Məhərrəm Zqlfüqarlı: “Prezidentimizin Davosda keçirdiyi yüksək səviyyəli görüşlər sübut etdi ki, ölkəmizlə əməkdaşlığa xüsusi önəm verilir”
Prezident İlham Əliyevin İsveçrənin Davos şəhərində keçirilən Dünya İqtisadi Forumunda iştirakı, Forum çərçivəsində keçirdiyi görüşlər kifayət qədər uğurlu oldu. Davos Forumu Azərbaycanın inkişafını, imkanlarını dünyaya təqdim etmək baxımından mühüm platformadır. Dövlət başçısı Forum çərçivəsində bir sıra ölkələrin prezidentləri, eləcə də dünyanın tanınmış şirkətlərinin rəhbərləri ilə görüşlər keçirərək qarşılıqlı əməkdaşlığa dair müzakirələr aparıb.
Davos Forumunda Azərbaycan Prezidentinin həm ikitərəfli görüşləri, həm oradakı panel müzakirələrdə iştirakı əsasən qarşı tərəfin təşəbbüsü ilə baş tuturdu. Yəni, dövlət, hökumət başçıları, o cümlədən, biznes nümayəndələrinin əksəriyyəti özləri təşəbbüs göstərib prezidentimizlə görüşürdülər. Üstəlik, Prezidentlə görüşmək istəyənlərin də sayı çox idi. Məlum olduğu kimi, dünya miqyasında Ermənistan indiki şəraitdə Azərbaycanla bağlı bir sıra istiqamətlərdə təbliğat aparır. Məqsəd Azərbaycanı təcrid etməkdir. Bu məqsədlə Azərbaycana sanksiya tətbiq olunmasına, blokadaya alınmasına çağırır. Bu günlərdə, Ermənistan parlament sədri bəyan etdi ki, Azərbaycana sanksiya tətbiq olunması ilə bağlı 30 ölkəyə müraciət edib. Ancaq onların bu çağrışına heçbir ölkə əhəmiyyət vermədi. Ermənistanın bu cür siyasət apardığı bir vaxtda, Davosda ölkəmizə və onun dövlət başçısı ilə görüşməyə artan maraq, əslində erməni tərəfinin bu səylərinə vurulan bir zərbə, cavab idi. Bu nöqteyi-nəzərdən dünya ölkələrinin Azərbaycana göstərdikləri diqqət, Ermənistanın Azərbaycana sanksiya tətbiqi çağrışlarına böyük zərbə oldu.
Sözügedən məsələyə aydınlıq gətirən AVCİYA-nın vitse-prezidenti, professor Məhərrəm Zqlfüqarlı erməni tərəfinin Azərbaycana qarşı apardığı təbliğat kampaniyasının Davosda fiaskoya uğramasını bir sıra faktorlarla əlaqələndirdi: “Əvvəla, Azərbaycan 30 il əvvəlki zəif dövlət deyil. Ötən illər ərzində Azərbaycanın beynəlxalq aləmdə həm nüfuzu artıb, həm də Avropa ölkələrinin Azərbaycana ehtiyacı var. Məsələ ondadır ki, Rusiyanın Ukraynaya hücumundan sonra Azərbaycana ehtiyac daha da artıb. Həm qaz idxalı nöqteyi-nəzərdən, həm də tranzit körpü baxımından. Çünki Azərbaycan Avropa ilə Asiyanı birləşdirən körpüdür. Bütün bunlar əlbəttə ki, tamamilə yeni situasiya yaradıb və Ermənistan bunu poza bilməz. Davos Forumunda Prezident İlham Əliyevlə keçirilən yüksək səviyyəli görüşlər bunu bir daha dünyaya nümayiş etdirdi. Fəlsəfədə belə bir yanaşma var: iqtisadiyyat birincidir, siyasət ikinci. Azərbaycan indi iqtisadi baxımdan regionda ən güclü dövlətdir. İqtisadi əməkdaşlıq da, siyasi əməkdaşlığa aparır. Bu gün Avropanın iqtisadi baxımdan Azərbaycana eytiyacı varsa, bu, yüzdəyüz siyasi əməkdaşlığa da gətirib çıxaracaq. Çünki bütün bunlar bir-biri ilə sıx bağlıdır. Sadəcə, ermənilərin o canfəşanlığını Avropa ona görə müəyyən mənada dəstəkləyir ki, Ermənistanı Rusiyanın caynağından qoparıb Qərbə meyilləndirsinlər. Rusiyanın Ermənistandakı hərbi bazasını ləğv etdirsinlər. Yəni, son nəticədə Cənubi Qafqazdan Rusiyanın tamamilə getməsini təmin etsinlər. Ermənistan forpost ölkə olduğu üçün müəyyən mənada buna dəstək verirlər. Ancaq Ermənistandan fərqli olaraq Azərbaycan ciddi və müstəqil siyasət aparan ölkədir. Prezidentimizin Davosda keçirdiyi yüksək səviyyəli görüşlər sübut etdi ki, Azərbaycanla əməkdaşlığa xüsusi önəm verilir. Ermənilərin yalan üzərində qurulan təbliğat kampaniyası bunu əngəlləyə bilməz. Bunun nəticəsi idi ki, Ermənistan tərəfinin Azərbaycanı baykot etmək çağrışları fiaskoya uğradı. Laçın yolu ətrafında ermənilərin qurduğu şou nəyəsə yaramadı. Tam əksinə olaraq bu dəfə daha çox dövlət rəsmisi, şirkət rəhbəri Prezident İlham Əliyevlə görüşdü. Azərbaycan Avropa Şurasına daxil olanda mərhum prezident Heydər Əliyev demişdi ki, bu qurum ölkəmizə nə qədər lazımdısa, Azərbaycan da AŞ-ya o qədər lazımdır. Həmin söz bu gün öz yerini tutur. Ona görə də Ermənilərin bizə qarşı olan o məkirli planları reallaşa bilmir. Sonuncu Davos Forumu bunun növbəti əyani nümunəsi idi. Necə deyərlər, ermənilərin Azərbaycanı baykot etmək cəhdləri fiaskoya uğradı”.
Vidadi ORDAHALLI
