Məlum olduğu kimi, Ermənistan baş naziri Nikol Paşinyan bu günlərdə bəyan etdi ki, Qarabağ məsələsi İrəvan üçün ərazi deyil, hüquqi məsələdir. Ardınca isə Ermənistanın bu məsələdə mövqeyi ənənəvi mövqedən uzaqlaşmayacağı təqdirdə savaşın qaçılmaz olacağına eyham vurdu.
Bildirdi ki, növbəti dəfə müharibə olarsa, o zaman heç bir ölkə onları müdafiə etməyəcək. Paşinyanın sözügedən fikirlərindən sonra mövcud hakimiyyətlə Araik Arutyunyanın separatçı-terrorçu dəstələri arasında münasibətlər daha da gərginləşib. A.Arutyunyan bildirib ki, Paşinyan hakimiyyəti "artsax"ın təhlükəsizliyinə qarant rolunu oynamaqdan imtina edib: “Ona görə də özünü təqdimetmə hüquqlarımız uğrunda özümüz sona qədər mübarizə aparmaq qərarına gəlmişik”.
Daha sonra separatçıbaşı bəyan edib ki, 44 günlük savaşdan sonra Rusiya sülhməramlı qüvvələri ilə birlikdə "artsax"ın yeni təhlükəsizlik sisteminin yaradılmasına başlanılıb: “Rusiya sülhməramlı qüvvələri ilə "artsax"ın gələcək taleyini həll etmək istiqamətində əməkdaşlıq edirik. Onların yardımı ilə “artsax”ın yeni təhlükəsizlik mexanizmlərini yaradırıq”.
Bununla, əslində Araik sülhməramlıların əsl qanunsuz fəaliyyətini ortaya çıxarır. Çünki 10 noyabr razılaşmasına görə, Xankəndi və ətraf bölgədə müvəqqəti dislokasiya olunan rus sülhməramlıların erməni terrorçulara təhlükəsizlik mexanizmləri yaratmaq səlahiyyətləri yoxdur. Əslində, onlar yalnız atəşkəs rejiminin qorunmasına nəzarət etməlidirlər. 10 noyabr razılaşmasında sülhməramlıların Qarabağdakı qanunsuz erməni silahlı birləşmələri ilə hər hansı əməkdaşlığı belə nəzərdə tutulmur. Halbuki, bunlar indi birgə yeni təhlükəsizlik mexanizmlərinin yaradılmasından danışırlar.
“Sülhməramlılar Qarabağdakı qanunsuz erməni silahlı birləşmələrini yenidən komplektləşdirmək istəyir”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, Araik bu açıqlaması ilə bir növ sülhməramlıların qanunsuz fəaliyyətini ortaya çıxarmış oldu: “Bu əslində o deməkdir ki, sülhməramlılar Qarabağdakı qanunsuz erməni silahlı birləşmələrini yenidən komplektləşdirmək istəyir. Hansı ki, bu, 10 noyabr üçtərəfli razılaşmaya tamamilə ziddir. Çünki həmin razılaşmada sühməramlıların təhlükəsizlik mexanizmlərini yaradılmasına yardım etməsi deyil, erməni silahlı birləşmələrinin oradan çıxarılması öz əksini tapıb. Razılaşmanın 4-cü bəndində bütün bunlar açıq-aşkar yazılıb. Ancaq sülhməramlılar razılaşmanın prinsplərini pozaraq separatçıları silahlandırır. Təbii ki, bu, Azərbaycanın suverenliyinə zidd bir addımdır. Beynəlxalq hüquq normalarının pozulması deməkdir. Eyni zamanda, 10 noyabr razılaşmasının tələblərinə ziddir. O üzdən, bununla bağlı Rusiyaya etiraz edilməlidir. Sülhməramlılar belə qanunsuz himayədarlığa son qoymalıdılar. Bu cür fəaliyyət sülhməramlı missiya ilə uzlaşmır. Bunları görməmək mümkün deyil. Avropa İttifaqı vasitəçilik təşəbbüsü ilə çıxış edir. Ancaq hiss olunur ki, Rusiya bundan narahatdır. Bütün bunlar onu göstərir ki, Rusiya əslində Azərbaycanla Ermənistan arasında sülhün olmasını istəmir. Rusiya sülh yox, münaqişə yaratmağa çalışır. Hər vasitə ilə çalışırlar ki, tərəflər arasında qarşıdurma olsun. Ona görə də hesab edirəm ki, rus sülhməramlılarının belə fəaliyyəti yolverilməzdir və Azərbaycan buna öz etirazını bildirməlidir”.
Ə.Mustafayev onu da qeyd etdi ki, Rusiyanın məlum təxribatı həm də gələcəyə hesablanıb. Ona görə də bunun qarşısı alınmalıdır.
Vidadi ORDAHALLI
