinin məlum qərarı ermənilərə tərs şillə oldu”
Kanadadan Ermənistana gözlənilməz zərbə. Ermənilər Kanada parlamentindən Laçın yolundakı vəziyyətlə bağlı dəstək əldə edə bilməyiblər.
Belə ki, erməni diasporu ölkə parlamentində Azərbaycanın hərəkətlərini pisləmək məqsədilə Laçın yolunda vəziyyətlə bağlı müzakirələr aparılması təşəbbüsü irəli sürüb. Parlamentin Beynəlxalq Əlaqələr Komitəsindəki dinləmələrdə Kanada xarici işlər nazirinin katibi Robert Olifant çıxış edib. Olifant 3 dinləmədən birincisində Kanadanın beynəlxalq səviyyədə tanınmış sərhədlər daxilində Azərbaycanın ərazi bütövlüyünü tanıdığını və onun ərazisində qeyri-legitim qurumları tanımadığını bildirib. Eyni zamanda o, hazırki vəziyyətin çoxillik münaqişənin bir hissəsi olduğunu və problemə bu kontekstdə baxılmalı olduğunu nəzərə almağa çağırıb. Həmçinin o, Laçın yolunda baş verənləri humanitar fəlakət və mühasirə adlandırmazdan əvvəl orada baş verənləri araşdırmaq lazım olduğunu qeyd edib.
Yeri gəlməşkən onu da qeyd edək ki, bu, son aylar ermənilərin növbəti uğursuzluğudur. Məsələn, ötən il Frankafoniya konfransında Azərbaycanın əleyhinə bəyanat qəbul etməyə cəhd etdilər, amma alınmadı. Tədbirdə iştirak edən bir sıra dövlətlər buna imkan vermədilər. Daha sonra Qarabağla bağlı BMT Təhlükəsizlik Şurasında məsələ qaldırdılar. Ancaq bir neçə dəfə səsvermə olsa da, ermənilərin təklifi keçmədi. Nəticədə məcbur qalıb müraciəti geri götürdülər. Bütün bunların davamı olaraq Kanadada da uğursuzluqla üzləşdilər.
- “Bu ölkə separatizmdən əziyyət çəkdiyi üçün bunun necə təhlükəli bir tendensiya olduğunu yaxşı bilir”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, bütün bunlar onu göstərir ki, dünya, o cümlədən Kanada erməni lobbisinin yalanlarına alət olmaq istəmir: “Bəli, Frankafoniya tədbirində, BMT Təhlükəsizlik Şurasının iclasında Ermənistan fiasko ilə üzləşdi. Ancaq bu onlara dərs olmadı. Növbəti pozuculuq təşəbbüsləri ilə çıxış etməyə başladılar. Xüsusən də Fransanın fitnəkarlığı Ermənistanı daha da ruhlandırdı. Ermənilər uzun illər riyakarcasına saxta, yalan informasiyalarla dünyanı çaşdırmağa cəhd ediblər. Düzdür, bəzi məqamlarda öz istəklərinə nail olublar. Bəzi dövlətlər müəyyən bəyanatlar, qurumlar səviyyəsində Qarabağ separatçılarını dəstəkləyib. Ancaq onu da nəzərə almaq lazımdır ki, yalan üzərində qurulan siyasət, təbliğat uzun çəkmir. Kanada parlamentinin məlum qərarı ermənilərə tərs şillə oldu. Ona görə ki, ermənilər bunu gözləmirdilər. 44 günlük Vətən müharibəsində Kanadanın bəzə yönəlik ədalətsiz addımları erməniləri arxayın salmışdı. Ancaq elə məsələlər var ki, orada dövlət maraqları prioritet təşkil edir. Məsələ ondadır ki, Kanada separatizmdən əziyyət çəkdiyi üçün bunun necə təhlükəli bir tendensiya olduğunu yaxşı bilir. Ona görə də ermənilərə öz yerini göstərdilər. O mənada ki, Kanada separatçıların, separatizm meyllərinin yanında olmadığını göstərdi. Biz nəzərə almalıyıq ki, Kanada sıradan bir ölkə deyil. Böyük 7-lərdə təmsil olunur, Böyük Britaniya ilə məxsusi müttəfiqliyə malikdir. Bu, həm də onu göstərir ki, Kanada reallığı dərk edir. Erməni yalanlarına alət olmaq istəmir. Qarabağda separatçılara hansısa formada həyan olmaq Kanadanın dövlətçiliyini təhdid edir. Bir vaxtlar Ermənistanı müdafiə edən bəzi dövlətlər bir növ aldandıqlarının fərqindədilər”.
Bir sözlə, Vüqar Rəhimzadə Kanada parlamentinin bu addımını müsbət dəyərləndirdi.
Vidadi ORDAHALLI
