Prezident İlham Əliyev yerli televiziya kanallarına müsahibəsində bildirib ki, biz uzun müddət belə yaşaya bilərik, sülh müqaviləsi olmasa heç lazım da deyil: “Amma sonra nə olacaq? Sonrasına baxarıq. Buna görə də düşünürəm ki, onlar mənim mesajlarımı eşidəcək və düzgün nəticə çıxaracaqlar.
Bir daha deyirəm, mən indiki halda təzyiq göstərən tərəf kimi görünmək istəmirəm və heç bir halda, heç bir şəraitdə hətta hörmətə layiq olmayana da hər hansı hörmətsizlik göstərməmişəm. Sadəcə, bir daha nəzərə çatdırmalıyam. Ona görə ki, mənim fikrimcə, bu il sonuncu şans olacaq. Ona görə ki, sonra 2024-cü il gəlir, sonra 2025-ci ildə Rusiyanın sülhməramlı missiyası başa çatır. Onlar burunlarının ucundan bir qədər irəli barədə düşünməlidirlər”.
Prezidentin Ermənistana yönəlik bu xəbərdarlığından hansı nəticəni çıxarmaq olar?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Prezidentin yerli televiziya kanallarına müsahibəsində bir çox önəmli məqamlar vardı: “Həm ölkədaxili, həm də beynəlxalq məsələlərlə bağlı ciddi mesajlar verildi. Eyni zamanda, Azərbaycan və Ermənistan arasında sülh prosesinin gedişatı ilə bağlı Prezident öz qətiyyətli mövqeyini bir daha ortaya qoymuş oldu. Həm regionda marağı olan oyunçulara, həm də beynəlxalq ictimaiyyətə lazım olanları bildirdi. Cənab Prezidentin də vurğuladığı kimi, 2023-cü il Ermənistan üçün son şansdır. Biz 44 günlük müharibədə Ermənistanı diz çökdürən bir ölkəyik. Ölkəmiz indiyə qədər Ermənistana çox şanslar verib. Təəssüf ki, Ermənistan bunları dəyərləndirməyib, sülh prosesini pozmağa çalışıb. Bu onlar üçün son ildir. Çünki əgər Ermənistan öz üzərinə götürdüyü öhdəlikləri yerinə yetirməyəcəksə, əlbətdə ki, öz layiqli cavabını alacaq. Bu istət hərbi, istərsə də siyasi platformalarda olacaq. Prezident də bildirdi ki, biz üçüncü müharibənin başlanmasını istəmirik. Amma bu o demək deyil ki, Ermənistanın hər hansı hərəkəti cavabsız qalacaq. Bütün bu məsələlər gedişatda öz həllini tapmalıdır. Çünki Ermənistan öz üzərinə düşən öhdəliyi mütləq mənada yerinə yetirməlidir. Rusiya sülhmıramlılarına da mesaj vardı. Rüsiya sülhmıramlılarının mandatı 2025-də bitir. Sənəddə göstərilir ki, tərəflərdən biri: Ermənistan və ya Azərbaycan Rusiya sülhməramlılarının qalmasına etiraz edərsə, onlar ərazini tərk etməlidir. Azərbaycan mütləq bu hüququndan istifadə edəcək. Nəticədə sülhməramlılar bizim süveren ərazilərimizdən çıxacaqlar. Belə olacağı təqdirdə, Ermənistana şans verilir ki, bu barədə düşünsün. Əmin olmaq istərdik ki, Ermənistan 2023-cü ildə düzgün qərar qəbul edəcək. Heç kimə güvənmədən, öz müqəddəratını yalnız özü müəyyənləşdirəcək. Ermənistanın bir dövlət kimi bərqərar olmasına ciddi şans yaranıb. Bunu etmək həmin ölkənin öz əlindədir. Əks təqdirdə, vəziyyəti çox ağır olacaq. Ermənistan nəticə çıxarmalıdır. İrəvan nəticə çıxarmazsa, ötən ilin sentyabr hadisələrinin iki qatı təkrarlana bilər. Çünki artıq Üçtərəfli Birgə Bəyanatın imzalanmasından iki ildən çox vaxt keçib, amma şərtlər icra edilməyib, qarşı təfər öhdəliklərini yerinə yetirməyib. Həllini tapmayan çoxsaylı məsələlər var ki, onlar həllini tapmalıdır. Separatçı yaraqlılar Qarabağdan çıxarılmayıb, Zəngəzur dəhlizi açılmayıb, sərhədlərin delimitasiyası olmayıb. Bununla yanaşı, ötən il Ermənistanın hərbi təxribatları da mütəmadi baş verdi. Bütün bunlar Azərbaycanı dərindən narahat edir. Demək olar ki, 2023-cü ildə Ermənistanı ciddi sürprizlər gözləyir”.
Azərbaycan nə istəyir ki? Rəsmi Bakı 10 noyabr Üçtərəfli Birgə Bəyanatın maddələrinin icra olunmasını, Ermənistanın üzərinə götürdüyü öhdəlikləri yerinə yetirməsini istəyir. Ermənistan isə 3-cü ildir ki, bu öhdəliklərin icrasından yayınmaqla məşğuldur.
Məhəmmədəli QƏRİBLİ
