Məlum olduğu kimi, yanvarın 9-da Ermənistandan Qarabağa ötürülən yeganə yüksək gərginlikli 110 kV-luq xəttinin 33-cü km-də qəza baş verib. Belə ki, Gorus-Xankəndi xətti Laçın ərazisində zədələnib. Hava şəraiti ilə əlaqədar hazırda vəziyyətin bərpa edilməsi mümkün deyil. Buna görə də elektrik enerjisi müvafiq məhdudiyyətlərlə yerli generasiya stansiyaları vasitəsilə veriləcək.
Ancaq Ermənistan baş naziri Nikol Paşinyan bundan siyasi minipulyasiya məqsədi ilə istifadə edir. Nikol yanvarın 12-də keçirilən hökumət iclasında bəyan edib ki, guya Azərbaycan Qarabağda elektrik enerjisinin verilişinin bərpasının qarşısını alır: “Qəza Azərbaycanın nəzarətində olan ərazidə baş verib, onlar hələ də nə Ermənistan tərəfinə, nə də (Rusiya) sülhməramlılarına təmir işləri aparmağa imkan verməyiblər. Qarabağda elektrik enerjisinin kəsilməsinə başlanılıb”.
Onsuz da azərbaycanlı ekofəalların Laçın yolunda keçirdiyi aksiya ilə bağlı erməni tərəfi böyük şou yaradıb. Guya ki, bu, Qarabağda humanitar böhrana səbəb olub. İndiki vəziyyətdə Azərbaycan elektrik xəttinin bərpasına niyə mane olsun ki? Bu bizə lazımdırmı?
“Bununla o çalışır ki, beynəlxalq ictimai rəydə Azərbaycanla bağlı kəskin mənfi rəy formalaşsın”
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, elektrik enerjisi xəttinin bərpasına Azərbaycanın guya maneə törətdiyi barədə Paşinyanın dedikləri böhtandır: “Əvvəla, Azərbaycan Qarabağdakı etnik erməniləri öz vətəndaşı kimi qorumağa hazırdır. Azərbaycan Qarabağdakı 40 minə yaxın etnik erməniyə Konstitusiyamızdan yararlanmağa şans verir. Biz sadəcə onları dövlətimizin qanunlarına tabe olmağa çağırırıq. Şuşa-Xankəndi yolunda bizim könüllülərin keçirdikləri aksiyada məlum oldu ki, yüklərin daşınmasında, xəstələrin aparılmasında heç bir maneə yoxdur. Üstəlik, dəfələrlə Azərbaycan təklif edib ki, onların ehtiyaclarını qarşılamağa hazırdır. Belə olan halda biz niyə elektrik xəttinin bərpasına mane olaq ki? Belə bir addım atsaq, o zaman Azərbaycan beynəlxalq qınaqla üzləşəcək. Buna da əsla biz getmərik. Onsuz da bizə qarşı yetərincə haqsız tənqidlər səslənir. Bu baxımdan hesab edirəm ki, elektrik təchizatı ilə bağlı Paşinyanın Azərbaycanın ünvanına səsləndirdiyi fikirlər böhtandır. Bununla o çalışır ki, beynəlxalq ictimai rəydə Azərbaycanla bağlı kəskin mənfi rəy formalaşsın. Nəzərə almaq lazımdır ki, Laçın şəhəri nəzarətimizə keçəndən sonra ermənilər elektrik təchizatı xəttini yeni yola köçürdülər. Yeni Laçın yolu da sülhməramlıların nəzarət hissəsindədir. Belə olan halda Azərbaycan həmin xəttin bərpasına necə mane ola bilər? Paşinyan erməni ictimai rəyində özünə haqq qazandırmaq üçün belə yalan məlumatla çıxış edir. Əgər Azərbaycan Qarabağdakı etnik erməniləri qanunlarımıza tabe olmağa çağırırsa, onların ehtiyaclarını ödəməyə hazır olduğunu bəyan edirsə, o zaman elektrik təchizatına niyə mane olsun ki? Hələ də Qarabağda silahlı terrorçular var və Azərbaycan müəyyən səbəblərdən prosesləri səbrlə müşahidə edir. Lazım gələndə, onları güc yolu ilə zərərsizləşdirəcək. Ancaq dinc insanlarla qışın bu vaxtında Azərbaycanın işi yoxdur. Üstəlik, bu kimi məsələlərə Paşinyanın qarışması doğru deyil”.
Sədr müavini onu da əlavə etdi ki, kimin nə deməsindən asılı olmayaraq Azərbaycan öz işində olmalıdır.
Vidadi ORDAHALLI
