07/02/2023 11:21
728 x 90

Ermənilər hələ 13 sentyabrın xofundan çıxmayıblar - “Həmin gün Naxçıvana Zəngəzurdan gedəcəkdilər?”

İbrahim Rüstəmli: “Simonyanın, guya Ermənistan ordusunun bununla Zəngəzuru qoruduğu ilə bağlı dedikləri yalandır”

img

Ermənistan hələ də ötən il baş verən sentyabr döyüşlərinin xofu ilə yaşayır. Hələ də sözügedən döyüşlərdə ermənilərin üzləşdiyi böyük sayda itki müzakirə olunur. Qeyd edək ki, sentyabr döyüşlərində 224 erməni əsgəri məhv edilib.

Bu arada Ermənistan parlament sədri Alen Simonyan bəyan edib ki, sentyabrın 13-də Azərbaycan dayandırılmasaydı, Zəngəzur əldən getmişdi: “Düşmən hər dəqiqə hücuma keçə bilər. Düşmən pisdir, düşmən bacarır, çalışır və çalışacaq ki, biz güclənənə, əks-hücuma gedə bilənə qədər hər dəqiqə bizə hücum etsin. Sentyabrın 13-də Azərbaycan dayandırılmasaydı, Zəngəzur əldən getmişdi. Əgər həmin gün Azərbaycanın qarşısı alınmasaydı, düşmən Naxçıvana Zəngəzurdan gedib-gələcəkdi. Siz unutmayın ki, cəmi iki il əvvəl də ordu indiki kimi böyük müharibə vəziyyətində idi”.

Görünən odur ki, Ermənistan tərəfi bunun yenidən təkrarlana biləcəyindən narahatdır.

  • “Bizim məqsədimiz təxribatlara son qoymaq üçün hakim yüksəklikləri ələ keçirmək idi”

Məsələyə münasibət bildirən hərbi ekspert İbrahim Rüstəmli hesab edir ki, A.Simonyan bir sıra məsələləri şişirdir: “Əvvəla, sentyabr döyüşlərində məqsəd Zəngəzuru ələ keçirib Naxçıvanla quru əlaqəsi yaratmaq deyildi. Məqsəd, erməni təxribatlarını önləmək və hakim yüksəklikləri ələ keçirmək idi. Azərbaycan Ordusu həm düşmənin təxribatının qarşısını aldı, həm də strateji əhəmiyyətli yüksəklikləri ələ keçirdi. 200-dən çox düşmən əsgəri məhv edildi. Məsələ ondadır ki, 30 illik işğal dövründə Ermənistan qanunsuz olaraq sərhədləri qabağa çəkmişdi. Xüsusən də Laçın və Kəlbəcər rayonları istiqamətində. Ermənistan tərəfi elə hesab edirdi ki, Azərbaycan sərhədə doğru hərəkət etməyə cəsarət etməz. Rusiya başda olmaqla Kollektiv Təhlükəsizlik Müqaviləsi Təşkilatından (KTMT) çəkinəcək. Ancaq sentyabr döyüşləri bütün bu stereotipləri yox etdi. Simonyanın, guya Ermənistan ordusunun bununla Zəngəzuru qoruduğu ilə bağlı dedikləri yalandır. Ordumuz Qərbi Zəngəzuru, xüsusən də Mehri rayonunu götürmək istəsəydi, bunu edərdi. Ermənistan ordusu bunun qarşısını ala bilməzdi. Bizim məqsədimiz təxribatlara son qoymaq üçün hakim yüksəklikləri ələ keçirmək idi. Buna da nail olduq. İndi Ermənistanın bütün təminat yolları vizual olaraq Azərbaycan Ordusunun nəzarətindədir. Bu isə o deməkdir ki, Ermənistan tərəfi növbəti dəfə hərbi təxribatlara əl atarsa, nəticəsi onlar üçün daha ağır olacaq. Çünki strateji üstünlük bizim tərəfimizdədir. Azərbaycanın məqsədi Ermənistan ərazisinə daxil olub oranı işğal etmək deyildi. Bizim məqsədimiz ölkənin etibarlı şəkildə təhlükəsizliyini təmin etməkdir. Bunu da müzəffər Azərbaycan Ordusu təmin etmək gücündədir. Ermənistanın hərbi resursları ordumuzun qarşısında duruş gətirmək gücündə deyil. Belə olmasaydı, onlar KTMT-yə, Avropa İttifaqına, Fransaya yalvarmazdılar. Bunlar gör nə gündədilər ki, öz sərhədlərini belə qorumağa əsgərləri çatmır. Hələ utanmaz-utanmz deyirlər ki, erməni ordusu Zəngəzuru xilas etdi”.

Bir sözlə, hərbi ekspertin fikrincə, erməni spikerin dedikləri söz yığınıdır.

Vidadi ORDAHALLI

Peşə etikası

Son xəbərlər