Prezident İlham Əliyev noyabrın 18-də Rusiya Federasiyası Hökumətinin sədri Mixail Mişustinlə geniş tərkibdə görüşü zamanı deyib ki, Şimal-Cənub dəhlizinin potensialının artırılması bu layihədə iştirak edən bütün ölkələrin maraqlarına uyğun olacaq:
"Bu ilin əvvəlindən Prezident Vladimir Vladimiroviç Putin ilə biz münasibətlərimizə yaxşı ton, yeni dinamika verdik və il ərzində dəfələrlə görüşdük. Dünən də ikitərəfli gündəliyə aid mühüm məsələlər barədə telefonla danışmaq imkanımız olub. Beləliklə, necə deyərlər, prezidentlər münasibətlərimizin bütün spektrini müəyyən edir. Əlbəttə, bütün müvafiq strukturlar da bu istiqamətdə fəaliyyət göstərir. Biz çox şadıq ki, qarşılıqlı ticarətin həcmi pandemiyadan əvvəlki səviyyəyə çatır və əminəm ki, bu dinamizm qorunub saxlanacaq. Ona görə ki, bu gün, o cümlədən sizin səfəriniz çərçivəsində müzakirələr qarşılıqlı ticarət potensialını artırmağa şərait yaradacaq.
Biz yükdaşımaların həcmində də yaxşı dinamika görürük. Tranzit yüklərə gəldikdə isə, mənim fikrimcə, burada rekord göstəricilərə nail oluruq. Təqribən 50-60 faiz artım var və artım perspektivi böyükdür. Həmçinin tranzit-logistika infrastrukturu məsələsində, ilk növbədə, ikitərəfli əsasda və əlbəttə, qonşu ölkələr də cəlb edilməklə qarşılıqlı əməkdaşlıq potensialını artıracağıq. Ona görə ki, Rusiya və Azərbaycan uzun illər boyu ölkələrimizdə nəqliyyat-logistika infrastrukturuna fəal surətdə sərmayə qoyublar. Nəqliyyat dəhlizlərinin, ilk növbədə, Şimal-Cənub dəhlizinin potensialının artırılması bu layihədə iştirak edən bütün ölkələrin maraqlarına uyğun olacaq, o cümlədən biznes üçün əlavə perspektivlər açacaq".
Göründüyü kimi, Prezident Şimal-Cənub nəqliyyat dəhlizinin potensialının artırılmasının dövlətlərimizin mənafeyinə uyğun olduğunu bəyan edib. İndiki şəraitdə bu nəqliyyat dəhlizinin ərsəyə gəlməsinə mane olan məhz Ermənistandır. Təəssüf ki, Rusiyanın bu məsələdə Ermənistana lazımi təzyiq göstərməsinə Kremldəki ermənipərəst qüvvələr mane olur. Hər halda, Prezident bu mövzuya təsadüfən toxunmayıb. Rusiya rəsmiləri Ermənistanla Kremldəki ermənipərəstlərin bulanıq əməkdaşlığına son qoymalıdır ki, hər iki ölkə üçün rentabelli olan layihə tam gücü ilə fəaliyyətə başlasın. Bu istiqamətdə Rusiyanın üzərinə hansı iş düşür?
Uzun müddət Rusiyada fəaliyyət göstərən, həmin ölkənin ali dövlət mükafatlarına layiq görülən, Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki, Rusiya hakimiyyətində olan bəzi anti-azərbaycançı və ermənipərəst qüvvələr ciddi cəhdlə Azərbaycanla münasibətlərin zədələnməsinə çalışırlar: “Çox təəssüflər olsun ki, biz Rusiyadan ziddimizə verilən hər bir qərarda bütöv hakimiyyəti qınayırıq. Rusiyada böyük erməni diasporu var. Onlar çox ciddi qurumlarda, informasiya kanallarında, Kremldə, Xarici İşlər Nazirliyində kök atıblar. Proseslərə, Rusiya hakimiyyətinin qərarlarına təsir etmək gücünə sahibdirlər. Əslində Rusiya ilə Azərbaycan arasında müttəfiqlik münasibəti var. Ölkə başçıları səviyyəsindəki şəxsi münasibətlər ən yüksək səviyyədədir. Ermənistanı birmənalı dəstəkləyən, Rusiyanın onlara təzyiqlərini neytrallaşdıran da məhz həmin dairələrdir. Mən uzun müddət Rusiyada yaşamışam. Müəllifi olduğum və üç dildə Rusiyada çap etdirdiyim “Erməni vandalizmi” adlı kitabıma görə, həmin ölkədəki güc qurumlar tərəfindən təqib edildim. Nəticədə bütün sağlamlığımı itirdim. Araşdırdıqda bəlli oldu ki, mənə təzyiqlərin hamısını Rusiyada yüksək post tutan ermənilər təşkil etdirib. Ancaq onlar bu addımları erməni kimi deyil, Rusiya rəsmisi kimi atıblar. Dediyiniz məsələdə də, həmin ermənipərəst dairələr məhz Rusiyanın Ermənistana təzyiqlərini neytrallaşdırırlar. Şimal-Cənub dəhlizi ilə bağlı Prezidentin eyhamından Rusiya ciddi nəticə çıxarmalıdır. Çünki Ermənistan bu layihəni tormozlamaqla hazırda heç də yaxşı vəziyyətdə olmayan Rusiyanın maraqlarına ağır zərbə vurmuş olur. Rusiya bütün varlığı ilə Ermənistana təzyiq etməlidir ki, hər iki ölkəyə faydalı olan layihə öz işinə başlasın. Bunun üçün ilk növbədə Kremldəki ermənipərəst qüvvələrin Rusiya hakimiyyətinə təzyiq imkanları tam sıfırlanmalıdır”.
Məhəmmədəli QƏRİBLİ
