“Nədənsə, erməni tərəfi Praqaya Makronla görüşə getdi, amma Moskvaya getmədi”. Bunu Prezident İlham Əliyev yerli televiziya kanallarına müsahibəsi zamanı deyib.
Ölkə başçısının sözlərinə görə, onlar hər vasitə ilə Qarabağ mövzusunu mümkün sülh müqaviləsinə daxil etməyə çalışır və əslində onu bloklayırlar: “Onların Moskvada hansısa hadisələr baş verməsinə istinad edərək nazirlərin orada görüşünə etinasızlıq göstərmələri, ümumiyyətlə, yolverilməz hərəkətdir. Bəs onlar oktyabrın 6-da Praqada keçirilən görüşə nə üçün etinasızlıq göstərmədilər? Axı bundan bir aydan az əvvəl də sərhəddə hadisələr baş verirdi. Orada kifayət qədər ciddi hadisələr olmuşdu. Bunun Ermənistan üçün nə ilə başa çatmasının təfsilatına qayıtmaq istəmirəm. Nədənsə erməni tərəfi Praqaya Makronla görüşə getdi, amma Moskvaya getmədi. Sonra Rusiya Xarici İşlər Nazirliyinin erməni tərəfinin hətta xalis protokol xarakterli davranışı barədə şərhləri də məhz buna dəlalət edir”.
Görünən odur ki, Paşinyan Moskva və Brüssel arasında seçimdə açıq-aşkar xəyanət mövqeyindən çıxış edib.
“Nikolun indi də Moskvanın vasitəçiliyindən qaçması onun regional sülhün əldə olunması prosesinə vurduğu növbəti zərərlərdən biridir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, bütün bunlar ermənilərin xəyanətkar xislətindən irəli gəlir: “Nikol Paşinyanın 2020-ci ilin noyabrından, yəni üçtərəfli bəyanatın imzalanmasından üzü bu yana dəfələrlə sülhün əldə olunması prosesini uzatması cəhdləri artıq bir faktdır və bu fakt əslində Ermənistanın özünü çıxılmaz vəziyyətə doğru sürükləyir. Müxtəlif vaxtlarda danışıqlar prosesinə xələl vuran Ermənistanın baş naziri, bu da azmış kimi, zaman-zaman Azərbaycanın ərazi bütövlüyünə qarşı iddialarını da ortaya atır. Belə bir davranış, əlbəttə ki, İrəvan üçün ağır nəticələrə səbəb ola bilər. Çünki Bakının səbri tükənməz deyil və cənab Prezident də istər son çıxışında, istərsə də bundan əvvəlki bəyanatlarında bu barədə xüsusilə vurğulayıb. Ona görə də düşünürəm ki, Paşinyanın indi də Moskvanın vasitəçiliyindən qaçması onun regional sülhün əldə olunması prosesinə vurduğu növbəti zərərlərdən biridir. Belə bir düşünülməmiş addımların atılması yaxın perspektivdə Ermənistan üçün yaxşı heç nə vəd etmir”.
Bəhruz Quliyev hesab edir ki, Prezident İlham Əliyevin haqlı olaraq daha bir faktı ortaya çıxarması, yəni Paşinyanın Praqa görüşünə qatılmasının ardınca yersiz bəhanələrlə Moskva görüşündən imtina etməsi Moskvanın da İrəvana qarşı mümkün qərarlar verməsinə zəminlər yaradır: “Düşünürəm ki, hazırda Paşinyan birbaşa Fransa prezidenti Makronun əl oyuncağına çevrilib və onun verdiyi təlimatları əsasında fəaliyyət göstərir. Yəni belə görünür ki, bu gün Ermənistan özünü Fransanın əyalətlərindən biri kimi aparır. Bu isə yolverilməzdir və Bakı da, Moskva da artıq bu barədə ölçülər götürməli olacaqlar. Baxın, Fransa Senatı anti-Azərbaycan xarakterli qətnamələr qəbul edir, hətta bir az da irəliyə gedərək Qarabağda “humanitar ofis” açmaq niyyətində olduğunu bildirir. Üstəlik, anti-Rusiya siyasətini də artırır və bütün bunlar sübut edir ki, Fransa rəhbərliyi Cənubi Qafqazda, öz təbirincə, “yerləşmək” düşüncəsində olduğunu xəyal edir. Amma çox yanılır və bu gün Cənubi Qafqazın real oyunçuları var – Azərbaycan, Türkiyə, Rusiya. Heç bir halda kənar qüvvələr Qarabağ bəhanəsi, ya da Ermənistana dəstək məqsədi ilə bu regionda, necə deyərlər, “at oynada” bilməzlər. Azərbaycan öz qətiyyəti, prinsipial siyasəti ilə öz sözünü deyib, deyir və deyəcək. Prezident İlham Əliyev açıq şəkildə bəyan etdi ki, Ermənistan Qarabağ məsələsində sülh prosesini uzatmağa cəhdlərini davam edəcəksə, bu zaman Azərbaycan da delimitasiya olunmamış sərhədlərin müəyyən edilməsində, yəni tarixi Azərbaycan torpaqlarının geri qaytarılmasında qətiyyətli fəaliyyətini davam etdirəcək. Yəni bu ərazilərə qarşı iddialarını irəli sürəcək. Ən əsası, cənab Prezident vurğuladı ki, 2023-cü il Ermənistanın düşünməsi və yekun qərara gəlməsi üçün son ildir və bundan sonra heç bir güzəştə, vaxta yer olmayacaq. Məhz bu reallıq, bu gerçəklik Ermənistana və onun Fransa kimi havadarlarına aydın olmalıdır”.
Politoloq onu da əlavə etdi ki, bundan sonra baş verəcək hər hansı hadisələrə görə də məhz onlar məsuliyyət daşımalı olacaqlar.
Vidadi ORDAHALLI
