07/02/2023 12:52
728 x 90

Əliyevin sözlərinin ardınca BBC müxbiri də Vardanyana 2 yol göstərdi…

Azər Həsrət: “Vardanyanların, Paşinyanların verə biləcəkləri cavab olmadığına görə sual-cavablardan yayınırlar və nəticə etibarı ilə də özlərini rəzil günə qoyurlar”

img

Azərbaycanın Qarabağ iqtisadi rayonunda müvəqqəti yerləşdirilən rus sülhməramlılarının məsuliyyət zonasında fəaliyyət göstərməyə çalışan separatçıların “dövlət naziri” Ruben Vardanyan BBC-nin məşhur “Hard Talk” verilişinin qonağı olub.

Hər şeydən öncə Stiven Sakurun verilişinin həddən artıq nüfuzlu, baxımlı olduğunu, təbliğat üçün müstəsna əhəmiyyət daşıdığını xüsusi vurğulamalıyıq. Sakuru Azərbaycan izləyiciləri yaxşı tanıyır: 2020-ci ildə Ermənistanın sabiq prezidenti Serj Sarkisyanı və hazırkı Baş naziri Nikol Paşinyanı da eyni arqumentlə darmadağın etmişdi. Elə bu müsahibədə də Vardanyanı “darmadağın” edilmiş saymaq olar.

Jurnalist Vardanyana sual verir ki, sizin real vəziyyətinizdən belə qənaətə gəlirəm ki, ya siz Azərbaycanla siyasi anlaşma imzalamalısınız, ya da çıxıb Qarabağdan getməlisiniz. Bu, əslində Prezidentin apardığı indiki siyasi kursun beynəlxalq miqyasda dəstəklənməsidir. Bu qənaəti dünyanın ən nüfuzlu media quruluşu da bölüşür. Çünki Prezident də çıxışında deyib ki, orada yaşayan ermənilərin iki yolu var: ya bizim şərtləri qəbul edib, normal vətəndaş kimi yaşamalıdırlar, ya da çıxıb Qarabağdan getməlidirlər.

Media eksperti Azər Həsrət “Bakı-Xəbər”ə açıqlamasında bildirdi ki, Vardanyanın qeyd olunan müsahibəsi ilə tanışdır:  "BBC-nin  “Hard Talk "u  həqiqətən də müsahiblərin küncə sıxışdırılması baxımından  sözün əsl mənasında çətin platformadır: “Əbəttə ki, yetərincə təcrübəsi olan siyasi liderlər, müsahiblər bu söhbətin öhdəsindən gələ bilir, çətinliyə düşmürlər. Amma təcrübəsiz adamlar oradan salamat çıxa bilmirlər. Sizin də qeyd etdiyiniz kimi, bir müddət öncə Nikol Paşinyan da o verilişdə iştirak etmişdi və verlişin aparıcısı Stiven Sakur onu yetərincə küncə sıxışdırıb, əməlli-başlı rəzil günə qoymuşdu. Yəni Nikol Paşinyanın təcrübəsi və hazırlığı çatmamışdı ki, suallar qarşısında aciz qalmasın. İndi də Vardanyan eyni qaydada küncə sıxışdırıldı, suallar qarşısında aciz qaldı və ümumiyyətlə bir lider olmadığını göstərdi. Bu ona görə baş verdi ki, Stiven Sakurun da vurğuladığı kimi, Ruben Vardanyan Qarabağda doğulmayıb, Qarabağa onun dəxli yoxdur. Və əlbəttə, belə bir adamın gəlib göydən zənbildən düşərcəsinə liderlik etmək iddiasında olması ağlabatan deyil. Üstəlik də, Sakur orada ayrıca vurğuladı ki, Qarabağda olan ermənilər də ondan narazıdırlar, hamı onu sevmir orda. Təbii ki, bu sualların qarşısında durmaq asan deyildi. Digər tərəfdən, ona yönəldilən Rusiya və Ukrayna ilə bağlı suallardan aciz şəkildə yayınması da Vardanyanın hər hansı liderlik keyfiyyətlərinin olmamısını bir daha göstərdi. Ümumilikdə götürəndə, bu verilişi bir tərəfdən tənqid edirik ki, “Naqornıy Karabax”, “ Dağlıq Qarabağ” ifadəsi işlədilir. Digər tərəfdən bölücü və mətləbə dəxli olmayan adama efir verilir. Amma ümumi götürəndə görürük ki, bütün bu neqativlikləri ilə bərabər, veriliş əslində Ruben Vardanyanın Moskvanın kuklası olduğunu bütün dünyaya ifşa etmiş oldu. Mənə elə gəlir ki, xüsusən də Qərbdə olan siyasi mərkəzlər bu adamın əsl mahiyyətini bu verilişdə çox gözəl görə bildilər. Və gördüklərinə uyğun da davranmalıdırlar. Yəni Azərbaycan aylardır dünyaya bəyan edir ki, bu təsadüfi adam gəlib ortalığı qarışdırır, sülh prosesinə mane olur və görürsüz ki, proseslər hara gedir. Amma təəssüflər olsun ki, bəzi mərkəzlər, o cümlədən Avropa Parlamenti kimi qurumlar Azərbaycanın səsini eşitmir. Mən düşünürəm ki, Vardanyanın BBC-də  özünü ifşasından sonra onlar nəyin nə olduğunu yaxşı anlayacaqlar. Yeri gəlmişkən deyim ki, bu cür verilişlərə, bu cür suallara özünün dəyanətli cavabı ilə Azərbaycan Prezidenti həm Paşinyana, həm Vardanyana ustad dərsi verə bilər. Azərbaycan Prezidentinin hər hansı ən sərt suallar verən jurnalist qarşısında belə küncə sıxışdırıldığı heç vaxt olmayıb. Bu vaxta kimi verilən suallara dəyanətlə, yüksək səslə cavab verməyi bacarıb. Və heç bir sualdan da yayınmayıb. Çünki verə biləcək cavabları var. Amma Vardanyanların, Paşinyanların verə biləcəkləri cavab olmadığına görə sual-cavablardan yayınırlar və nəticə etibarı ilə də özlərini rəzil günə qoyurlar”.

Bir daha qeyd etməliyik ki, bu müsahibə həm də beynəlxalq media rəyinin İlham Əliyevin səsləndirdiyi fikirlərlə tam razı olduğuna dəlalət edir.

Məhəmmədəli QƏRİBLİ

Peşə etikası

Son xəbərlər