30/01/2023 03:01
728 x 90

Vardanyan Xankəndidə terrorçuluğu maliyyələşdirir - Bakı-Moskva sazişi təsdiqləndi...

Tural İsmayılov: “...Azərbaycanın dövlətçiliyi əleyhinə açıq çağırışlar edən müəyyən şəxslərin qol-qanadının bağlanmağında Rusiya aktiv şəkildə iştirak etməlidir”

img

Azərbaycan Respublikası Hökuməti ilə Rusiya Federasiyası Hökuməti arasında fiziki şəxslər tərəfindən nağd pul vəsaitinin və (və ya) pul alətlərinin transsərhəd hərəkəti zamanı cinayət yolu ilə əldə edilmiş gəlirlərin leqallaşdırılmasına (yuyulmasına) və terrorçuluğun maliyyələşdirilməsinə qarşı mübarizə sahəsində informasiya əməkdaşlığı haqqında Saziş təsdiq edilib.

Prezident İlham Əliyev bununla bağlı Fərman imzalayıb.

Fərmana əsasən, 2022-ci il noyabrın 17-də Bakı şəhərində imzalanmış “Azərbaycan Respublikası Hökuməti ilə Rusiya Federasiyası Hökuməti arasında fiziki şəxslər tərəfindən nağd pul vəsaitinin və (və ya) pul alətlərinin transsərhəd hərəkəti zamanı cinayət yolu ilə əldə edilmiş gəlirlərin leqallaşdırılmasına (yuyulmasına) və terrorçuluğun maliyyələşdirilməsinə qarşı mübarizə sahəsində informasiya əməkdaşlığı haqqında Saziş” təsdiq edilib.

Saziş qüvvəyə mindikdən sonra Azərbaycan Respublikasının Dövlət Gömrük Komitəsi onun müddəalarının həyata keçirilməsini təmin etməlidir.

Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Rusiya Federasiyası Hökumətinə bildiriş göndərməlidir.

Bilindiyi kimi, Azərbaycanla Rusiya arasında terrorçuluğun maliyyələşdirilməsinə qarşı mübarizə sahəsində informasiya əməkdaşlığı haqqında saziş təsdiq edilib.

Cəmiyyətdə tez-tez vurğulanır ki, erməni terrorçularını maliyyələşdirənlər arasında erməni əsilli Rusiya milyonçuları da var. Məsələn, əyri yollarla və qanunsuz şəkildə Azərbaycan ərazisinə, Qarabağa gələn və Xankəndidə separatçılıqla məşğul olan Ruben Vardanyan terrorçu qrupları maliyyələşdirənlərdən biridir. Bu gün o, terrorçuları maliyyələşdirir, terrorun daha geniş miqyas alması üçün pul xərcləyir.   

Bu saziş terrorçuları maliyyələşdirən məlum şəxslərin, o cümlədən də Vardanyanın qol-qanadını bağlayacaqmı?

  • “Bu məsələdə qarşılıqlı olaraq bizim də Rusiya tərəfdən müəyyən gözləntilərimiz var”

Politoloq Tural İsmayılov bizimlə söhbətində “nəzərə almaq lazımdır ki, həm bəhs edilən saziş, həm də bundan əvvəl Rusiya ilə Azərbaycan arasında qarşılıqlı əməkdaşlıq haqqında imzalanan saziş terrorçuluğa qarşı mübarizədə birgə səylərin davam etdirilməsini özündə ehtiva edir. Azərbaycan həm bu sazişdən irəli gələrək, həm də Rusiya ilə   siyasi münasibətlərə önəm verməsindən dolayı Rusiya əleyhinə terrorçuluqla məşğul olan qüvvələrə qarşı daim mübarizə aparıb. Eyni zamanda öz ərazisindən hansısa bir formada, Rusiya da daxil olmaqla, qonşularına və digər dövlətlərə qarşı terror fəaliyyəti üçün istifadə edilməsinə əsla imkan verməyib. Bu gün Azərbaycan terrorçuluğa qarşı mübarizə sahəsində, eyni zamanda regionun təhlükəsizliyi ilə bağlı məsələdə çox fəal mübarizə apararaq gözəl bir örnək formalaşdırıb”- deyə bildirdi.

T.İsmayılov qeyd edir ki, ölkəmizin təhlükəsizlik qurumlarının bu məsələdə yüksək peşəkarlığı bütün dünya üçün örnək xarakteri daşıyır.  “Bu məsələdə qarşılıqlı olaraq bizim də Rusiya tərəfdən müəyyən gözləntilərimiz var. Ən azından, Rusiya Azərbaycan əleyhinə separatçılıq fəaliyyətilə məşğul olan, ölkəmizin ərazi bütövlüyü və suverenliyi əleyhinə sosial şəbəkələr üzərindən çağırışlar edən və  bu dövlətin ərazisində olduqlarını vurğulayan müxtəlif separatçıların Rusiyadan qovulması, Azərbaycana təhvil verilməsi prosesində daha fəal iştirak etməlidir. Eyni zamanda separatçılığa aparan, Azərbaycanın dövlətçiliyi əleyhinə açıq çağırışlar edən müəyyən şəxslərin qol-qanadının bağlanmağında  Rusiya aktiv şəkildə iştirak etməlidir. Həm keçənilki, həm də sonuncu saziş Rusiyanın bu məsələdə fəal iştirakını tələb edir. Ona görə də hesab edirəm ki, bu saziş Rusiyanın prosesə müdaxiləsi və Azərbaycan əleyhinə fəaliyyət göstərən qüvvələrin, terrorçuların ölkəmizə təhvil verilməsi ilə nəticələnməlidir. Cəmiyyətdə də Rusiyadan bu sazişdən irəli gələn müddəlara əməl etməsi ilə bağlı böyük gözləntilər var”-deyə T.İsmayılov vurğuladı.

İradə SARIYEVA

Peşə etikası

Son xəbərlər