Prezident İlham Əliyev yerli televiziya kanallarına müsahibəsində deyib ki, deportasiya olunmuş azərbaycanlıların Qərbi Azərbaycana qayıtmaları ermənilərə problem yaratmayacaq:
“Çünki onların oraya qayıtmaları orada yaşayan ermənilərin oradan çıxarılması demək deyil. Çünki o kəndlər boşdur və biz, əlbəttə ki, əlimizdə olan bütün imkanlardan istifadə edəcəyik.
Necə ki, vaxtilə Qarabağ mövzusu bütün Azərbaycan xalqını birləşdirdi və biz istəyimizə nail olduq, eyni yanaşmanı burada da görməliyik. Əlbəttə, burada media nümayəndələrinin fəaliyyətinə böyük ehtiyac var - həm ölkə daxilində, həm xaricdə. Mən bu barədə də fikirlərimi bildirmişəm. Yəni çox geniş proqram hazırlanır”.
Prezident deyib ki, bizim bütün proqramlarımız bir qayda olaraq icra edilir: “Biz heç vaxt reallaşması mümkün olmayan təşəbbüslərlə çıxış etmirik. Ona görə bu sahədə də artıq proqramın üzərində iş gedir. Əminəm ki, biz buna da nail olacağıq və tarixi ədaləti bərpa edəcəyik”.
Maraqlıdır, indiyədək heç bir beynəlxalq missiya Ermənistana yaşayış
yerlərinin boş olması ilə bağlı irad tutmayıb? Görünən budur ki, onlar lazımi sayda erməni tapıb bizim evlərimizə doldura bilməyiblər. Yalnız əllərinə keçən az sayda ermənini zorla gətirib işğal altında olan ərazilərimizə yerləşdirmişdilər.
Əslən Qərbi Azərbaycandan olan AMİP sədri Arzuxan Əlizadə “ Bakı-Xəbər”ə açıqlamasında bildirdi ki, Qərbi azərbaycanlıların öz ata-baba yurdlarına qayıtması ilə bağlı məsələ hər zaman bizim üçün prioritet olub: “Partiya olaraq bu məsələni daim diqqətdə saxlamışıq. Ötən il ABŞ səfiri ilə partiyamızın qərargahında görüş keçirdik. Orda da bu mövzunu qabartdıq. Eyni zamanda təmsil olunduğumuz bütün beynəlxalq platformalarda mövqeymizi bildirmişik. Mövqeyimiz budur ki, son 100 ildə bir milyondan artıq soydaşımız oradan deportasiya edilib. Bunun son dalğası 1988-ci ilə təsadüf edib. Mövqeyimizi belə əsaslandırmışıq ki, necə olur bir ovuc erməni gətirilib Azərbaycanın göbəyində məskunlaşdırıla bilir və onların hüquqları ilə ölkələr maraqlanır, ancaq bir milyon soydaşımızın taleyi heç kimi maraqlandırmır? Zamanında bununla bağlı böyük yanlışlığa yol verilib. Orada yaşayan soydaşlarımıza Vəzirov və Mütəllibov hakimiyyəti heç bir dəstək vermədi. Onlar ov tüfənglərindən belə məhrum edildilər. Qarabağdakı ermənilərə isə Ermənistandan böyük siyasi və mənəvi dəstək verildi. 1988-ci ildə lazımi dəstək olsaydı, bizim soydaşlarımız bu aqibəti yaşamazdı. Hətta həmin qaçqınların Qarabağ bölgəsinə yerləşdirilməsi belə təmin edilmədi”.
Partiya sədrinin sözlərinə görə, onlar Qarabağda yerləşsəydilər indi heç bu problem də olmazdı: “ Qaçqın düşən soydaşlarımızın sovet pasportları yığıldı. Bunun özü də yanlış olub. Yeni yaradılan İcma Qərbə azərbaycanlıları təzədən siyahıya alır. Hətta yığılırdısa belə, həmin pasportlar arxivlərdə saxlanılmalıydı. Həmin sənədlər onıarın geri qayıtması üçün əsasları tam təmin edərdi. Şükürlər olsun ki, son dönəmdə Azərbaycan hakimiyyəti bu məsələdə ciddi işlər görməyə başlayıb. Prezidentin son müsahibısində bu məsələyə xüsusi diqqət ayrılıb. Bu məsələdə biz partiya olaraq dövlətimimizin yanındayıq. Bizim soydaşlarımızın yaşadıqları kəndlərin böyük əksəriyyətinin boş qalması da danılmaz faktdır. Hazırda ermənilərin özləri oranı tərk edir. Ermənistanda demoqrafik vəziyyət ildən-ilə daha da pisləşir. Yəni həmin kəndlərə yerləşdirmək üçün erməni tapa bilmirlər. Təbiidir ki, Azərbaycan Prezidenti bu faktlarla bağlı dəqiq bilgilərə sahibdir. Soydaşlarımızın qayıdaraq həmin əraziləri abadlaşdırması böyük layihə olmalıdır. Mövqeyimiz bu olmalıdır ki, soydaşlarımız ora yerləşmədən heç bir sülhdən və sabitlikdən danışmaq olmaz”.
Məhəmmədəli QƏRİBLİ
