“Nəqliyyat layihələrinə necə münasibət göstərməsi ölkələrin strategiyasından asılıdır”. Bu fikirləri Prezident İlham Əliyev Çinin CGTN telekanalına müsahibəsində söyləyib.
Ölkə başçısının sözlərinə görə, bizim üçün bu, iqtisadiyyatımızı şaxələndirmək və neft-qaz gəlirlərindən asılılığımızı azaltmaq üçün əsas amillərdən biri idi: “Deyə bilərəm ki, ötən il Azərbaycan ərazisindən tranzit daşımalar 75 faiz artıb. Bu, təkcə infrastruktura görə yox, lazımi idarəetməyə görə artmışdır. Görülmüş tədbirlər bizə yükdaşımanı sürətləndirməyə, bürokratik əngəlləri aradan qaldırmağa və bunu fiziki olaraq cəlbedici etməyə imkan verir. Həmçinin tarif siyasəti də mühüm məsələdir. Çünki burada bir çox ölkələrin səylərinin birləşdirilməsi lazımdır ki, bizim razılaşdırılmış tarif siyasətimiz mövcud olsun və heç bir ölkə süni şəkildə öz mənfəətini artırmağa çalışmasın. Biz müştərək faydanı görməyi öyrənməliyik. Ərazimizdən nə qədər çox yük keçərsə, bizim bundan bir o qədər çox faydamız olar, bir o qədər də çox iş yerlərimiz olar”.
“Bununla bağlı infrastrktur tam hazır olandan sonra ölkəmizin tranzit gəlirləri indikindən qat-qat böyük olacaq”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Azərbaycanın nəqliyyat strategiyası gələcəyə hesablanıb: “Hesab edirəm ki, bu çox doğru yanaşma olmaqla yanaşı, reallığa söykənir. Çünki neftdən asılılığın azaldlmasının yollarından biri də nəqliyyat sektorunun inkişaf etdirilməsidir. Dünyanın bir sıra ölkələri, beynəlxalq logistika təşkilatları tərəfindən Azərbaycanın tranzit imkanları yüksək qiymətləndirilir. Bunun da əsasları var. Məsələn, Çin və Avropa arasında yükdaşımalarda Şərq-Qərb marşrutu üçün ən uyğun yol Azərbaycandan keçir. Azərbaycanın nəqliyyat-tranzit potensialından istifadə edilməsinin vaxt və maliyyə baxımından daha sərfəli olması dünyada təsdiq olunur. Bu baxımdan Transxəzər Beynəlxalq Nəqliyyat Marşrutunun yaradılması ölkəmizin mühüm tranzit uğurlarından sayılır. Hazırda bu marşrut Çin-Qazaxıstan sərhədindən başlayaraq Qazaxıstan, Xəzər dənizi, Azərbaycan və Gürcüstandan keçməklə Avropa ölkələrinə qədər uzanır. Şimal-Cənub və Şərq-Qərb nəqliyyat dəhlizlərinin kəsişməsində yerləşən Azərbaycan hazırda regionun mühüm nəqliyyat və logistika mərkəzi kimi tanınır. Avropa İttifaqı ölkələri ilə bu sahədə uğurlu əməkdaşlıq həyata keçirilir. Ölkəmizin ərazisindən keçən Şərq-Qərb, Şimal-Cənub və Cənub-Qərb beynəlxalq nəqliyyat dəhlizləri yükdaşımalar üçün məsafə, vaxt baxımından olduqca əlverişlidir. Bakı-Tbilisi-Qars dəmir yolu, Bakı Beynəlxalq Dəniz Ticarət Limanı, Azərbaycanın Xəzər dənizində ən böyük ticarət donanması, müasir gəmiqayırma zavodu, müasir standartlara cavab verən avtomobil yolları həmin nəqliyyat dəhlizlərinin imkanlarını daha da genişləndirir. Bütün bunların sayəsində Azərbaycan həm iqtisadiyyatını əhəmiyyətli dərəcədə şaxələndirməyə nail olacaq, həm də qeyri-neft sektorunu inkişaf etdirəcək. Bu isə dayanıqlı iqtisadi inkişaf deməkdir. Nəzərə almaq lazımdır ki, Azərbaycanın dünyada tranzit ölkə olaraq rolunun artması istiqamətində ölkədə çox böyük işlər həyata keçirilir. Dəmir yolları modernləşdirilir, yeni, müasir dəniz limanları inşa olunur. Hava daşımaları artır. Əminəm ki, bununla bağlı infrastruktur tam hazır olandan sonra Azərbaycanın tranzit gəlirləri indikindən qat-qat böyük olacaq”.
Bu baxımdan ekspert hesab edir ki, sözügedən sahə ilə bağlı böyük perspektiv var.
Vidadi ORDAHALLI
