Molla rejimi ilə terrorçu Ermənistanın işbirliyi get-gedə daha çirkin forma almağa başlayıb. Azərbaycana qarşı hər fürsətdə təxribat törədən “qardaşlar” indi də tarixi Azərbaycan şəhəri İrəvanı öz oyunlarına alət etməyə cəhd edirlər.
Azərbaycan mətbuatında erməni mətbuatına istinadən verilən məlumata görə, İrəvan meri Qraçya Sarkisyan Tehrana səfər edib. Qeyd edilənə görə, onun Tehran meri Əlirza Zəkani ilə görüşü zamanı İrəvanla Tehranın “qardaşlaşmış şəhərlər” elan edilməsi haqqında saziş imzalanacaq.
Erməni mətbuatı görüşün yanvarın 18-də baş tutacağını yazıb.
Tarixi Azərbaycan şəhəri ilə fars şəhəri Tehran necə qardaşlaşa bilər ki? Ermənilərlə mollakratiya rejimi bununla hansı yeni təxribat hazırlayır?
“Bu gün molla rejiminin və hayların təxribatları bu birliyə qarşı yönəlib”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli bu “qardaşlaşma”nın gülünc görsəndiyini və heç bir tarixi əsasa söykənmədiyini qeyd etdi. “Bu onu göstərir ki, bölgədə yeni hərbi-siyasi birliklər yaranır. Faktiki olaraq, Azərbaycan, Türkiyə, Pakistan arasındakı hərbi birliyin, eyni zamanda da türk dövlətləri təşkilatının mövcudluğundan bölgədə ən çox narahat olan dövlətlər arasında İran və Ermənistan adlanan ölkələr də var. İran adlanan ölkə daha çox narahatlıq keçirir. Molla rejiminin artıq bölgədə ciddi bir müttəfiqi qalmır. Belə demək mümkündürsa, bu rejimlə artıq bir çox məsələlərdə razılaşmaq olmur. Bu səbəbdən də İran adlanan ölkə naəlac qalıb Ermənistanla əlaqə qurur. Məsələ burasındadır ki, molla rejimi indiki Ermənistanın şəhərləri ilə “qardaşlaşma”, yaxud hansısa bir şəhərdə konsulluq açmaqla pərdə arxasında işlər görür. Buna gerçəkçi yanaşsaq, əslində bu, Azərbaycan – Türkiyə birliyinə, Şuşa bəyannaməsinə qarşı yönəlib. Söhbət İrəvan və Tehranın “qardaşlaşmasından” gedirsə, bu bir təxribatdır. İrəvan tarixən Azərbaycan türklərinin torpağı olub. Əvvəlcə Çar Rusiyası tərəfindən işğal olunub, bundan sonra ora ermənilər köçürülüb gətirilib, Azərbaycan türkləri soyqırımlara, deportasiyalara məruz qalıb. Məlumdur ki, ermənilər İrəvana sonradan sahibləniblər. İrəvan kimi Tehran da bir türk, Azərbaycan şəhəridir. Lakin son əsrlərdə başımıza gətirilən faciələr nəticəsində İrəvan hayların, Tehran isə farsların nəzarəti altına keçib. Mollalarla terrorçu ermənilər bu iki türk şəhərini qardaşlaşdırmaqla bizə qarşı alternativ hərbi-siyasi birlik yaratdıqlarını ortaya qoymağa cəhd edirlər. Bunun sonucunda bu görsənir”.
F.Ələkbərli bir daha vurğuladı ki, Tehranın və İrəvanın tarixi türk şəhəri olduğu aydındır, bunu haylar da, farslar da yaxşı bilir. Bu gün İrəvanın yüzdəyüz işğal altında olduğunu deyən F.Ələkbərli qeyd etdi ki, Tehran əhalisinin isə yarıdan çoxu Azərbaycan türkləridir, amma buna baxmayaraq, idarəetmə fars-molla şovinist rejiminin əlindədir. “Bunlar da öz varlıqlarını qorumaq üçün bu cür çirkin təxribatlara əl atırlar. Anlayırlar ki, Azərbaycan-Türkiyə-Pakistan hərbi birliyi, xüsusən də Şuşa bəyannaməsi nəticəsində vaxtilə itirdikləri və bu gün əldə etməyi haqq etdikləri torpaqlara sahib çıxacaq. Artıq bu bəyannamə də, birlik də buna imkan verəcək. Bu gün molla rejiminin və hayların təxribatları bu birliyə qarşı yönəlib. Burada bir məqamı da unutmayaq. Azərbaycanın Güneyində gedən proseslər də onları ciddi narahat edir. Güney azərbaycanlıların mücadiləsinin müsbət nəticələnəcəyi şübhəsizdir. İndi molla rejimi və haylar birləşərək Azərbaycanın bütünləşməsinin qarşısını almaq istəyirlər. Azərbaycan yalnız Şimali Azərbaycandan ibarət deyil. BAO olaraq biz hər zaman Azərbaycanı bütöv təqdim etmişik...”
Bu gün əli hər yerdən üzülən molla rejiminin özünə Avropadan Fransanı, bölgədə isə Ermənistanı müttəfiq seçməsi heç bir nəticə verməyəcək. Alim hesab edir ki, bu gün Azərbaycan-Türkiyə, Pakistan və digər türk dövlətlərinin də birliyi nəticəsində biz bu məsələləri kökündən həll edəcəyik. “Şuşa ilə Ankarının, Bakı ilə İstanbulun, Təbrizlə Naxçıvanın, Urmiya ilə Gəncənin qardaşlaşması təbiidir. Amma molla rejimi ilə terrorçu Ermənistan Tehranla İrəvanın “qardaşlaşmasını” süni şəkildə, heç bir əsas olmadan həyata keçirmək istəyir. Süni məsələlər isə heç vaxt gerçəkləşməyib. Həqiqət hər zaman öz yerini tutub bu məsələdə də tutacaq”- deyə F.Ələkbərli vurğuladı.
İradə SARIYEVA
