Ermənistanın Baş naziri Nikol Paşinyan deyib ki, dünyada Qarabağı Azərbaycanın tərkib hissəsi kimi tanımayan ölkə yoxdur:
"Praqa görüşünün yekunlarına əsasən, Ermənistan və Azərbaycanın 1991-ci il Alma-Ata Bəyannaməsi əsasında ərazi bütövlüyünü tanıması barədə razılıq əldə olunub. İrəvanın narahatlığı ondan ibarətdir ki, Azərbaycan Prezidenti daim Praqa görüşünə istinad edərək Ermənistanın Azərbaycanın ərazi bütövlüyünü tanıdığını deyir, lakin Azərbaycanın Ermənistanın ərazi bütövlüyünü tanıdığını demir.
Biz aydın şəkildə bildirməliyik: Azərbaycan Ermənistanın ərazi bütövlüyünü tanıyırmı? Əgər belədirsə, o zaman Ermənistan Azərbaycanın ərazi bütövlüyünü tanıyacaq. Qalan hissələr üzrə, Qarabağ məsələsinin həllinin düsturu ilə bağlı mən 2021-ci il aprelin 13-də parlamentdə və digər ictimai bəyanatlar zamanı çıxış etmişəm”.
Çox maraqlıdır ki, sülh danışıqlarını istənilən bəhanələrlə sabotaj edən Paşinyan indi də güya Azərbaycanın onların ərazi bütövlüyünü tanımadığını bəhanə edir. Məgər Paşinyan bilmir ki, Azərbaycan onların ərazi bütövlüyünü tanıyır, yoxsa yox?
Demokratik Dəyişim Partiyasının sədri Əli Mustafa “Bakı-Xəbər”ə açıqlamasında bildirdi ki, bunu Ermənistanın növbəti bəhanəsi saymaq olar: “Ermənistan tərəfinin Azərbaycanla bağlı söhbətləri, danışıqları, sülh sazişi ilə bağlı görüşləri davam etdirməməsi, hərdən bir xəyala düşməsi çox mətləbə aydınlıq gətirmiş olur. Onu göstərir ki, Ermənistan dövlətinin də, Paşinyanın da bu məsələlərlə bağlı, yəni Azərbaycanla Ermənistanın gələcək münasibətləri ilə bağlı təsəvvürü yoxdur. Sanki şəraitə uyğun davranır. Zəifləyəndə danışıqlara çalışır, güclənəndə isə danışıqları pozmağa can atır. Erməni dələduzluğunu, bicliyini hər zaman göstərir. Amma ola bilsin ki, Paşinyanın özündə də bir şəxs kimi xarakter problemi var. Bütün bunları bir yana qoysaq, Azərbaycan Ermənistan dövlətinin ərazi bütövlüyünü nə üçün tanımalıdır? Azərbaycan Ermənistan ərazisində münaqişə yaradıb? Azərbaycan Ermənistan ərazisini işğal edib? Azərbaycan Ermənistan ərazilərinə bugünə kimi haqqı ola - ola ərazi iddiası irəli sürüb? Xeyr, bunların heç biri olmayıb. Amma Ermənistan heç bir haqqı olmadığı halda Azərbaycan ərazilərini işğal edib və 30 il işğalda saxlayıb. İndi də hər fürsətdə Qarabağ ermənilərini gizli ora yığırlar, terrorçuları gətirirlər. Qısası, demək istəyirəm ki, Azərbaycan tərəfinin Ermənistanın ərazi bütövlüyünü tanıması üçün hüquqi əsaslar da, siyasi əsaslar da yoxdur. Çünki Ermənistanın daim təhdidvari, daim təxribatçı, təcavüzkar planlar hazırladığı bir şəraitdə Azərbaycan tərəfinin də özünün hüquqi əsasları olmalıdır ki, ərazi bütövlüyanü tanısın. Bu hüquqi əsaslar nədən ibarətdir? 1.Azərbaycanla Ermənistan arasında sərhədlərinin müəyyənləşməsi, delimitasiya və demarkasiya prosesinin aparılması.
2.Azərbaycanla Ermənistan arasında sülh sazişinin bağlamması.
Bütün bunlar olmadığı müddətdə Azərbaycanın Ermənistanın qarşısında hansısa hüquqi və siyasi öhdəlikləri yoxdur ki, Ermənistana ərazi bütövlüyünə dair təlimatlar versin. Yəni onu demək istəyirəm ki, burada problem varsa, Ermənistan tərəfindən qaynaqlanır. Əgər ərazi bütövlüyü istəyirsə, o zaman sülh sazişini imzalamalıdır. Əgər ərazi bütövlüyünə təminat istəyirsə, sərhədləri müəyyənləşdirməlidir. Nə vaxt bu məsələlərdə konstruktivlik göstərəcəksə, onda özü də bu məsələlərdə narahatlığa səbəb olan problemləri həll etmiş olacaq. Digər hallarda isə, hesab edirəm ki, Azərbaycanın belə bir öhdəlik götürməsinə, bəyanatlar verməsinə lüzum yoxdur. Həm də, açığı, etiraf etməliyik ki, Ermənistan Azərbaycan torpaqlarının qanunsuz işğalı nəticəsində yaranıb. Burada da mübahisəli məsələlər var. Və hamısı həll olunmalıdır”.
Məhəmmədəli QƏRİBLİ
