“Biz ordu xərclərinə böyük vəsaitin ayrılmasına başlayanda məni hətta beynəlxalq qurumlarda ittiham edirdilər”. Bunu Prezident İlham Əliyev yerli televiziya kanallarına müsahibəsi zamanı deyib.
Ölkə başçısının sözlərinə görə, bizim ordumuz müharibə zamanı öz gücünü göstərdi, iradəsini göstərdi, xalqımız bütövlükdə əyilməz ruhunu göstərdi: “Ordumuz kifayət qədər güclü idi. Ordumuzun gücləndirilməsi heç kimə sirr deyildi. Yadımdadır, biz ordu xərclərinə böyük vəsaitin ayrılmasına başlayanda məni hətta beynəlxalq qurumlarda ittiham edirdilər ki, axı Azərbaycan bu məsələni sülh yolu ilə həll etməlidir, bu məsələnin hərbi həlli yoxdur. Nə üçün bu qədər vəsait ayrılır? Hətta ölkə daxilində bəziləri tənqidlə yanaşırdılar ki, nə üçün orduya bu qədər vəsait ayrılır. Bizim keçirdiyimiz paradlara pis gözlə baxanlar da olmuşdur. Biz, sadəcə olaraq, öz imkanlarımızı göstərirdik ki, bu işğalla barışmayacağıq. Ermənistanın əvvəlki və indiki rəhbərliyinə də demişdim, əgər hesab edirsiniz ki, belə davam edəcək, davam etməyəcək. Sadəcə olaraq, hesab edirdilər ki, bu, təbliğat naminə deyilən sözlərdir”.
“Yalnız güclü ordu ilə işğala son qoymaq olardı və belə də oldu”
Məsələyə münasibət bildirən politoloq Tural İsmayılovun fikrincə, xarici dairələr Azərbaycanın öz ordusunu gücləndirməsində maraqlı deyildilər: “Məsələ ondadır ki, ordu quruculuğu daim Azərbaycan dövlətinin diqqət mərkəzində olub. Xüsusən də İlham Əliyev prezident seçiləndən sonra ordu quruculuğuna böyük vəsaitlər ayrılıb. Çünki ərazilərimiz işğal altında idi. Yalnız güclü ordu ilə işğala son qoymaq olardı və belə də oldu. Bəli, o zaman Azərbaycan ordu quruculuğuna böyük vəsaitlər ayıranda beynəlxalq qurumlar bundan narahat olurdular. Ona görə bizi tənqid edirdilər ki, ərazilərimizin işğaldan azad olunmasını istəmirdilər. İstəyirdilər ki, biz bu işğalla barışaq. Ancaq Prezident İlham Əliyev yeritdiyi uğurlu siyasətlə bütün bu planların üstündən xətt çəkdi. Ancaq ərazilərimizin azad edilməsi o demək deyildi ki, bu sahəyə ayrılan vəsait azaldılacaq. Qətiyyən yox. Çünki güclü ordu ölkəni potensial təhdidlərdən qoruyur. Azərbaycanın bu ilki dövlət büdcəsində də orduya ayrılan xərclər maksimal səviyyədədir. Yeri gəlmişkən nəzərə almaq lazımdır ki, 2020-ci ildə 44 günlük Vətən müharibəsində böyük qələbə qazanan Azərbaycan Ordusu indi daha təkmil və peşəkardır. Müharibədən sonra orduda bir sıra islahatlar həyata keçirilib. Ordunun həm kadr potensialı, həm bazası ən yaxşı şəkildə inkişaf etdirilib. İndinin özündə də sözügedən proseslər davam etdirilir. Bundan sonra da Ermənistanın müharibəyə təhrik edildiyi faktları nəzərə alsaq, Azərbaycanda ordu quruculuğunun dövlət siyasətinin prioritetlərindən biri olması reallıqdır. Çünki bu, kifayət qədər önəmli məqamlardan birini təşkil edir. Ona görə də bu gün Azərbaycan təkcə hərbi birlikləri baxımından deyil, həm də hərbi sənaye baxımından dünyanın öncül ölkələrindən biri olmağa iddialıdır”.
Vidadi ORDAHALLI
