Qabil Hüseynli: “Ərdoğan seçilməsə belə, bu münasibətlərə xələl gəlməyəcək, ancaq münasibətlərdəki inkişaf dinamikası belə olmayacaq”
Türkiyə Prezidenti ilk dəfə seçkilərdə iştirak edəcək gəncləri səsvermə zamanı düzgün seçim etməyə çağırıb. Prezidenti Rəcəb Tayyib Ərdoğan ölkədə prezident və parlament seçkilərinin mayın 14-də keçiriləcəyini bildirib.
Ərdoğan Bursa gəncləri ilə görüşündə deyib:
“İlk dəfə seçkilərdə iştirak edəcək gənclərimizin nümayəndələrini mayın 14-də keçiriləcək səsvermə zamanı düzgün seçim etməyə çağırıram”.
Türkiyədə prezident seçkilərinin əvvəlcə iyunun 18-də keçirilməsi nəzərdə tutulurdu.
Seçkiyə çox az vaxt qaldıqca, Türkiyənin daxilindəki siyasi mübarizə də kəskinləşir
Maraqlıdır, Ərdoğanın yenidən prezident seçilib-seçilməməsinin Azərbaycana və Azərbaycan-Türkiyə münasibətlərinə hansı formada təsiri olacaq?
Politoloq Qabil Hüseynli “Bakı-Xəbər”ə bildirdi ki, 2023-cü il Prezident seçkiləri ilə bağlı proqnozların hamısında Ərdoğan favoritliyi qoruyur: “Mən də bu qənaətdəyəm ki, prezident seçkilərini Ərdoğan qazanmağa çox yaxındır.
Ərdoğan seçki gününə qədər bir neçə gedişlə səslərin lazım olan faizini qazanacaq. Düzdür, çox çətin seçki olacaq. Ancaq millət daha rahat nəfəs ala biləcəyinə inanarsa, cənab Ərdoğanın etdiklərini dərindən dərk edərsə, bunun daha böyük səsə çevriəcəyini hamımızın bilməsi lazımdır. Əhali zatən Ərdoğanı sevir və indi də hesab edir ki, cənab Ərdoğan istərsə, keçmişdə olduğu kimi, yenə də çox gözəl işlər görər. Bəli, ona güvənən çox ciddi kütlə var. Ərdoğanın hazırda indi daha güclü görünməsinin bir səbəbi də müxalifətlə bağlıdır. Müxalifətin indiyə kimi vahid namizədini ortaya çıxara bilməməsi, namizəd məsələsində hələ də ortaq məxrəcə gələ bilməmələri Ərdoğanın mövqelərini daha da möhkəmləndirir. Üstəlik, müxalifl liderlərin son həftələr öz aralarındakı mübahisələrin böyüməsi də əleyhlərinə işləyir. Kılıçdaroğlunun tək başına çabaları digər müxalif liderlər tərəfındən çox açıq formada dəstəklənmir".
Qabil Hüseynli hesab edir ki, Ərdoğanın hakimiyyəti illərində Türkiyə bütün istiqamətlərdə sıçrayışa nail olub: “Ölkə dünyanın aparıcı güclərindən birinə çevrilib. Cəmi 5-6 ay ömür sürən koalisiyalı hökümət dönəmləri arxada qalıb. Bunu rəqəmlərlə də göstərmək olar. Ölkənin xarici ticarət dövriyyəsi 4,5 dəfə artıb. Milli gəlir 4 dəfədən çox yüksəlib. Ölkənin xərcləri də çoxdur. Silahlanmaya, qaçqın kütləsini saxlamağa böyük pullar ayrılır. Suriyadan gələn 10 milyona qədər qaçqına hər il 10 milyard pul ayrılır. Hazırda Türkiyə müxalifət liderləri arasında Ərdoğanı udacaq siyasətçi yoxdur. Azərbaycan-Türkiyə münasibətləri hər zaman yüksək səviyyədə olub. Ərdoğan seçilməsə belə, bu münasibətlərə xələl gəlməyəcək. Ancaq münasibətlərdəki inkişaf dinamikası belə olmayacaq. Ərdoğan həm də bütün türk dünyası ilə münasibətlərin durmadan inkişafını təmin edən liderdir. Bu rolu Türkiyənin müxalifətdə olan heç bir lideri Ərdoğan kimi bacara bilməzdi. Ərdoğan Türkiyəni enerji habına çevirib. Rusiyadan, Orta Asiya və Azərbaycandan gedən qaz Türkiyə üzərindən Avropaya nəql edilir. Hərbi sənaye sahəsində qazanılan uğurların misli-bərabəri yoxdur. Əminəm ki, Ərdoğanın qalib gəlməsini Azərbaycanda da çox adam istəyir”.
Prezident Ərdoğanın Türkiyədə prezident seçkilərinin tarixini açıqlamasından sonra müxalifətdən reaksiyalar olub. Ana müxalifət partiyası CHP mətbuat xidməti Ərdoğanın seçki tarixini tez-tez dəyişdirməsinin qəbuledilməz olduğunu bəyan edib: "Əvvəl iyul dedilər. Sonra əvvələ çəkilə biləcəyini dedilər. Biz də seçkinin 6 apreldən tez keçirilməsinə həmişə "hə" dedik. Amma bu tarixdən sonrakı günlərin Ərdoğanın kreslosunu qorumağa hesablandığını dedik. İndi də mayın 14-ü deyirlər. Bu, onun kreslosunu qorumaq üçün son təlimatı olar. Məsələ ilə bağlı mütəffiqlərimizlə müzakirə aparacağıq".
İYİ partiyanın sədri Meral Akşener isə seçki gününün elan olunmasına tək kəlmə ilə reaksiya verib: "May bizimdir".
Məhəmmədəli QƏRİBLİ
