30/01/2023 02:58
728 x 90

Zatulin Ermənistanda Aİ missiyası məsələsində Rusiyanı da ayaqladı...

Arzuxan Əlizadə: “Zatulin öz şəxsi maraqlarını Rusiyanın dövlət maraqlarından daha üstün hesab edir”

img

Rusiya Dövlət Dumasının MDB işləri üzrə komitəsi sədrinin birinci müavini Konstantin Zatulin Avropa İttifaqının Ermənistan-Azərbaycan sərhədinə mülki müşahidə missiyasını göndərmək barədə qərarını şərh edərkən yenə bəzi məsələləri malalayıb.

K.Zatulin qeyd edib ki, guya Azərbaycanın təzyiqləri səbəbindən Ermənistan bu addımı atıb: “Mən hələ əvvəlcədən bu barədə bir növ çaxnaşmaya düşməyə tələsməzdim. Mənə elə gəlir ki, bu müşahidəçilərin mandatı kifayət qədər məhduddur. Bu müşahidəçilərin Ermənistanın təşəbbüsü ilə meydana çıxması, prinsipcə, Azərbaycanın təzyiqlərinə müqavimət göstərmək və bu təzyiqə qarşı mübarizədə öz müttəfiqlərini tapmaq istəyi ilə bağlıdır”.

Daha sonra əlavə edib ki, erməni probleminin yüz ildən artıq mövcud olduğu bütün müddət ərzində, bəyannamələr istisna olmaqla, Qərb dövlətləri nə birincidə, nə ikincidə, nə də başqa müharibədə ermənilərə köməklik göstəriblər: “Bəyanatlar, vədlər çox olsa da, amma hərəkətlər çox az olub və bunun nəticəsi də məlumdur”.

Bununla, əslində Zatulin Ermənistanın müşahidə missiyasının göndərilməsində oynadığı rolu ört-basdır edir, rəsmi İrəvanı müdafiə edir. Guya ki, Ermənistan Aİ missiyasını gətirməklə özünü Azərbaycandan müdafiə edir. Bununla həm də Rusiyanı vurur. Çünki Rusiya Aİ-nin sərhədə missiya göndərməsinə qarşıdır. Gör Zatulin nə dərəcədə ermənidən çox ermənidir ki, vətəndaşı olduğu dövlətin mənafelərini Ermənistanın ayağı altına atır.

  • “O, erməni lobbisi ilə olan qaranlıq əlaqələrinin ortaya çıxmasından, daha dəqiq desək, ifşa olunmasından ehtiyat edir”

Məsələyə münasibət bildirən AMİP sədri Arzuxan Əlizadənin fikrincə, Zatulindən belə yanaşma, prinsipcə, təəccüblü deyil: “Çünki Zatulin aktiv siyasətdə olduğu bütün dönəmlərdə ermənilərin maşası rolunda çıxış edib. Bütün bu vaxt ərzində erməni lobbisindən yallanıb və indi də bu davam edir. Bu həmin Zatulindir ki, bilavasitə onun təşkilatçılığı və təşəbbüsü ilə 1995-ci ildə Rusiya Dövlət Duması qondarma “erməni soyqırımı”nı qəbul etdi. Zatulin məhz erməni lobbisindən bəsləndiyi üçün hər zaman Qarabağdakı erməni separatçılarını dəstəkləyib. Paşinyan hakimiyyəti tərəfindən Ermənistanda ötən il Zatulinin arzuolunmaz şəxs elan edilməsinə, yəni onun ölkəyə buraxılmamasına rəğmən, o, Azərbaycanla bağlı xəbis fikirlərindən əl çəkmir. Bəli, Rusiya Aİ missiyasının sərhədə göndərilməsinə qarşıdır. Ən azından ona görə ki, bu, KTMT-nin nüfuzuna vurulan zərbədir. Ancaq buna rəğmən, Zatulin ya bu barədə ümumi danışır, ya da məsələni başqa istiqamətə yönəldir. Məgər, Zatulin bilmir ki, Paşinyan hakimiyyəti Rusiyanı Ermənistandan sıxışdırır? Məgər bilmir ki, Aİ missiyasının ölkəyə dəvət edilməsi bu işin bir parçasıdır? Fikrimcə, bütün bunları hamıdan daha yaxşı bilir. Sadəcə, öz şəxsi maraqlarını Rusiyanın dövlət maraqlarından daha üstün hesab edir. O çəkinir ki, ermənilərə qarşı çıxsa, erməni lobbisinin ianələrindən məhrum olacaq. Eyni zamanda, erməni lobbisi ilə olan qaranlıq əlaqələrinin ortaya çıxmasından, daha dəqiq desək, ifşa olunmasından ehtiyat edir. İstisna deyil ki, bu və digər məsələlər Zatulini ermənidən çox erməni mövqeyindən çıxış etməyə sövq edir. Ancaq əvvəl-axır Zatulinin bu çirkin əlaqələri üzə çıxacaq və əsl siması Rusiya ictimaiyyətinə bəlli olacaq”.

Vidadi ORDAHALLI

Peşə etikası

Son xəbərlər