“Bu gün dünyanın üzləşdiyi əsas problemin legitim mənbəyi yoxdur. Bunlar, sadəcə, baxışlar, ambisiyalar və virtual liderlik uğrunda mübarizə ilə bağlıdır”. Bu fikirləri Prezident İlham Əliyev Çinin CGTN telekanalına müsahibəsində söyləyib.
Ölkə başçısının fikirlərindən belə məlum oldu ki, dünyanı bu günə qoyan liderlərin ambisiyasıdır: “Düşünürəm ki, bəzi ölkələrin ambisiyaları, regionda və ya dünyada bir növ liderlik uğrunda mübarizə, potensialın, öz potensialının düzgün hesablanmaması, qarşınızdakının, opponentinizin olduğundan aşağı qiymətləndirilməsi. Bu, etimadsızlığa, gərginliyə və müharibələrə gətirib çıxarır. Bizim siyasətimiz hər zaman, sözün əsl mənasında, əməkdaşlığa əsaslanıb, çünki biz qəti surətdə inanırıq ki, yalnız əməkdaşlıq sayəsində uğur qazana bilərsiniz. Nə qədər çox versəniz, nə qədər çox yardım etsəniz, bir o qədər çox əldə edəcəksiniz. Dünya bunun üzərində qurulub. u liderliyi ölçmək mümkünsüzdür. O, virtualdır və ixtiyarınızda olan media tərəfindən yaradıla bilər. O, nəzarətinizdə olan QHT-lər tərəfindən yaradıla bilər. Ancaq, necə deyərlər, rəqabət mühitində siz bunu sübut edə bilməzsiniz. Bu səbəbdən onlar gərək silahları yerə qoysunlar və bəşəriyyətin üzləşdiyi problemlərə diqqətlərini yönəltsinlər – yoxsulluq, aclıq və bir çox ölkələr üçün içməli suyun və elektrik enerjisinin əlçatan olmaması. Budur fundamental problemlər”.
Maraqlıdır, müasir dünyada virtual liderlik uğrunda gərəksiz rəqabətin törətdiyi fəsadlar və əsl liderlik nümunəsi ilə bağlı ekspertlərin rəyi nədən ibarətdir?
“Prezident İlham Əliyev uzaqgörən siyasətçi olaraq bütün bunların fərqindədir”
Sözügedən mövzuda fikirlərini “Bakı-Xəbər”lə bölüşən İdarəçilik Akademiyasının müallimi, sosioloq Hüseyn İbrahimovun fikrincə, virtual idarəçilik ambisiyası dünyanı fəlakətlə üzləşdirir: “Əvvəla, Prezident İlham Əliyev Çin televiziyasına müsahibəsində çox əhəmiyyətli, düşündürücü məqamlara toxundu. Həqiqətən də bəzi siyasətçilərin reallıqla uzlaşmayan virtual liderlik ambisiyaları dünyanı fəlakətə aparır. Prezidentimizin bununla bağlı fikirlərində çox dərin məna var. Nə qədər qəbul etməsək də, müasir dünya günbəgün virtuallaşır. Bu da öz növbəsində real problemlərin həllini kənarda qoyur. Kimlərinki əlində transmilli korporasiyalar var, həmin vasitələrlə dünya düzəninə təsir edirlər. Təəssüf doğuran odur ki, bütün bunlar açıq rəqabət nəticəsində deyil, şəxsi ambisiyaların virtual aləm vasitəsilə gətirdiyi uğurlardan ibarətdir. Bütün bunlar müasir planetimizin əsl mənzərəsidir. Bəs əsl liderlik nümunəsi necə olmalıdır? Əsl liderlik nümunəsi şəxsi bacarığa, şəxsi keyfiyyətlərə söykənməlidir. Bu gün dünya qloballaşır və qloballaşdıqca da, onun təsir dairəsi artır. Qloballaşma genişləndikcə, virtual liderlik ambisiyaları da artır. Bunun obyektiv səbəbləri onunla bağlıdır ki, bununla bağlı onların əlində müəyyən vasitələr var. O vasitələr ki, dünyanın informasiya məkanında hökmran mövqeyə malikdilər. Onlar bu üstünlüklərindən sui-istifadə edərək dünya ölkələrini, xalqlarını, liderlərini öz təsirləri altında saxlamağa cəhd edirlər. Bax, məsələnin mahiyyəti bundan ibarətdir. Ancaq bütün bunlara rəğmən, Azərbaycan bu kimi təhdidlərdən uğurla qoruna bilir. Bu da ondan irəli gəlir ki, Prezident İlham Əliyev uzaqgörən siyasətçi olaraq bütün bunların fərqindədir. Azərbaycan hər zaman qarşılıqlı dialoqa önəm verir”.
Vidadi ORDAHALLI
