Macarıstan, Rumıniya, Bolqarıstan və Slovakiya Avropaya Azərbaycan qazının tədarükü üçün infrastrukturun inkişafına vəsait ayrılması xahişi ilə Avropa Komissiyasına müraciət edib.
Bu barədə Macarıstanın xarici işlər naziri Peter Siyarto Azərbaycanın iqtisadiyyat naziri Mikayıl Cabbarovla birgə mətbuat konfransı zamanı deyib.
Nazir daha sonra bunları deyib: “Söhbət infrastrukturun inkişafından, yeni interkonnektorların inşasından və artıq mövcud olanların gücünün artırılmasından gedir. Avropa İttifaqına Azərbaycan qazının tədarükünün həcmini artırmaq üçün Avropada interkonnektorların sayı artırılmalıdır”.
P.Siyarto, həmçinin, Macarıstanın Azərbaycanın 2027-ci ilədək Aİ-yə qaz tədarükünü ikiqat artırmaq planlarını təqdir etdiyini bildirib.
Qeyd edək ki, Cənub Qaz Dəhlizinin Avropa hissəsi olan TAP vasitəsilə hər il İtaliyaya səkkiz milyard kubmetr, Yunanıstan və Bolqarıstanın hər birinə isə bir milyard kubmetr həcmində qaz nəql olunur. Dünyada təbii qazın ən iri idxalçısı olan Avropa bazarına birbaşa çıxışla Azərbaycan öz ixrac imkanlarını diversifikasiyalaşdırıb.
Bütün bunların fonunda erməni lobbisi öz təsir imkanlarından istifadə edərək buna mane olmağa çalışır. Avropada erməni lobbisinin bu hərəkətləri deməyə əsas verir ki, onlar bu layihələrin həyata keçirilməsinə maneçilik törətməyə çalışırlar. Hətta müəyyən diplomatik mənbələrdən sızan məlumatlar da onu göstərir ki, erməni lobbisi Avropa strukturlarına təsir göstərib bu layihələrin maliyyələşdirilməsini ləngitmək istəyirlər. Yəni Azərbaycan qazını satın almasınlar.
“Ona görə ki, Avroittifaq Rusiya qazından imtina edir, amma alternativ variantlar da məhduddur”
Məsələyə münasibət bildirən Yeni Yol Partiyasının sədri Ramil Hüseynovun fikrincə, prinsipcə, bu gözlənilən idi: “Ona görə ki, son vaxtlar erməni lobbisi Azərbaycana qarşı bütün təsir vasitələrini işə salıb. Ard-arda Avropa qurumları Laçın yolu ilə bağlı Azərbaycan əleyhinə qərarlar qəbul edir, ölkəmizi Qarabağda yaşayan etnik erməniləri “blokadaya” almaqda ittiham edirlər. Bundan da məxsusən Fransa öz maraqları üçün istifadə edir. Yəni Ermənistanı sülh prosesinin pozulmasında himayə edirlər. Ermənistan da bütün bunlardan ruhlanaraq öz bildiyini edir və prosesi uzadır. Bilir ki, buna görə cəzalandırılmayacaq. Necə ki, 30 il ərazilərimizi işğal altında saxladı, amma cəzalandırılmadı. Erməni lobbisi yaxşı bilir ki, Avropa İttifaqı Azərbaycan qazına böyük maraq göstərir. Onu da bilirlər ki, Azərbaycanın Avropanın qaz təchizatında payı artan kimi, onların bizə qarşı olan məkrli planları həyata keçməyəcək. Ona görə də indidən bütün vasitələri işə salırlar ki, bu reallaşmasın. Həqiqətən də erməni lobbisi istəyir ki, Avroittifaq Macarıstan, Rumıniya, Bolqarıstan və Slovakiyaya Azərbaycan qazının tədarükü üçün infrastrukturun inkişafına vəsait ayırmasın. Sözügedən ölkələr öz hesabına bu infrastrukturu qurmaq gücündə deyil. Çünki iqtisadi baxımdan Almaniya və Fransa kimi böyük imkanlara malik deyillər. Bu səbəbdən bunu ancaq Aİ maliyyələşdirməlidir. Ancaq düşünmürəm ki, erməni lobbisinin bu planları həyata keçsin. Ona görə ki, Avroittifaq Rusiya qazından imtina edir, amma alternativ variantlar da məhduddur. Belə olan halda Aİ niyə Azərbaycan qazından imtina etsin ki? Təzədən Rusiyadan asılı olsunlar? Bu baxımdan hesab edirəm ki, erməni lobbisinin maneçilik səyləri prosesi dayandıra bilməyəcək”.
Vidadi ORDAHALLI
