Azərbaycandakı dipkorpus nümayəndələri Tehran səfirliyimizə hücumu pislədi... - YENİLƏNDİ
Azərbaycanın Tehrandakı səfirliyinə silahlı basqın nəticəsində insan tələfatı və yaralananlar barədə xəbərlər məni dəhşətə gətirdi.
Bu barədə Avropa İttifaqının (Aİ) Azərbaycandakı səfiri Peter Mixalko tviterdə yazıb.
"Diplomatik nümayəndəliklərə hücumlar qəbuledilməzdir. Həlak olanların ailələrinə başsağlığı verir, yaralananların tezliklə sağalmasını arzulayıram", - deyə o bildirib.
Almaniyanın Azərbaycandakı səfiri Ralf Horleman isə tvitterdə yazıb: "Biz Azərbaycanın Tehrandakı səfirliyinə edilən ölümcül hücum xəbərindən sarsıldıq və hər cür zorakılığı pisləyirik. Düşüncələrimiz və dualarımız qurbanların ailələri ilədir".
ABŞ səfirliyi də Azərbaycan Xarici İşlər Nazirliyində çalışan həmkarlarına və onların ailə üzvlərinə Azərbaycanın Tehrandakı səfilrliyində baş verən faciəvi insidentlə bağlı dərin kədərini bildirir.
Bu barədə ABŞ səfirliyinin Facebook hesabında deyilir: "İnsident zamanı həyatını itirən Orxan Əsgərovun ailəsinə başsağlığı verir və yaralılara şəfa diləyirik".
BMT-nin Azərbaycandakı rezident əlaqələndiricisi Vladanka Andreyeva da tvitterdə Azərbaycanın İrandakı səfirliyinə edilən hücumu qətiyyətlə pisləyib.
"Mülki şəxslərə və mülki obyektlərə, o cümlədən diplomatik missiyalara qarşı hücumlar beynəlxalq humanitar hüquqa əsasən qəti şəkildə qadağandır. Mərhumun ailəsinə başsağlığı verir və yaralananlara razılaşaraq şəfa diləyirəm", - deyə o bildirib.
“Bu səhər Azərbaycanın Tehrandakı səfirliyinə edilən hücumdan dərin kədərləndim. Bunu isə Fransannı Azərbaycandakı səfiri Ann Buayon tvitter hesabında qeyd edib.
"Səfirlik adından Azərbaycan Xarici İşlər Nazirliyindəki çalışan diplomatlara və silahlı hücumda həlak olan mühafizəçi Orxan Əsgərovun ailəsinə dərin hüznlə başsağlığı verirəm", - deyə bildirilib.
İsrailin Azərbaycandakı səfiri Corc Dik isə Azərbaycanın İrandakı səfirliyinə terror hücumu ilə bağlı tviterdəki hesabında yazıb ki, İsrail səfirliyi bu çətin gündə Azərbaycan xalqı ilə həmrəydir.
Ukraynanın Azərbaycandakı səfiri Vladislav Kanevski "Facebook" hesabında bildirib ki, Azərbaycanın xaricdəki diplomatik nümayəndəliklərinə hücumlar sistematik xarakter alır.
"Təəssüf ki, Azərbaycanın xaricdəki diplomatik nümayəndəliklərinə hücumlar sistematik xarakter alır: bu gün Tehranda oxşar hadisə baş verib. Bu, dərin narahatlıq doğuran qəbuledilməz və həyasızcasına bir haldır. Azərbaycan səfirliyinə hücum faktı lazımınca araşdırılmalı, təqsirkar şəxslər məsuliyyətə cəlb edilməlidir. Cəzasızlıq yeni cinayətlərə yol açır", - deyə səfir qeyd edib.
İsveçin Azərbaycandakı səfirliyi Azərbaycanın Tehrandakı səfirliyinə hücumdan dəhşətə gəlib. “Orxan Əsgərovun ailəsinə dərin hüznlə başsağlığı verir, yaralananlara şəfa diləyirik” - İsveç səfirliyinin rəsmi "Facebook" səhifəsində edilən paylaşımda qeyd olunub
Belarusun Azərbaycandakı səfirliyindən isə bildirilib: “Tehrandakı səfirliyinin əməkdaşının vəfatı ilə əlaqədar Belarus səfirliyi Azərbaycan Xarici İşlər Nazirliyinə və vəfat edən əməkdaşın yaxınlarına başsağlığı verir, həmçinin, səfirliyin xəsarət almış əməkdaşlarının tezliklə sağalmasını arzulayır.
Litvanın Azərbaycandakı səfirliyi də Azərbaycanın İrandakı səfirliyinə təşkil edilən terror hücumu ilə bağlı Azərbaycan xalqına başsağlığı verib.
"Azərbaycanın Tehrandakı səfirliyinə insan tələfatı və yaralılarla nəticələnən silahlı hücumla bağlı yayılan xəbərlərdən dəhşətə gəldik. Diplomatik nümayəndəliklərə hücumlar qəbuledilməzdir. Həlak olanın ailəsinə başsağlığı veririk", - deyə səfirliyin tvitter hesabında bildirilib.
