Bu gün (12 yanvar) ölkə Prezidentinin 12 yanvar 2021-ci il tarixli Fərmanı ilə yaradılan Medianın İnkişafı Agentliyinin (MEDİA) 2 yaşı tamam olur. Məlumdur ki, Agentliyin əsas fəaliyyət istiqamətləri müvafiq sahənin inkişafını təmin etmək, dövlət siyasətinin formalaşdırılmasında və həyata keçirilməsində iştirak etmək, müvafiq sahədə aidiyyəti dövlət orqanları ilə əməkdaşlıq etmək, təkliflərin işlənib hazırlanmasında və həyata keçirilməsində iştirak etməkdən ibarətdir.
Medianın İnkişafı Agentliyinin iki il ərzində necə fəaliyyət göstərməsi, gələcəkdə hansı yeniliklərin olması barədə media kapitanları ilə söhbətləşdik.
Hacıbəy Heydərli: “Reyestrin yaradılması Azərbaycan jurnalistikası üçün yeni səhifənin açılması oldu”
“Azxeber.com” saytının baş redaktoru Hacıbəy Heydərli “Bakı-Xəbər”ə açıqlamasında qeyd etdi ki, son illər Azərbaycanda hər sahədə islahatlar aparılır. Cəmiyyətin güzgüsü olan media da bu islahatlardan kənar qala bilməz və 2 il öncə Medianın İnkişafı Agentliyinin yaranması bu islahatların əsas lokomotivi rolunu oynadı: “Birmənalı şəkildə demək olar ki, agentlik 2 il ərzində mətbuatımız üçün, jurnalistlərimiz üçün çox böyük işlər görüb. Agentliyin həyata keçirdiyi layihələr, media savadlılığının artırılması istiqamətində görülən işlər, xaricdən peşəkar jurnalistlərin dəvət olunması, bölgələrdə region mətbuatının inkişafı istiqamətində görülən işlər və onlayn media subyektlərinə də maliyyə yardımının ayrılması bu islahatların bir parçasıdır. Bilirsiniz ki, son illərə qədər yalnız qəzetlərə maliyyə yardımı ayrılırdı. Cəmiyyətin nəbzini tutan xəbər saytlarına, media subyektlərinə maliyyə yardımı ayrılmırdı. Medianın İnkişafı Agentliyi yarandığı ilk gündən bu istiqamətdə işlər apardı və onlayn media subyektlərinə də dövlət dəstəyinin verilməsilə bağlı yardım layihəsi həyata keçirdi. Bu layihə də xəbər saytlarının, media subyektlərinin daha da peşəkarlaşmasına, fəaliyyətlərinin daha dürüst, şəffaf qurulmasına böyük yardımçı oldu. Artıq zaman göstərir ki, onlayn media subyektlərinə maliyyə yardımı Azərbaycan mətbuatının peşəkarlaşması istiqamətində aparılan islahatların davamıdır”.
H.Heydərlinin sözlərinə görə, 2 il qısa müddət olsa da, görülən işlər onu deməyə əsəs verir ki, MEDİA mətbuatımızın şəffaflaşmasında maraqlıdır, bu istiqamətdə işləri davam etdirir: “Məlumdur ki, MEDİA-nın təlimlərinə təkcə baş redaktorların yox, jurnalistərin də cəlb edilməsi çox önəmlidir. Biz əvvəlki zamanlarda görürdük ki, tədbirlərə, təlimlərə yalnız eyni adamlar dəvət olunur, sanki özləri üçün yeni bir media dairəsi yaradılmışdı, ancaq MEDİA bu stereotipi qırdı, demək olar ki, bütün media subyektlərinin nümayəndələri tədbirlərə, təlimlərə, səfərə dəvət edildi. Bütün bunların nəticəsi kimi MEDİA hər bir jurnalist üçün doğma ünvana çevrildi”.
Həmsöhbətimiz xüsusi olaraq vurğuladı ki, "Media haqqında qanun"un qəbulu, "Media reyestri"nin yaradılması Azərbaycan mətbuatı üçün inqilabi hadisədir. Xüsusən, reyestrin yaradılması Azərbaycan jurnalistikası üçün yeni səhifənin açılması oldu, mediamızın şəffaflaşması üçün atılan addımların nəticəsini qarşıdakı illərdə görəcəyik. MEDİA-nın daha bir özəlliyi də odur ki, istənilən tənqidə açıq qurumdur və mətbuatımızın problemlərini bilirlər, açıq şəkildə dilə gətirirlər.
Aqil Camal: “Media haqqında qanun” layihəsinin hazırlanması, bilavasitə MEDİA Agentliyinin özünün apardığı bir proses olub”
“Türküstan” Media Qrupunun rəhbəri Aqil Camal qəzetimizə açıqlamasında bildirdi ki, MEDİA Agentliyinin iki illik fəaliyyətindən danışarkən, ilk növbədə mediamız, ölkəmiz üçün əhəmiyyətli olan “Media haqqında” Qanunun qəbulunu qeyd etmək lazımdır. Çünki bu qanun layihəsinin hazırlanması, bilavasitə MEDİA Agentliyinin özünün apardığı bir proses olub: “Həqiqətən çətin, mübahisələrlə, subyektiv yanaşmalarla zəngin bir prosesdən keçən layihə, nəhayət ki, qəbul olundu. Bununla da, Azərbaycanda media qanunvericilik bazasının müasir çağırışlara və tələblərə uyğun şəkildə formalaşdırılması, medianın gələcək inkişaf konsepsiyası da müəyyən edilmiş oldu.
Hesab edirəm ki, bu qanunun qəbulu MEDİA Agentliyinin iki illik fəaliyyətinin əsas detalını təşkil edir. Qanun qəbulunun məntiqi davamı və tələbi olaraq Media Reyestrinin tətbiqinə başlanması mediamız üçün olduqca əhəmiyyətli hadisədir.
Azərbaycan mediası uzun illərdir ciddi və qeyri-ciddi, yaxud ciddi və reket mediası anlayışlarından əziyyət çəkir. Və bu problem cəmiyyətdə mediaya münasibətin formalaşmasında mühüm rol oynayır. Media Reyestrinin tətbiqi artıq bu sahədə bir aydınlaşma yaratmağa, ciddi media ilə media adına iddia edərək tamamilə başqa məqsədlər üçün çalışanlar arasında sədd çəkilməsinə köməklik göstərir. Ümid edirəm ki, bu proses uğurla davam etdiriləcək.
Bundan əlavə, vaxtaşırı media subyektlərinin rəhbərləri və əməkdaşları üçün keçirilən seminarlar, çap mediasının və onlayn medianın fəaliyyətinin dəstəklənməsi üçün həyata keçirilən layihələr Agentliyin iki illik məhsuldar fəaliyyətini şərtləndirən məsələlər sırasındadır.
Agentlik 2023-cü il üçün də qarşısına yeni məqsədlər, hədəflər qoyub. Bu hədəflərə çatmaqda uğurlar arzu edirəm”.
Günel CƏLİLOVA
