Azərbaycan və Ermənistan arasında sülh prosesinə əngəl yaradan əsas fiqurlardan birinə çevrilmiş Ruben Vardanyandan ermənilər arasında da narazılığın artması müşahidə edilir. Ermənilər də görür ki, bu şəxsin gəlişi onların Azərbaycanla münasibətlərinin normallaşmasına ciddi əngəl yaradır.
Azərbaycan Vardanyanın ölkə ərazisinə daxil olmasını və bölücülüklə məşğul olmasını qanunazidd addım və cinayət sayır. Nüfuzlu “Financial Times” qəzetində dərc etdirdiyi məktubunda da Azərbaycanın Böyük Britaniyadakı səfiri Elin Süleymanov Ruben Vardanyanın Azərbaycan-Ermənistan normallaşma prosesinə mənfi təsirindən bəhs edib.
Erməni mediasının yazdıqlarından belə bəlli olur ki, həm Ermənistanda, həm də Qarabağda Vardanyandan xilas olmağa çalışırlar. Elə bu günlərdə Ermənistanın “Qraparak” nəşri məsələ ilə bağlı qeyd edirdi ki, Ruben Vardanyanla Arayik Arutyunyan arasındakı münasibətlər sülh yolu ilə nizamlanma mərhələsinə qədəm qoysa da, Qarabağdakı mənbələr bunun yalnız zahirən belə olduğunu bildirir. Nəşrə görə, Ermənistan hakimiyyəti Ruben Vardanyanın uzaqlaşdırılması ilə bağlı Arayik Arutyunyana təzyiqləri davam etdirir və Qarabağda hansısa anda Arutyunyanın geri addım atacağını istisna etmirlər: “İndi Azərbaycanın Laçın yolunun açılması ilə bağlı tələb listəsində, digər tələblərlə yanaşı, Vardanyanın istefası da var. Azərbaycan Vardanyanın uzaqlaşdırılmasına daha çox önəm verir. Burada onlar əmindirlər ki, Vardanyan Qarabağa Kreml tərəfindən göndərilib və Köçəryan-Sarkisyan cütlüyündən əl çəkmiş Rusiya hakimiyyəti Vardanyan vasitəsilə Cənubi Qafqazda mövcudluğunu təmin etməyə çalışır”. Ermənistanın “Past” nəşri də yenidən mövzuya toxunaraq yazır ki, Arutyunyan tərəfindən idarə olunan bəzi “dairələr” Ermənistan hakimiyyətinin dəstəyi ilə Vardanyanı sıradan çıxarmağa can atır: “Xüsusilə Qarabağın “keçmiş ombudsmanı”, “keçmiş dövlət naziri" Artak Beqlaryan, indiki “ombudsman” Geğam Stepanyan, "keçmiş ərazi idarəetmə və infrastrukturlar naziri" Hayk Xanumyan, “keçmiş səhiyyə naziri” Mikayel Hayriyan, “keçmiş xarici işlər naziri, xüsusi tapşırıqlar üzrə səfir” Masis Mayilyan, “baş prokuror” Qurqen Nersisyan özünəməxsus şəkildə “dövlət naziri” Ruben Vardanyana qarşı “koalisiya” yaradıblar. Üstəlik, Hayk Xanumyanla Mikayel Hayriyan bunu gizlətmirlər və bu günlərdə sosial şəbəkələrdə sərt yazılar yazırlar. Yeri gəlmişkən, “Past” qəzetinin Qarabağdakı mənbəsi bildirir ki, Qarabağda “növbədənkənar seçkilər” mövzusu ən yüksək səviyyədə bağlanmış kimi görünsə də, adıçəkilən şəxslər “seçkilərdə vahid komanda” kimi iştirak etmək məqsədilə intensiv şəkildə hazırlaşırlar. Əldə etdiyimiz məlumata görə, onların “prezidentliyə namizədi baş prokuror” Qurgen Nersisyandır. Xüsusən də sonuncu ilə Hayk Xanumyanın dostluğu çox maraqlıdır. Məsələ burasındadır ki, Qurgen Nersisyan cəmi 6-7 ay əvvəl Xanumyana qarşı konkret olaraq məmur səhlənkarlığı və 70 milyon dram civarında ziyan vurmaq ittihamı ilə cinayət işi açıb və indi onlar “bir komanda” kimi fəaliyyət göstərirlər”. Nəşr bildirib ki, istənilən halda, Vardanyanın sıradan çıxarılması əsas plandır və bunu Nikol Paşinyan da tələb edir.
Qeyd edək ki, elə bu günlərdə separatçıların “sözçüsü” David Qalstyan maraqlı bir açıqlama verərək bildirmişdi ki, Nikol Paşinyan Ruben Vardanyanın Qarabağda olmasını istəmir. O bildirib ki, erməni separatçıların lideri Arayik Arutyunyanın Vardanyanla şəxsi problemi yoxdur və onun “istefası” məsələsi Paşinyanın təşəbbüsü ilə gündəmə gəlib: “Paşinyan Vardanyanın Qarabağda olmasını istəmir. Vardanyan hər dəfə Paşinyanla üz-üzə gələndə problemlər yaranırdı. Vardanyan ona bildirib ki, Ermənistandan təkcə maliyyə və humanitar yardım gözləmir, İrəvan mövcud vəziyyətin nizamlanması üçün daha ciddi işlər görməlidir. Və bu, Nikol Paşinyanın xoşuna gəlməyib”. İndi isə bəlli olub ki, Ermənistanda Azərbaycanın düşməni Ruben Vardanyana qarşı bir neçə müxalifət qrupu yaradılıb. Erməni mediasına istinafən “konkret.az” portalı yazır ki, Ruben Vardanyana qarşı yaradılan müxalifət fraksiyalarının müxtəlif motivləri var. Onun bir hissəsi Ermənistan səlahiyyətliləri tərəfindən idarə olunur və maliyyələşdirilir: “Ermənistan hakimiyyəti Vardanyanın bu ölkədə güman edilən qələbəsinin qarşısını almağa çalışır. Ona görə də Nikol Paşinyanın hakimiyyətini təhdid edən Vardanyanın qəfildən Qarabağdan İrəvana köçməsinin qarşısını almaq üçün hər şeyi edəcəklər. Vardanyan da Qarabağla bağlı fərqli mövqeyi ilə Paşinyan-Əliyev razılaşmalarına müdaxilə edir. Narazı olanların bir qrupu dövlət aparatının keçmiş nümayəndələridir və təkcə bu deyil. Öz növbəsində, Ruben Vardanyan hamının “işlərinin” öyrənilməsini tapşırıb. Və məlumata görə, hər an cinayət işlərinə əsas ola biləcək kifayət qədər fakt aşkarlanıb. Vardanyana etiraz edənlərin digər qrupu isə müxtəlif korporativ və QHT təşkilatları, dövlət büdcəsindən qidalananlar, Vardanyanın gəlişindən sonra işdən və gəlirdən məhrum olanlardır”. Bu fonda Vardanyana qarşı birləşənlərin sayı artır və belə vəziyyətdə sonuncunun duruş gətirməsi daha çətin hala gəlir.
Samirə SƏFƏROVA
