Prezident İlham Əliyev yerli telekanallara müsahibəsi zamanı bildirib ki, dünya qütbləşib və qarşıdurma dərinləşir:
“İndi faktiki olaraq Üçüncü Dünya müharibəsi gedir, kim bunu necə adlandırır adlandırsın. Bu münaqişəyə qoşulan ölkələrin sayına baxsaq görərik ki, bu, faktiki olaraq Üçüncü Dünya müharibəsidir, amma yeni üsulla aparılır, Birinci Dünya müharibəsindən də, İkinci Dünya müharibəsindən də fərqlənir. İndi üstündən 80 il keçib. Qərblə Rusiya arasında uçurum dərinləşəcək, mən belə görürəm. Müharibənin nəticələri, əlbəttə ki, buna təsir edəcək, müharibə başa çatandan sonra. Amma bu qarşıdurma və inamsızlıq uzun sürən bir prosesdir…”
Bir müddət əvəl Roma Papası da 3-cü dünya müharibəsinin getdiyini bəyan etmişdi. Dünyada baş verən bu kataklizmlərin fonunda İlham Əliyevin rəhbərlik etdiyi Azərbaycan bu dünya müharibəsindən necə və nəyin hesabına kənarda qala bilir?
Politoloq Qabil Hüseynli “Bakı-Xəbər”ə bildirdi ki, bunu şərtləndirən bir çox amillər var: “Prezident balanslaşmış və uğurlu xarici siyasət xəttini həyata keçirir. Bunun nəticəsidir ki, Azərbaycan bir çox problemlərdən özünü kənarda saxlaya bilir. Biz Qoşulmama Hərəkatında təmsil olunmaqla yanaşı, həm də bu təşkilatın dünyadakı nüfuzunu qaldırırıq. Hazırda həmin təşkilata sədrlik edirik. İslam Əməkdaşlığı Təşkilatında da bizim xüsusi bir çəkimiz var. Bu təşkilat da Azərbaycanın həm Ermənistanla münaqişəsi, həm də xarici siyasət konturlarının müəyyənləşməsinə dəstək verir. Azərbaycanın post-sovet ölkələri ilə də yaxın münasibətləri var. Türk dünyasının açar ölkələri ilə qardaş münasibətlərə sahibik. Qardaş Türkiyə ilə Türk Dövlətləri Birliyinin inkişafı üçün əlimizdən gələn töhfəni veririk. Azərbaycanın Qərb yönümlü siyasətində uğurla inkişaf edir. Avropanın enerjidaşıyıcılarına olan ehtiyaclarının ödənilməsində Azərbaycanın rolu bir az da artır. Azərbaycan həm logistika, həm də enerji yollarının keçdiyi qovşaq rolunu daşıyır. Bütün bunlar bizim nüfuzumuzu xeyli dərəcədə artırır. Azərbaycan beynəlxalq münasibətlərdə dinamik rol oynayır. Ermənistanla sülh müqaviləsinin bağlanması istiqamətində təşəbbüs bütünlüklə bizə məxsusdur. Bu məsələ tam başa çatandan sonra Azərbaycan həm Avropa, həm də dünyada oynayacağı rol çox yüksək səviyyəyə qalxacaq. Azərbaycan yenə də dünyanın hörmət edilən ölkəsi kimi öz müavizinətini saxlamağı bacaracaq. Rusiya-Ukrayna müharibəsi yekunlaşandan sonra dünya yeni görkəm alacaq. Azərbaycan bu yeni düzənin vacib aktoru kimi öz mövqeyini daha da gücləndirəcək. Bütün bu parametrlər bizi dərin kataklizmlərdən qoruyan başlıca amildir”.
Görünən budur ki, dövlət başçısı son müsahibəsində Rusiya-Ukrayna müharibəsi fonunda ölkəmizin hüdudlarından kənarda formalaşan yeni təhdidlərə, risqlərə toxunaraq, dünyada sülhə təhdid yaradan amilləri aradan qaldırmaq, mübahisəli məsələləri dinc şəkildə tənzimləmək və təcavüzkar siyasətin qarşısını almaqdan ötrü təsis edilmiş beynəlxalq təşkilatların, xüsusilə də BMT Təhlükəsizlik Şurasının (TŞ) funksional olaraq yenidən öz fəaliyyətinə nəzər salınmasına dair qlobal çağırışlar etdi. Bütün bunlar zərgər dəqiqliyi ilə hesablandığı üçün biz stabil ölkə kimi yaşaya bilirik.
Məhəmmədəli QƏRİBLİ
