ABŞ-ın ATƏT-dəki səfiri Maykl Karpenter Ermənistanın təşəbbüsü ilə keçirilən ATƏT Daimi Şurasının xüsusi sessiyasında qərəzli bəyanatla çıxış edib. ABŞ təmsilçisi bəyan edib ki, Birləşmiş Ştatlar Laçın dəhlizinin 30 gündən artıqdır blokadada olması və Dağlıq Qarabağda ərzaq, dərman və digər ləvazimat çatışmazlığına səbəb olmasından ciddi narahatdır:
“Biz Azərbaycan və Rusiyanı, sizin (Ararat Mirzoyan) sitat gətirdiyiniz kimi, açıq şəkildə insanların, nəqliyyat vasitələrinin və yüklərin hər iki istiqamətdə təhlükəsiz hərəkəti üçün təminatları ehtiva edən əvvəlki öhdəliklərinə sadiq qalaraq, Laçın dəhlizində fasiləsiz keçidi dərhal bərpa etməyə çağırırıq. Laçın yolunda şəxsi və kommersiya nəqliyyatının davamlı şəkildə kəsilməsi Dağlıq Qarabağda yaşayan insanlar üçün ciddi humanitar nəticələrə səbəb ola bilər. ATƏT-in bütün üzv dövlətləri etnik mənşəyindən asılı olmayaraq öz ərazilərində insanların təhlükəsizliyini qorumağa borcludurlar”.
Göründüyü kimi, ABŞ səfiri sanki Ermənistanın rəsmi bir nümayəndəsi kimi davranır. Azərbaycanı birmənalı şəkildə blokada yaratmaqda ittiham edir. Halbuki, Azərbaycan dəfələrlə bəyan edib ki, heç bir blokadadan söhbət gedə bilməz. Çünki biz öz haqqımız olan və ermənilərin ərazimizdə törətdiyi ekoloji fəlakətə etiraz əlaməti olaraq dinc aksiya keçiririk. Belə olan təqdirdə, ABŞ səfiri niyə qərəzli mövqe ortaya qoyur?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, ABŞ-ın ATƏT-dəki səfirinin son sərsəm açıqlaması böyük təəccüb doğurur: “Belə qənaətə gəlmək olar ki, ya səfir reallığı yaxşı bilmir, ya da Laçın yolunda baş verənlərdən məlumatı var, sadəcə, ermənipəst mövqeyi ona obyektiv olmağa imkan vermir. Bütün dünya yaxşı bilir ki, Laçın yolunun bizim tərəfimizdən bağlanmayıb. Azərbaycan tərəfi bunu bir neçə dəfə açıq şəkildə bəyan edib. Yolda ekoloji fəlakətin qarşısını almaq üçün dinc məqsədlə aksiya keçirilir. Beynəlxalq qurumların nümayəndələri və xarici jurnalistlər həmin əraziyə səfər edib. Gözləri ilə şahid oldular ki, bizim QHT fəalları yolda dinc aksiya həyata keçirir. Yol humanitar yüklərin daşınması üçün hər iki istiqamətdə açıqdır. Sülhməramlılar və yerli əhaliyə aid avtomobillər sərbəst şəkildə hərəkət edirlər. Azərbaycan belə bir aksiyanı keçirməklə ərazimizdəki yataqlardan qanunsuz istifadənin qarşısını almaq istəyir ki, ekoterrora son qoyulsun. Eyni zamanda Ermənistandan Qarabağa qanunsuz silah və minaların daşınmasına yol vermirik. Artıq bir aydır ki, Laçın yolundan qanunsuz silah daşınması həyata keçirilmir. Bu, çox sevindiricidir. Qarabağdakı separatçı və cinayətkarlar bu yoldan istifadə edə bilmədikləri üçün belə narahatdırlar. Azərbaycan nümayəndələri həm də orada yoldan nə məqsədlə istifadə edilməsi ilə bağlı müşahidələr aparırlar. Ermənistanı dəstəkləyən qüvvələr bilməlidir ki, onların belə riyakar mövqeyi heç nəyi dəyişən deyil. Bu, bizi öz haqq yolumuzdan döndərə bilməz. Biz öz istəyimizə tezliklə nail olacağıq. Yaxşı olardı ki, ABŞ səfiri Ermənistanın sülh prosesini necə pozmasından, silahlı terrorçuları ərazimizdən çıxarmamaslndan danışardı. Təəssüf ki, bu istiqamətdə bəyanatları görmürük. Ancaq qanuni keçirdiyimiz və bizim haqqımız olan dinc aksiyaya başqa don geydirməklə məşğul olurlar. Mən ABŞ diplomatlarını bir qədər obyektiv olmağa çağırıram”.
Məhəmmədəli QƏRİBLİ
