Dünyadan Azərbaycanın Tehran səfirliyinə terror hücumuna sərt təpkilər gəlməkdə davam edir...
Bu səhər Azərbaycanın Tehran səfirliyinə silahlı hücumu pisləyirik. Bu hücumda həyatını itirən səfirliyin əməkdaşlarına Allahdan rəhmət, yaralananlara isə şəfa diləyirik. Bu barədə Türkiyə Xarici İşlər Nazirliyinin bəyanatında deyilir.
"Keçmişdə də bənzər hücumlara məruz qalan Türkiyə, Azərbaycan xalqının ağrısını dərindən anlayır və bölüşür. Bu alçaq hücuma görə məsuliyyət daşıyanların dərhal tapılıb məsuliyyətə cəlb edilməsi və təkrarlanmaması üçün bütün lazımi tədbirlərin görülməsi böyük əhəmiyyət kəsb edir.
Qardaş Azərbaycan heç vaxt tək deyil. Azərbaycana dəstəyimiz həmişə olduğu kimi, fasiləsiz olaraq davam edəcək", - deyə bəyanatda qeyd edilib.
“Azərbaycanın Tehrandakı səfirliyinə hücumla əlaqəli olaraq Azərbaycan tərəfinə dərin hüznlə başsağlığımızı bildiririk”. Bu barədə isə Rusiya Xarici İşlər Nazirliyinin Azərbaycanın İrandakı səfirliyində baş verən terror aktı ilə əlaqəli bəyanatında deyilir.
"Daxil olan məlumata əsasən, bu gün səhər saatlarında silahlı şəxs səfirliyin binasına daxil olaraq atəş açıb. Nəticədə Azərbaycan Respublikasının səfirliyinin bir əməkdaşı həlak olub, iki əməkdaş isə yaralanıb. Hücum edən şəxs Tehran polisi tərəfindən saxlanılıb, istintaq aparılır. Bütün təqsirkarların məsuliyyətə cəlb olunacağına ümid edirik. Baş verən hadisə dövlətlərin Diplomatik Əlaqələr haqqında 18 aprel 1961-ci il tarixli Vyana Konvensiyasına əsasən ərazilərində fəaliyyət göstərən diplomatik nümayəndələrin təhlükəsiz fəaliyyətini təmin etməsinin vacibliyini bir daha təsdiqlədi", - bəyanatda deyilir.
Gürcüstan Xarici İşlər Nazirliyi də Azərbaycanın İrandakı səfirliyinə hücumu qətiyyətlə pisləyib. "Hər hansı diplomatik nümayəndəliyə qarşı hər hansı zorakılıq hərəkəti tamamilə qəbuledilməzdir. Faciə qurbanının ailəsinə başsağlığı veririk", - deyə qeyd edilib.
Slovakiya da Azərbaycanın Tehrandakı səfirliyinə bugünkü silahlı hücumu kəskin şəkildə qınayır. Bu barədə Slovakiya Respublikasının Xarici İşlər Nazirliyinin tvitter səhifəsində deyilir.
"Həlak olan səfirlik əməkdaşının ailəsinə və yaxınlarına dərin hüznlə başsağlığı verir, yaralananlara şəfa diləyirik", - məlumatda deyilir.
Gürcüstan, Ukrayna, Azərbaycan və Moldovanı birləşdirən regional təşkilat - GUAM Azərbaycanın İrandakı səfirliyində törədilən və səfirliyin əməkdaşının ölümü ilə nəticələnən terror aktını kəskin şəkildə pisləyib.
"Azərbaycanın İranın Tehran şəhərindəki səfirliyində törədilmiş və səfirliyin əməkdaşının ölümü ilə nəticələnən terror aktını kəskin şəkildə pisləyir, həlak olanın ailəsinə, səfirliyin əməkdaşlarına və Azərbaycana dərin hüznlə başsağlığı verir, xəsarət alanların tezliklə sağalmasını diləyirik.
GUAM Katibliyi olaraq Azərbaycan Respublikası ilə qəti həmrəy olduğumuzu bildirir, bu xain terror aktını törədənlərin və sponsorlarının məsuliyyətə cəlb olunmasını tələb edirik", - deyə təşkilatın yaydığı bəyanatda bildirilib.
“Azərbaycanın İrandakı səfirliyinə bu namərd hücum bizi dərindən qəzəbləndirib”. Bu barədə İtaliyanın Azərbaycandakı səfirliyi "Twitter"də bildirib.
"Həlak olanların ailəsinə dərin hüznlə başsağlığı verir. Yaralıların tezliklə sağalmasını arzulayaraq, təhlükəsizlik işçilərinin çevik və cəsarətli reaksiyasına heyran olduğumuzu bildiririk", - deyə qeyd edilib.
Avropa Şurasının Baş katibi Mariya Peyçinoviç-Buriç də Azərbaycanın Tehrandakı səfirliyinə edilən hücumu pisləyib.
“Diplomatik missiyalara qarşı hücumlar qəbuledilməzdir. Azərbaycanla həmrəy olduğumu və həlak olanlara başsağlığımı bildirirəm”, - deyə o tvitter hesabında bildirib.
Moldovanın Xarici İşlər Nazirliyi də Azərbaycanın İrandakı səfirliyinə təşkil edilən terror hücumu ilə bağlı Azərbaycan xalqına başsağlığı verib.
"Moldova bu gün Azərbaycanın İrandakı səfirliyinə edilən silahlı hücumu, mühafizə rəisinin həlak olması və iki mühafizəçinin yaralanmasını qətiyyətlə pisləyir", - nazirliyin paylaşımında deyilir.
Azərbaycanın İrandakı səfirliyinə hücumu qətiyyətlə pislədiyini deyən Latviya Respublikasının Xarici İşlər Naziri Edqars Rinkeviçs tvitter hesabında qeyd edib ki, diplomatik nümayəndəliklərə qarşı zorakılıq hərəkətləri tamamilə qəbuledilməzdir: “Həlak olanın ailəsinə başsağlığı verirəm".
Səudiyyə Ərəbistanı Krallığının Xarici İşlər Nazirliyi də İranın paytaxtı Tehranda Azərbaycan Respublikasının səfirliyinə silahlı hücumu şiddətlə pislədiyini bildirir.
"Səudiyyə Ərəbistanı Krallığının Xarici İşlər Nazirliyi Krallığın dost Azərbaycan Respublikası və xalqı ilə bu çətin gündə həmrəyliyini təsdiq edir və Diplomatik missiyanın toxunulmazlığına hörmət etməyə və günahkarların cəzalandırılmasına çağırır", - Krallığın XİN-i tvitterdə paylaşımında deyilir.
Birləşmiş Ərəb Əmirlikləri (BƏƏ) İranın paytaxtı Tehranda Azərbaycan Respublikasının səfirliyinə qarşı törədilmiş terror aktını qətiyyətlə pisləyir.
Bu barədə BƏƏ Xarici İşlər Nazirliyinin bəyanatında deyilir: "BƏƏ bu cinayət əməllərini qətiyyətlə pisləyir və təhlükəsizlik, sabitliyə xələl gətirməyə yönəlmiş hər cür zorakılıq və terrorizmi rədd edir. Diplomatik işi tənzimləyən qaydalara və nizamnamələrə uyğun olaraq diplomatik nümayəndəliklərin mühafizəsini təmin etmək lazımdır".
Nazirlik, həmçinin bu ağır cinayət nəticəsində həlak olan Azərbaycan Respublikası hökumətinə və Azərbaycan xalqına, səfirliyin əməkdaşının ailəsinə dərin hüznlə başsağlığı verib, yaralananların tezliklə sağalmasını arzulayıb.
Niderland XİN-in tvitter hesabında isə qeyd edilib ki, Niderland Azərbaycanın İrandakı səfirliyinə bu gün baş verən zorakı hücumu pisləyir.
"Diplomatik nümayəndəliklərə və şəxsi heyətə qarşı hər hansı hücum tamamilə qəbuledilməzdir. Həlak olanın ailəsinə başsağlığı verir, yaralananlara isə tezliklə şəfa diləyirik", - məlumatda deyilir.
Qazaxıstan da Azərbaycanın Tehrandakı səfirliyinə diplomatik nümayəndəliyin əməkdaşlarının ölümü və yaralanması ilə nəticələnən hücumu qətiyyətlə pisləyir.
"Qazaxıstan diplomatik nümayəndəliklərə və onların nümayəndələrinə qarşı hər hansı zorakılıq təzahürü və təcavüz aktını qəbuledilməz hesab edir. Hesab edirik ki, bu cür hücumlar beynəlxalq hüququn əsaslarını və normalarını pozur və ümumbəşəri qınaq obyektidir. Biz qardaş Azərbaycan xalqına səmimi başsağlığı veririk, o cümlədən həlak olmuş Azərbaycan Respublikasının vətəndaşı Orxan Əsgərovun ailəsi və yaxınlarına başsağlığı veririk. Xəsarət alanlara tezliklə şəfa diləyirik. Əminik ki, İran İslam Respublikasının hakimiyyət orqanları faktla bağlı hərtərəfli araşdırma aparacaq və hadisəni törədənlərin cəzalandırılması üçün müvafiq tədbirlər görəcək”, - Qazaxıstan Xarici İşlər Nazirliyinin məlumatında deyilir.
İordaniya XİN də Azərbaycanın İrandakı səfirliyinə terror hücumu ilə bağlı Azərbaycana başsağılığı verib: "İordaniya Xarici İşlər və Mühacir məsələləri Nazirliyi bu gün Azərbaycan Respublikasının İranın paytaxtı Tehrandakı Səfirliyinin əməkdaşlarının məruz qaldıqları hücumun qurbanları ilə əlaqədar Azərbaycan Respublikasının hökuməti və xalqına dərin hüznlə başsağlığını ifadə edir.
Nazirlik Krallığın Azərbaycan Respublikasının hökuməti və xalqı ilə həmrəyliyini, xüsusən də diplomatik nümayəndəliklərin binalarını və orada çalışanları hədəfləyən zorakılığın bütün formalarını rədd etdiyini xüsusi qeyd edir, həlak olan şəxsin ailəsinə başsağlığını, yaralananlara isə tezliklə şəfa tapmaq arzusunu ifadə edir".
Böyük Britaniya səfirliyi adından Azərbaycanın Tehrandakı səfirliyinin əməkdaşlarına dərin hüznlə başsağlığı verirəm.
Bu barədə Böyük Britaniyanın İrandakı səfiri Saymon Şerkliff öz "Twitter" hesabında yazıb.
Səfir mərhumun ailəsinə dərin hüznlə başsağlığı verib, yaralıların tezliklə sağalmasını arzulayıb.
Pakistan Xarici İşlər Nazirliyindən isə bildirilir ki, bu gün Azərbaycanın Tehrandakı səfirliyinə edilən hücumla bağlı Pakistan hökuməti və xalqı dərin kədər hissi keçirir.
“Həlak olanların ailələrinə başsağlığı verir və yaralananların tezliklə sağalması üçün dua edirik. Pakistan bu kədərli məqamda qardaş Azərbaycan xalqı ilə həmrəydir”,- deyə bildirilib.
Avropa İttifaqı da Azərbaycanın İrandakı səfirliyinə silahlı hücumla bağlı başsağlığı verib.
“Aİ Azərbaycanın İrandakı səfirliyinə hücumla bağlı Azərbaycan XİN-ə və Azərbaycan xalqına başsağlığı verir. Diplomatik nümayəndəliklərə hücumlar qəbuledilməzdir. Biz qəlbən həlak olan şəxsin ailəsinin yanındayıq. Yaralıların tezliklə sağalmasını arzulayırıq. Ətraflı istintaq aparılacağına və günahkarların məsuliyyətə cəlb olunacağına ümid edirik", - deyə Aİ-nin Xarici siyasət və Təhlükəsizlik məsələləri üzrə üzrə Ali Nümayəndəsinin sözçüsü Peter Stano tvitter hesabında bildirib.
Estoniyanın xarici işlər naziri Urmas Reinsalu Azərbaycanın Tehrandakı səfirliyinə hücumu pisləyib.
"Diplomatik nümayəndəliyə qarşı hər hansı zorakılıq hərəkəti qətiyyən yolverilməzdir. Ölənlərin ailəsinə dərin hüznlə başsağlığı verir və yaralananların tezliklə sağalmasını arzulayıram", - nazir "Twitter" səhifəsində yazıb.
Qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub. Hücum edən şəxs avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Hazırda hadisənin istintaqı aparılır.
