Ermənistan baş naziri Nikol Paşinyan keçirdiyi mətbuat konfransında qeyd edib ki, Ermənistanın Laçın yolunun rahat işləməsini təmin etmək öhdəliyi yoxdur. Əsas vəzifələr Rusiya və Azərbaycana həvalə olunub.
Daha sonra Nikol iddia edib ki, Ermənistan Rusiya sülhməramlılarına mandatın verilməsinə razılıq verib, Azərbaycan isə yox: “Bu, üçtərəfli bəyanatda açıq şəkildə ifadə olunub. Düzdür, 2020-ci il noyabrın 9-dan sonra Azərbaycan, razılaşmalara baxmayaraq, Rusiya sülhməramlılarının mandatını imzalamadı. Amma bilməyinizi istəyirəm ki, Ermənistan və Rusiyanın müdafiə nazirləri bu mandatı imzalayıblar. Ancaq o, yalnız üç tərəf imzaladıqdan sonra qüvvəyə minir. Hər halda hesab edirəm ki, bu sənəd mövcuddur - üçtərəfli bəyanatın davamı kimi. Onsuz da hər şey aydındır - Laçın dəhlizi Rusiya sülhməramlılarının nəzarəti altında olmalıdır”.
Doğrudanmı Rusiya sülhməramlılarının mandatı ilə bağlı belə bir sənəd var? Paşinyanın bunu ortaya atmaqda məqsədi nədir? Yaxud da Azərbaycanın onu imzalayıb-imzalamaması Paşinyan üçün niyə bu qədər önəmli olub?
“2 ildən sonra bu məsələni ona görə gündəmə gətirir ki, hansısa formada sülhməramlıların Qarabağda qalma müddəti uzadılsın”
Məsələyə münasibət bildirən hərbi ekspert Azad İsazadənin fikrincə, Paşinyan üçtərəfli razılaşmanı təhrif edir: “Həmin sənəddə belə bir öhdəlik olmayıb. Rusiya sülhməramlılarının heç bir mandatı yoxdur. Sadəcə üç ölkə rəhbəri razılığa gəldi ki, Azərbaycan və Ermənistan silahlı qüvvələri arasında 2000 nəfərə yaxın Rusiya sülhməramlıları yerləşdirilsin. Onlara da sülhməramlı adı şərti verilib. Paşinyan 2 ildən sonra bu məsələni ona görə gündəmə gətirir ki, hansısa formada Rusiya sülhməramlılarının Qarabağda qalma müddəti uzadılsın. Azərbaycan da buna getməyəcək. Paşinyan bir şeyi unudur ki, Rusiya sülhməramlılarına mandat verilməsi təkcə Ermənistanın iradəsindən asılı məsələ deyil. Ermənistanın buna razılıq verməsi mandat almaq demək deyil. Ərazi Azərbaycanın olduğu üçün tərəf bizik və bizim razılığımız olmalıdır. Azərbaycan isə məsələnin bu formada həllini istəmir. Biz bundan imtina ediriksə, Paşinyanın bunu istəməsinin bir əhəmiyyəti yoxdur. Azərbaycan Rusiya sülhməramlılarının mandatsız formada fəaliyyət göstərməsinə razılığını verib. Bundan artığı ola bilməz. Məndə olan məlumata görə, Rusiya sülhməramlılarına mandat verilməsi məsələsi heç müzakirə olunmur. Bəlkə də 2021-ci ilin yanvarında bunu müzakirə etmək olardı. Ancaq indi bundan söhbət belə gedə bilməz. Ən azından ona görə ki, 3 ildən sonra sülhməramlıların müddəti başa çatır. Azərbaycan da onların vaxtının uzadılmasında maraqlı deyil. Belə olan halda rus sülhməramlılarına mandat statusu niyə verilsin ki? Onsuz da sülhməramlıların fəaliyyətindən Azərbaycan narazıdır. Çünki üzərinə götürdüyü öhdəliklərə əməl etmir. Ermənistandan Qarabağa qanunsuz silah daşınmasına mane olmur və s. Belə olan halda sülhməramlılara hansısa xüsusi statusun verilməsindən söhbət gedə bilməz. Bu baxımdan hesab edirəm ki, Paşinyanın dedikləri sadəcə onun arzusudur”.
Vidadi ORDAHALLI
