Prezident İlham Əliyev yerli telekanallara müsahibəsində son vaxtlar xarici mətbuatda guya Azərbaycanın Rusiya qazını sonradan Avropaya, dünya bazarlarına ixrac etmək məqsədilə aldığı barədə yayılan informasiyaların əsassız olduğunu qeyd etdi:
“Mənim fikrimcə, bu, informasiya manipulyasiyasıdır və belə düşünməyim üçün hər cür əsas var. Deməliyəm ki, ilk dəfə bunu Almaniyanın sabiq kansleri və Rusiya enerji şirkətlərindən birinin keçmiş rəhbərlərindən olan cənab Şröder bəyan etmişdi. Sonra bu versiya mətbuatda yayıldı və təbii ki, əleyhdarlarımız onu sevinclə qarşıladılar, bizi guya hansısa haqsız oyun aparmaqda ittiham etməyə çalışdılar. Bu, hər cür məntiqə tamamilə ziddir. Hətta elementar olaraq bizim ixracın həcminə nəzər salsaq, aydın görünür ki, bu barədə söhbət ola bilməz”.
Həqiqətən də deyilənlərin heç bir əsası yoxdur. Çünki əvvəl çox məhdud həcmdə Rusiya ilə sərhəd bölgələrin qazla təmin edilməsi ilə bağlı svop razılaşmalar olub. O baxımdan buna başqa don geyindirməyin heç bir mənası yoxdur. Ancaq indiki şəraitdə belə şayiələrin yayılması təsadüfi deyil. Bu cür əsası olmayan informasiyaların yayılması müəyyən geosiyasi oyunlara hesablanıb. Maraqlıdır, Azərbaycan haqqında bu cür ittihamların və geosiyasi şayiələrin yayılmasının arxasında nə niyyət dayanır?
“Belə dezinformasiyaların yayılmasında məqsəd ölkəmizin etibarlı enerji təchizatçısı imicini sarsıtmaqdır”
Sözügedən məsələ ilə bağlı fikirlərini “Bakı-Xəbər”lə bölüşən iqtisad üzrə fəlsəfə doktoru Firdovsi Şahbazovun sözlərinə görə, belə dezinformasiyaların yayılmasında məqsəd Azərbaycanın etibarlı enerji təchizatçısı imicini sarsıtmaqdır: “Guya ki, Azərbaycan öz resursları hesabına Cənub Qaz Dəhlizi çərçivəsindəki boru xətlərini qazla doldurmaq gücündə deyil. Azərbaycanın imicinə yönəlik bu cür fəaliyyət məhz Rusiya və İranın maraqlarına cavab verir. Çünki hər iki dövlət qaz ixracatçısıdır. Hər iki dövlət sanksiyalara məruz qaldığı üçün Azərbaycan qazının Avropa bazarına çıxarılmasında maraqlı deyil. Baxmayaraq ki, Rusiyanın qaz ehtiyatları Azərbaycanla müqayisəolunmaz dərəcədə böyükdür. Lakin istəmirlər ki, ölkəmizin Avropa İttifaqında önəmi artsın. Məhz ilk dəfə Almaniyanın sabiq kansleri Herhard Şröderin də belə əsassız informasiya yayması bunun tərkib hissəsidir. Çünki Şröder Putinlə çox yaxın əlaqələrə malikdir. Onun hələ Almaniyanın kansleri olduğu dönəmlərdə (1998-2006) Rusiya ilə korrupsiya əlaqələrində olduğu barədə iddialar var. Ona görə də belə informasiyalar məqsədli şəkildə media orqanlarında yayılır ki, Azərbaycana inam azalsın. Çünki bir sıra dairələr görür ki, Azərbaycandan qaz almaq istəyən Avropa ölkələrinin sayı sürətlə artır. Baxmayaraq ki, biz hələ elə də böyük həcmdə qaz Avropaya ixrac etmirik. Ancaq nəzərə alsaq ki, hələ ölkəmizin təstiq olunmuş qaz eytiyatları 2,6 trilyon kubmetrdir, üstəlik, hələ kəşf olunmayan yataqlar var, bu baxımdan Azərbaycana stavka edirlər. Bundan da bəlli dairələr narahatdılar. Rusiya 2006-cı ilə qədər ölkəmizə 4 milyard kubmetrdən artıq qaz ivrac edirdisə, sonra bu tamamilə dayandırıldı. Daha sonra Azərbaycan yerli istehsal hesabına həm öz tələbatını təmin etdi, həm də bunu ixrac erməyə başladı”.
Bu baxımdan ekspert hesab edir ki, deyilənlər əsassızdır.
Vidadi ORDAHALLI
