Ermənistanın xarici işlər naziri Ararat Mirzoyan erməni mediasına müsahibəsində Laçın dəhlizi ilə Qarabağa mina daşıması məsələsinə münasibət bildirib.
Mirzoyan həyasızcasına bəyan edib ki, Ermənistan yalnız öz ərazilərini minalayıb: “Azərbaycan əslində onları Ermənistanın 2021-22-ci illərdə işğal etdiyi ərazilərindən götürüb. Ermənistan yalnız öz ərazisini və yalnız özünümüdafiə məqsədilə minalayıb”.
Bununla birnöv Ermənistan xarici işlər naziri ölkəsinin Laçın yolundan sui-istifadə edərək Qarabağa minalar daşıdığını etiraf edib. Yeri gəlmişkən, bu günlərdə xarici işlər naziri Sergey Lavrov 2022-ci ilin yekunlarına dair mətbuat konfransında bəyan edib ki, Rusiya tərəfi Azərbaycanın Ermənistanın Laçın yolu ilə mina daşımasına dair təqdim etdiyi məlumatı araşdırır: “Ermənistanın minaların daşınması üçün Laçın dəhlizindən istifadə etməsi barədə məlumatlar Azərbaycan tərəfindən təqdim olunub. Hərbçilərimiz hazırda bunu öyrənirlər. Sülhməramlı kontingentin qadağan olunmuş, qeyri-humanitar, qeyri-mülki malların olub-olmadığını müəyyənləşdirmək məqsədilə bütün nəqliyyat vasitələrini yoxlamaq üçün hər cür imkanı var”.
Bütün bunlar Ermənistanın Rusiya sülhməramlılarının nəzarətində olan Laçın yolundan minalar daşıdığını sübut edir.
Məsələyə münasibət bildirən hərbi ekspert Ramil Məmmədli hesab edir ki, Mirzoyanın məlum açıqlaması Ermənistanın Azərbaycan ərazilərini minalamasını etiraf etmək anlamına gəlir: “Mirzoyan deyir ki, Ermənistan öz ərazilərini minalayır. Haçandan Qarabağ, Laçın rayonu Ermənistan ərazisidr? Ötən il Laçın rayonunun Qarabağla həmsərhəd olan ərazilərində çoxsaylı piyada əleyhinə minalar aşkarlandı. Məlum oldu ki, həmin minalar 2021-ci ildə Ermənistanda istehsal olunub. Nəzərə alsaq ki, 44 günlük Vətən müharibəsindən sonra, yəni 2020-ci ilin noyabrından Laçın yoluna Rusiya sülhməramlıları nəzarət edir, o zaman Laçının Sarıbaba dağı və digər istiqamətlərdə basdırılan 2021-ci il istehsalı olan minalar haradan ora gəlib çıxıb? Aydın məsələdir ki, Ermənistan tərəfi bunu Laçın yolu ilə ora daşıyıb. Sülhməramlılar da buna göz yumub. Təəssüf doğuran məqam odur ki, Ermənistanın mina terroru siyasəti beynəlxalq müstəvidə qınanmır. Baxın, Mirzoyan bunu açıq etiraf edir, amma dünyada buna heçbir reaksiya yoxdu. Ancaq mina və digər hərbi sursatın daşındığı Laçın yolunda azərbaycanlı ekofəalların keçirdiyi aksiyanı böyük humanitar böhran kimi təqdim edirlər. Ard-arda Azərbaycana çağrışlar edilir ki, yolu açın, ermənilər acından qırıldı və s. Halbuki, bütün dünya görür ki, Laçın yolu humanitar yüklərə bağlı deyil. Buna rəğmən, hansısa beynəlxalq təşkilat, aparıcı dövlətlərin liderləri Ermənistandan soruşmur ki, 2021-ci ildə istehsal olunan minalar Qarabağda necə peyda olub? Bunu soruşan yoxdu. İşğaldan azad olunan ərazilərin minalardan təmizlənməsi olduqca çətin və təhlükəli prosesdir. Çünki minadan çirklənmə səviyyəsi çox böyükdür və necə gəldi ərazilərimizi minalayıblar. Ermənistanın indiyədək Azərbaycan tərəfinə təqdim etdiyi minalanmış sahələrin formulyarları qeyri-dəqiq və etibarsızdır. Ancaq bu məsələdə də Ermənistana beynəlxalq təzyiq yoxdur. Bütün bunlar nəticə etibari ilə Ermənistanın cəzasız qalmasına şərait yaradır. Bu da yeni-yeni problemlərin yaranmasına yol açır. Ona görə də beynəlxalq təşkilatlar bu ədalətsizliyə son qoymalıdır və Ermənistanın mina terroruna etiraz etməlidilər”.
Vidadi ORDAHALLI
